40
Yosefa avaita gietoyavuga.
1 E, ada seyana tova meItipita adikini yana togugai adiselu, seyana gufa tovelavela aditonagona ada anavelu falawa toakabu aditonagona, ani yadi kauveya meItipita adikini nuwana ikivekoyona. 2 Ada kini ginuwakoyo tonagona adiselu wagaidiya, gufa anatovelavela ke falawa anatoakabu wagaidiya. 3 Ada adiselu gisedi toyavaga aditonagona yana manuwa deli wagaine, deli-nai Yosefa gimiyamiya-deya. 4 E ada toyavaga aditonagona ani togugai-dina yogoyogodiyavo Yosefa nimane gisedi ada givetogugai wagaidiya. Ada deliya imiya tova manamanawena.
5 Bogi seyana wagaine kini anagufa anatovelavela ke falawa anatoakabu adiselu iavaitaluga aku adiavaita-dina adikivila tulina tulina. 6 Ada malabutuya Yosefa gielai wagaidiya ani giitadi inuwanuwa lakaina 7 ada gitolidadanedi, givona, “Aiyo, gavaiyamu-yo malinai amiita nuwavita?”
8 Ani adiselu ilufata, ivonaga, “Ime amaiselu bogi aavaita, aku keke tamo gaito idedeku anafaiweya amaavaita-dina gina etoyavu wagaimeya.”
Ada Yosefa givonedi, “Yaubada anakaibe-mowa Banae anafaiweya avaita gina etoyavuga kaliva wagaidiya. E ada amiavaita-dina wana ifufuyedi wagaikuya.”
9 Ada gufa anatovelavela anaavaita gimaduifufuyena, givonaga, “Iya akuavaita wagaine ani gaitana ai gileifi magigikuya gimidimididi, 10 ani taidei ai-nai wagaine laga toiye, ada laga-dina wagaidiya luku gisedi ada maduga-mowa iveiya ke iveguwa ada guwadi-dina giboyalidi. 11 Aku Felo anavei gaabiabina ke guwa-dina gakoludi, ada gabibidodona vei-nai wagaine ke nimane gasena.”
12 Ada Yosefa givonena, “Taidei avaita-nai anakivila taidei anafaiweya: Laga toiye tainei yadayada toiye. 13 Yadayada anaveto wagaine aimo Felo gina kilakaini ke gina se-vagileni ya faisewa-nai tuwaina wagaine, ada kaduwe anavei unasena nimane anafaiweya tova nagona. 14 Ada tova-nai ya iwakana una nuwagana, una nuwaududuku. Gaveola wagainiya uda nuwakalikaliyeku ke meyameyaganina faikuya udaifufu Felo wagaine ke iya kaduwe gida etoyavuku taidei deli-nai wagaine-deya. 15 Faina iya meIbeliu yama fafali wagaine gamiyamiya aku kaliva tufodi ikiveyabiku ialiyeku idedeku-deya, ada kaduwe idedeku deli wagaine iseku aku keke tamo koyona gadagai.”
16 Ada falawa toakabu aditonagona ginogalina Yosefa yana iyavuga iwakana velemoena ada givonaga, “Iya kaduwe akuavaita taidei anafaiweya: Beledi wafuwamidi toiye gakedukedudi. 17 Aku fuwama getane-mwane ani mali aa ke mali aa kabukabudi gadododi Felo faine, ada kuluwakuya aku manuga ikanikani fuwama wagaine.”
18 Ada Yosefa givonaga, “Taidei anafaiweya avaita anakivila: Fuwama toiye tainei yadayada toiye. 19 Yadayada anaveto wagaine aimo Felo gina kilakaini odo gina lugoloina ada vovo gina etofolena ada una kwaiyoyo ai wagaine ke manuga vido ina kanina.”
20 E ada yadayada anaveto wagaine Felo yana yadayada tubuga anaebanuwaududu anakanibutu gibubuna, ada yana togugaiyavo matatabuna gidouwe-vagauwidi abutu-nai wagaine. Kadu givona ke yana togugaiyavo adiiselu deli wagaine iabidi ialiyedi yoo matadiya. 21 Ada Felo yana togugai banae gufa tovelavela aditonagona ani yana gugai-nai givele-vagilena ke kaduwe Felo anagufa waveina nimane gisena. 22 Aku falawa toakabu aditonagona ani ai wagaine vovona giluvekwaiyoyona. Yosefa yana vona adiselu wagaidiya mamauwe giyegemona.
23 Aku gufa tovelavela aditonagona ani yana iwakana ginuwagana muline au nuwana givulu-mowa, keke maita Yosefa gida nuwaududu.