Wosheetso P'awlos Shints Wosho
K'orontos Ashuwots Maants
Kindo
P'awlos K'orontos dats ashuwotssh b́ guut'ts shints wosho b́ guut'e K'orontositse b́ need'its Ik'i moowutse krstiyani beyonat imnetiyatse tuut teshts kic'oosh biitso daatsiyosh gawutni. Manoor K'orontos dats jamaatsik wotts Grik kitu bwottsi danmbaatse Akayiya eteets Rom datsatsi kitti enuni btesh. Kitman een wotts jaaki fino, matseets niwo, ayidek'at gawunoke teshts fini gondannat biitse haymanoti ayon daneeki btesh.
Woshetso b́ t'iwints Ik'i moowwutse teshts kayeyaatsa, gond finets beyo, widonat de'eyi jangono, S'ayin shayiri imi jangonat k'irotse tuwi janga b́tesh, mank'owere woshetso doo shishiyi jangosh aatets keewanots kaatsdek't t'iwintsona b́t'intsi.
«Shuno» Ik'o b́ shuntswots ashuwotssh b́ imts imuwotsitse bogo b́wottsok'owo kitsiru tatse keezl k'ot'o mas'afanitse ayidek't daneek wotts kayo b́wotok'o daneke.
Jamon mas'aafan b́detstso
Kindo 1:1-9
Krstiyaniwotsitse tuuts kayewo 1:10—4:21
T'awu gondtsi wotonat meyitsi ash beyon 5:1—7:40
Krstiyaaniwotsnat krstiyaniyots amantsman de'awwotsn 8:1—11:1
Ik'i meyitsi beyonat Ik' ik'iyi niwon 11:2—14:40
Krstosnat amantsuwotsn k'irotse tuwo 15:1-58
Yhuditse fa'a kic'ts krstiyaniwotssh tep'o 16:1-4
Gúúpo 16:5-24
1
1 Ik' shunon Iyesus Krstossh wosheets wotosh s'eegetso P'awlosnat no eshu Sostensokere.
2 K'orontos kitotse fa'a Ik' moosh, biyitsnowere Iyesus Krstosn S'ayin wotts S'ayin bowotish s'eegetswotssh, mank'owero bo be beyoke, bonat nonsh Doonz wottso no Doonz Iyesus Krstos shúútso s'eegiru jamwotssh.
3 No nihi Ik'onat Doonzo Iyesus Krstosokere s'aatonat jeenon itsh wotowe.
Ik' údo
4 Iyesus Krtosnton s'aato itsh imetsosh it jangosh jam aawo Ik'o údituwe. 5 Jam keewon, noon keewon wotowa danon Krstosn gaalwutserte. 6 Krstos jangosh itsh t keewts gawo itokere kúp'ere. 7 Eshe no Doonz Iyesus Krstos be'ewo koton nobefere kon naari shayiri imo itsh shapratse, 8 No doonz Iyesus Krstos aani woor eeg eeg deshawwotsi wotar nodatsetwok'o bí s'uwosh b́ borfetsosh kup'ar it beetuewk'o woshúwe. 9 B́ naay no Doonz Iyesus Krstosnton ikwoto itdetsetuwok'o itn s'eegtso Ik'o amaneke.
Krstiyaniwots dagotse k'alewo b́geyirawok'o
10 Ti eshuwotso! «K'alewo it dagotse b́ berawok'o, it jamets shiyeyar ik níbonat ik s'iil s'iilon kup'ar beewere,» etaat no Doonz Iyesus Krstos shúútson itn k'oniruwe. 11 T eshuwotso! it dagotse fayo b́ beyiruwok'o K'elo'e maa ashuwotsoke shishre. 12 1:12 Wosh. 18:24 Manuwere it itok tookon «Taa P'awlosk taane, taa Ap'losk taane, taa P'et'rosk taane, taa Krstosk taane» it etiri. 13 Bére Krstos kayera? P'awlos itsh jiitera? Himó it gupe P'awlos shútsoneya? 14 1:14 Wosh. 18:8; 19:29; Rom 16:23 Taa K'ersp'osnat Gayyosiyere okoon ititsere konnoru t gufawotse Ik'o údituwe. 15 Eshe «Taan P'awlos shútson guuperte» err keewosh falituwo aaliye. [ 16 1:16 1 K'or. 16:15 Arikee, Ist'ifanos maa ashuwotsi gupre, maniyere okoon k'osho taa t gupts asho b́ bewok'o gawratse.] 17 Krstos taan b́wosh doo shishi keewo t danituwok'owa bako t gupishaliye, Krstos jiito* 1:17 Jiita: Eteetso mask'aliyoniye. hank'on b́ oorerawok'o doo shishi keewan tdanir ashoke daatsets dani telfi noon keewok'onaliye.
Krstos Ik' danitelefonat ango b́ woto
18 B́ jiti keewo t'afit ashuwotssh darok'owe b́ taaweti, noosh kashituwotsshomó Ik' angee.
19 1:19 Isa. 29:14 «Dani telefetswots dano t'afituwe,
Dani telefetswots danono ok k'aaú bazetuwe» ett guut'ere.
20 1:20 Iyo. 12:17; Isa. 19:12; 33:18; 44:25 Eshe dantso aawoke b́ fa'oni? Nem daniruwonu aawoke b́ fa'oni? Danosh geyiruwonu aawoke b́ fa'oni? Ik'o datsanatsi dani telefo eegoru bítse dandeshawok'o woshk'rerosha?
21 Datsnatsi ashuwots bo took danitelefon Ik'o danosh bo falawok'o Ik'o b́ danon boats is'k'rere, ernmó dárok'o taaweyiru no nodaniru doo shishiy keewon amanituwots bo kashituwok'o Ik' shún wotere. 22 Ayihudiyots adits keewo bek'oshe bo geefoni, Girik ashuwotswere danitelefe bogefoni. 23 Noomó Krstos noosh b́ jitetsok'oniye no daniri, Hanuwere ayhudiyotssh t'uge, Grik ashuwotssh dáree. 24 S'eegetswotsshomó ayhudiyotssh wotowa Grik ashuwotssh, Krstos Ik' angonat Ik' danitelefe. 25 Ik' dára ett gaweyiru keewo ash danitelefoniyere bogfe, Ik'o maawa ett gaweyiru keewo ash kup'oniyere bogfe.
26 T eshuwotso! Ik'o itn b́ s'eegor awuk'o ash it wottsok'o aab gawde'ere, ash gaawiruwok'on it dagotse aywots daanetsuwots wee kúp'uwots wee een een ashuwots aalne. 27 Ik'o dantelfetswotsi jitsiyosh datsanatse dartsok'o taawets ashuwotsi b́ marat'i, kúp'uwotsi jitsiyosh datsatse maawtsok'o taawetswotsi b́ marat'i, 28 Ik'o datsatsi ashuwotsoke fa'ane ett be'eyiru keewwotsi bo berawok'o woshosh datsanatse dash antsonat gac'ets k'awnts deshaw keewo b́ marat'i. 29 Hanowere b́k'al konwor asho Ik' shinatse b́ tooko dambaan b́deshawok'owe. 30 Itnomó Ik'o Iyesus Krstosnton ik woto it detsetwok'o b́ woshi, mansh Ik'o Iyesus Krstosn noko danitelefo bíne, noosh noko kááwo bíne, no s'ayinonat no bín nofaritwok'o b́ woshi. 31 1:31 Erm. 9:24 Eshe mas'aafotse guut'etsok'on «It'etuwo b́ beyal Ik'on id'ee.»