1  * Mat 13:1-2; Mrk 3:9-10Na parava tara e Isu i pesi na dahana Darilomu e Genesaret,* A Darilomu e Genesaret, a rana tara a Darilomu e Galili. i vara e huriki. Pali i kupo hateka e huriki ri bole tugua ri gi longo a nitana Vure. 2 E Isu i matai a aga i rua ni kaka rike na lavu. A tahona aga nga ri vano, ri loi pasi a vuko ne ria. 3 Lakea e Isu i rike na aga tara, a aga ne Simon, i takia e Simon ge tugu talea, ge pasi polovavo popote. Muri i made puru na aga i vara e huriki.

4 Na tahuna i vara lobo, i takia e Simon, i ta maea, “O vore pori na hini i utu, o ru purua a vuko vomu, o lakavu a manu.”

5  * Ion 21:3-8E Simon i koli, i ta maea, “Bakovi Dagi, mi ru a vuko na rodo i vano i palala a hini, pali mi ngopu. Pali ga ru tabua a vuko, a vuhuna o taki iau ga rua.”

6 Lakea e huriki a tahodari ri ru tabua a vuko. I uka ma i tabaka, ri koro a maka manu i kupo hateka, lakea a vuko i popote ge marape. 7 Lakea ri gale e huriki a turane ria na aga tara ri gi valai ri gi kori ria. Ri lakavu rike a maka manu, ri vakavonu a aga nga, i popote ru gu mabubu.

8 Na tahuna e Simon Petrus i masia a maki i bele maea, i turume puru tabukoi na vahane Isu i ta maea, “Bakovi Dagi, o ha nau. Iau a bakovi hale!” 9 I ta mavonga, a vuhuna i turutu vona a maka manu ri lakavu i kupo gala hateka. 10 E Iakop, e Ioanes, re tune Sebedi, rua a tahodari turane Simon. Rua ranga ru turutu.

Muri e Isu i takia e Simon i ta maea, “Naha ni mangenge. Muga o lakavu a manu, pali ngane bara o tuli e huriki a bakovi ri gi valai nau.” 11  * Mat 19:27Lakea ru kaka rike na lavu a aga, ru taparaki vonga a maka maki lobo ne rua, ru muri maia e Isu.

12 Na parava tara e Isu i made na tanga tara. A bakovi tara, i ratapilea a patala, i valai maia. Na tahuna i masia e Isu, i tabuli barara puru na malala i nanea e Isu i ta maea, “Bakovi Dagi, ioe bara o ngaru, o vakamatapado iau.”

13 Lakea e Isu i toto talea a limana, i padoia, i ta maea, “Iau a ngaru go matapado. O matapado.” I malaviriri kunana i malaharuri vona a patala.

14  * Levi 14:1-32Lakea e Isu i taki tora ia, i ta maea, “Naha ni vakalongoa tara viri. Pali o vano, o vakasiri ioe na prister, o habi a nihabi na viri ni vakamatapado, ge manga a hini e Moses i here puru hosi. O rata mavonga, e huriki ri gi matakilaka vona ioe ni vakamatapado pali.”

15 Pali a velengane Isu ni longo na tanga lobo. Lakea i kupo e huriki ri valai ne Isu, ri gi longoa a nitana, ri ngarua ge vakamahuri ria. 16 Pali na parava i kupo i ha taro ria, i lakea na robo i ngeki, i vasileki vonga.

17 Na parava tara e Isu i vara e huriki. E huriki a Pariseo, a mari na vinara, ria ranga ri made vonga. Ri valai na tanga lobo na tabeke ne Galili, ne Iudea, ne Ierusalem. A Vure i habi a nitora na Bakovi Dagi, ge vakamahuri e huriki na gilanga. 18 I uka ma i tabaka e huriki a bakovi ranga ri kaloho vilia a bakovi i beu i mahita na moke. Ta ga ri gi bole dilia na roho, ri gi ru tabukoi ia na matane Isu. 19 Pali ri keri ni bole dilia, a vuhuna i ala kupo hateka e huriki ri vapesihi lae, ri longoa e Isu i vara. Lakea ri bole rikea na mapana ruma, ri pukea a mapana ruma, ri vakatavore purua turana moke vona, i puru na kurukurune huriki tabukoi na ngalane Isu.

20  * Ais 43:25; Luk 7:48Na tahuna e Isu i matai ria ri luhoi torea, i takia a bakovi i beu, i ta maea, “Turagu, a puga vuroki a naro hale vomu.”

21 Lakea e huriki a Pariseo, a mari na vinara ri vanana, “E rei ra bakovi iea, ra i ngaru ni bole a murina Vure? I uka tara bakovi tavula ge puga a naro hale, a Vure kikeri kunana.”

22 E Isu i lohoka vona a niluhoi ne ria, lakea i nana ria, “I navai mu luhoi mavonga? 23 I vai a ngava i kavakava ga takia? Ga taki, ‘A puga vuroki a naro hale vomu,’ o ga ta maea, ‘O pesi rike o laho?’ 24  * Ion 5:8A ngaru mu gu matakilaka vona a Tuna Bakovi i tahoka a nitora koea na malala ge puga vuroki a naro hale.” Lakea i takia a beu i ta maea, “A taki ioe, o pesi rike, o bolea a moke vomu, o hamule na ruma vomu.”

25 I malaviriri kunana i pesi rike na matane ria, i bolea a moke vona. I laho lakea na ruma vona, i kavurikea a Vure. 26 E huriki lobo ri ngapa, ri kavurikea a Vure. Ri turutu vona a maki ri masia, lakea ri ta maea, “Mona si masia a maki ni turutu vona.”

27 Muri e Isu i pagitala, i masia a bakovi ni bole a takis, a rana e Levi. I mamade na roho na takis. Lakea e Isu i takia, “O muri nau.” 28 Lakea e Levi i pesi rike, i pe puru a maki lobo vona, i muri maia.

29 Muri e Levi i rata a habu dagi ne Isu na ruma vona. E huriki a bakovi ni bole a takis turana e huriki a bakovi ranga ri kani turane rua. 30  * Luk 15:1-2Pali e huriki a Pariseo, e huriki a mari na vinara ri ta puhaki lakea ne huriki a murimuri vona, ri ta maea, “I navai mu kani mu ninu turana e huriki a bakovi ni bole a takis, e huriki a bakovi hale?”

31 E Isu i koli i ta maea, “E huriki i uka ma ri giloa i uka ma ri gi matai a dokta. E huriki ri giloa kunana bara ri masia. 32 Iau a valai i uka ma ga gale mua e huriki mu luhoi ta mu naro kamumu mu gu pulo a vilone mua. A valai ga gale e huriki ri naro hale ri gi pulo a vilo ne ria.”

33 Muri ri takia, ri ta maea, “E huriki a murimuri ne Ioanes ri peremu. E huriki a murimuri ne huriki a Pariseo ria ranga ri peremu, ri vasileki. Pali e huriki a murimuri vomu ri kani, ri ninu kunana.”

34  * Ion 3:29E Isu i koli i ta maea, “E huriki ri made turana bakovi i parangi karaba i uka ma ri gi peremu. Bara ri kani turana. 35 Pali na tahuna a bakovi i parangi karaba ni tuli tala ne ria, bara ri peremu.”

36 Muri e Isu i takia ne ria tara nita vakakika, i ta maea, “I uka tara viri ge vida talea na varakia karaba a mavidana, ge rahi kari a hini marape na matutuna varakia. Bara i rata mavonga, bara i ratapilea a varakia karaba, lakea a tabekena varakia karaba i uka ma ge karea a matutuna varakia. 37 I mavonga tabu, i uka tara viri ge guru dili a vain karaba na matutuna buroi.† O matai a hanuna buroi ni rata na kulina me ne Matias 9:17. Bara i rata mavonga bara i mapoda a buroi, lakea a vain bara i maguru tala. 38 I mavonga kunana a vain karaba bara ni guru dili na buroi karaba. 39 Pali i uka tara viri ge ninu muga a vain hosi muri ge ngaru a vain karaba tabu, a vuhuna bara i ta maea, ‘a vain hosi i nami kamumu hateka.’ ”