1 A ra si gi takia ngane? Si gi rata mavonga a naro hale, ge bele dagi a naro kamumu na Vure? 2 I uka liu. I manga si mate pali. I uka ma si gi rata tabu a naro hale. 3  * Gal 3:27Mu lohoka vona pali; na tahuna ni vahilolo hita, si rihi e Isu Kristo. Na naro iea kunana, i manga si mate turana. 4  * Kol 2:12Na tahuna ni vahilolo hita, i manga si mate turana, ni tanu hita. A nibagetu ne Tamane Hita i vakamahuri mulea e Kristo. I mavonga kunana, bara i rata hita si gi laho na nimahuri karaba.

5 Si rihi e Kristo, i manga si mate turana. I mavonga, bara si mahuri mule manga ia. 6  * Gal 5:24Si lohoka vona, na tahuna i mate, hita ranga, a vilo hale hosi ne hita i mate. Ngane a ningaru hale na kakaine hita i uka nitora. I uka ma ge hita a vorakato tabu na naro hale. 7 I mavonga, a vuhuna e huriki ri mate pali, ri matukapaga na ningaru hale. 8 Si lohoka vona bara si mahuri turane Kristo, a vuhuna si mate pali turana. 9 Si lohoka vona e Kristo i mate, i pesi rike mule na matenga. Ngane i uka ma ge mate tabu. A matenga i uka ma i matakari tabua. 10 I mate balaka taku kunana, ge kori e huriki a bakovi a ngatavine ri rata a naro hale. I uka ma ge mate tabu. Ngane i mahuri, i rata vakaroro a leho na Vure.

11  * 2Ko 5:15; Gal 2:19I mavonga mua ranga, mu rata manga mu mate pali, mu keri ni ramai a ningaru hale ne mua. Mu rata manga a Vure i habi a nimahuri karaba ne mua, a vuhuna mu rihi e Isu Kristo. Mu rata vakaroro a leho na Vure.

12  * Vuh 4:7Nahea a naro hale ge matakari a kakaine mua, a vuhuna a kakaine mua bara i mate, pali a hanune mua bara i tabuli vakaroro. 13  * Rom 12:1Nahea mu gu habi a tabekena kakaine mua ni rata a naro hale. Mu habi mua na limana Vure, ge rata a leho kamumu polo ne mua, a vuhuna a Vure i vakamahuri mule mua pali na matenga. 14  * 1Ion 3:6Nahea a naro hale ge vakavora mua, a vuhuna i uka ma mu ramai a Vinara ne Moses, lakea a Vure ge korimule mua. A Vure, na naro kamumu vona kunana, i korimule mua.

15 Ngane i uka ma si longototo a Vinara si gi bole a nimahuri vakaroro. Si roe vona a nidodo, a naro kamumu na Vure, ge ravunu vuroki a naro hale ne hita. Pali ge navai ngane? Si gi tabana ni rata vakaroro a naro hale, o i uka? I uka liu! 16  * Ion 8:34; 2Pe 2:19Mu luhoi kado. E rei a viri i habi mule ia na limana viri, ge vora vona, ge longototoa, ia ngane a vorakato. Hita bara si vora vora na naro hale, o bara si vorakato na Vure, si longototoa. A viri i vora na naro hale, bara i vurua. A viri i vora na Vure, a Vure bara i ravunu vuroki a naro hale vona. 17 Pali iau a kavurikea a Vure, a vuhuna muga mu vora na naro hale, pali ngane mu longototo a nitovo, ra ni tovo mua vona. 18 Ngane mu matukapaga na naro hale, mua a vora na naro kamumu.

19 A ta vakakika na vorakato, a vuhuna a niluhoi ne mua i manga a niluhoi na viri na malala. I uka ma mu longokilala a nitana maki na Vure. Hosi mu habi a maka tabekena kakaine mua ni rata a naro na molenga, a naro hale legelege. Ngane a ngaru mu gu habi a maka tabekena kakaine mua, mu gu vora na naro kamumu, lakea bara mu malamala na matana Vure. 20 Hosi, na tahuna mu vora na naro hale, i uka ma mu luhoi lege ni rata a naro kamumu. 21 Ngane mu maruhu vona a maka rabu hale ne mua hosi. Pali a ra kanena maka naro hale nga? A kanene ria a matenga. 22 Pali ngane mu matukapaga na naro hale, mu vora na Vure. A kanena naro iea, bara mua a ngate muholi na Vure, bara mu bole a nimahuri vakaroro. 23  * Rom 5:12,15A mapana naro hale a matenga. Pali a nimahuri vakaroro, a Vure i habi tavula ne hita, a vuhuna si rihi e Isu Kristo, a Bakovi Dagi ne hita.