1  * 1Tes 2:19-20I mavonga, mua e huriki a turagu, mu pesi tata mavonga turana e Bakovi Dagi. A ngaru hateka mua, a vivi ne mua. A ngaru hateka ni matai mua. Mu vakabagetu a leho nau.

2 O Eudia, o Sintike, a ngaru muru gu pesi palupu na niluhoi i taku, a vuhuna muru rihi e Bakovi Dagi. 3  * Luk 10:20Pali ioe Sisogos* E Sisigos, a nita Grik. A pelegona i manga e “turagu muholi.” tara, o kori a ngatavine ala rua nga. Rua varago ru leho turagu ni vakalongo a Velenga Kamumu. Mete leho turana e Klemen, e huriki ranga, a rane ria ni here na buk na nimahuri.

4 Mu vivi vakaroro ne Bakovi Dagi. A taki tabu, mu vivi. 5  * Hib 10:25,37; Iak 5:8-9Mu ta madoru mai e huriki lobo. E Bakovi Dagi i tabukoi ge valai, 6  * Mat 6:25-34; Kol 4:2i mavonga naha ni loho pae vona tara maki. Pali mu vasileki na maki lobo. Mu takia a Vure a ra maki mu ngarua. Mu kavurike ia vona a maki lobo i rata pali. 7  * Ais 26:3; Ion 14:27; Kol 3:15Lakea a nivalemu na Vure, ge matakari a hatene mua, a niluhoi ne mua, a vuhuna mu rihi e Isu Kristo. A nivalemu iea i kamumu hateka, si keri ni lohoka lobo vona, i uka harena.

8 Mua e huriki a turagu, a maka naro i muholi, a maka naro ni togo, a maka naro malamala, a naro kiripiripi, a naro kamumu e huriki ri ngaru, a naro e huriki ri kavurikea, a maka maki i kamumu, a maka maki e huriki ri kavurike, mu luhoi tata a maki nga. 9  * Rom 16:20A maka naro a tovo mua vona, a ngava mu longo nau, a naro mu matai a rata, mu rata, lakea a Vure na nivalemu bara i made turane mua.

10 A kavurikea e Bakovi Dagi a vuhuna mu luhoi tabu iau. Hosi mu luhoi iau, pali mu uka dala ni kori iau. 11 I uka ma a bala tara maki, pali a tovo pali ni vivi kunana. Iau a tahoka a maki, o a bala a maki, a vivi kunana. 12 Iau a made navai, a bala a maki, o a tahoka a maki i kupo, a maru, o a vitolo, iau a lohoka ni made kamumu kunana. 13  * 2Ko 12:10E Kristo i vaka­tora iau, lakea a kara ni rata a maki lobo.

14 Pali i kamumu mu kori iau na tahuna a bole a maregoa. 15  * 2Ko 11:9Pali mua, a tara na Vure o Pilipai, mu lohoka vona, na tahuna a vara karaba ne mua a Velenga Kamumu, muri a pe a tabeke ne Masedonia, i uka tara na Vure ge tuhori iau na nilaho nau. Mua kunana mu tuhori iau. 16 Iau a made o Tesalonika, mu vakaru nau a kinori ne mua balaka rua. 17 I uka ma a ta maea mu gu vakaru tabu a kinori. A ta maea, a vuhuna a ngarua a Vure ge rata kamumu mua a vuhuna mu rata kamumu iau. 18 Pali ngane i uka ma a bala tara maki. A tahoka i kupo hateka, a vuhuna e Paproditus i habi polo nau a kinori mu vakaru valai turana. I manga a nihabi manginoro, a Vure i burongia, i vivi. 19 A vuhuna mu rihi e Isu Kristo, a Vure nau ge vakatahoka mua na maki lobo mu bala vona, ge ramai a mahala vona na hunu, i kupo hateka. 20 A Vure, e Tamane hita. Ne vona kunana a bagetuanga lobo vakaroro. I muholi.

21 A talo e huriki a tara na Vure ri rihi e Isu Kristo. E huriki a turane hita koea ri tagui mua. 22 E huriki a tara na Vure koea ri talo rike ne mua. E huriki ri leho polo­lilo na rumahariki ne Kaiser, ria ranga ri talo mua.

23 E Isu Kristo a Bakovi Dagi ge rata kamumu mua.