1 E Iosua i gale palupu e huriki a kabu lobo ne Israel ri vapopo na tanga e Sekem. Na tahuna ri bele vonga i gale e huriki a gare, a matakari, a mari ni pelekado a maregoa, a bolekori, ri valai ri pesi na matana Vure. 2  * Vuh 11:27 Lakea e Iosua i taki e huriki i ta maea, “E BAKOVI DAGI a Vure ne hita a Israel i ta maea, ‘Hosi hateka e huriki a gare ne mua ri made na tabeke mule lokovonga na naru e Iupretis, ri kavurike a maka vure ranga. E Tera e tamane Abraham, turane Nahor ru made vonga ru kavurike a vure ranga. 3  * Vuh 12:1-9; 21:1-3 Muri a bolea e Abraham a gare ne mua, na robo i tabuli mule lokovonga na naru e Iupretis, a taparaki vilia a vakasiri loboa vona a malala e Kenan. A habi vona e huriki a hamona ri ala kupo. A habia vona e tuna i taku kunana e Isak. 4  * Vuh 25:24-26; 36:8; 46:1-7; Vin 2:5 A habi ne Isak e tuna ala rua e Iakop e Esau. A habia ne Esau a robo e Idom, a tabeke na lolo, pali a gare ne mua e Iakop i puru lakea o Egipto. 5  * Nim 3:1–12:42 Muri a rudu e Moses e Aron ru tuhori e huriki a gare ne mua, a vuhuna a ratapile hatekea a robo e Egipto na maka vuranga. Pali iau a bole tala mua vonga.

6  * Nim 14:1-31 “ ‘Na tahuna a tuli tala o Egipto e huriki a gare ne mua, a tuli lakea ria na Dari Vururu. Lakea e huriki a Egipto ri bole a maka karis a hos, ri nunu muri mai ria i harena na Dari Vururu. 7 Re huriki a gare ne mua ri mangenge, ri gale dagi hateka valai nau e BAKOVI DAGI, ga tuhori ria. Lakea a ratea a uvo i bele na kurukurune huriki a Egipto, a gare ne mua. A ratea a dari i rere tagu e huriki a Egipto. Mu lohoka vona a maka maki a rata virihi e huriki a Egipto vona. Muri mu made tabaka na tabeke i ngeki.

8  * Gi 21:21-35 “ ‘Muri a taparaki lakea mua na malala ne huriki a Amor, na tabeke na nirikena haro na naru e Iordan, lakea e huriki a Amor ri vaubi ne mua. A tuhori mua, mu rangi ria na vabinga. Mu bolea a malala ne ria, a vuhuna a muga, a ratapile ria. 9  * Gi 22:1–24:25Muri e Balak e tune Sipor bakovi, a hariki o Moab, i vaubi ne mua. I talo rike a ngava lakea ne Balam e tune Beor, i takia ge ruduraha mua. 10 Pali iau e BAKOVI DAGI, a marikoi ni longo a maka niruduraha ne Balam. Lakea a ratea i vakalongo a maka maki kamumu ge bele ne mua, a korimule mua na limane Balak.

11  * Ios 3:14-17; 6:1-21 “ ‘Mu laho polo a naru e Iordan mu bele vona a tanga e Ieriko, lakea e huriki a bakovi o Ieriko ri vaubi ne mua. E huriki a Amor, a Peres, a Kenan, a Hiti, a Girgas, a Hivi, a Iebus, ri vaubi ne mua, pali iau a tuhori mua, mu rangi ria. 12  * Nim 23:28; Vin 7:20 A rudu maka vuvu ri muga mua ri rata e huriki a pile ri mangenge hateka ne mua, i manga a hariki ala rua o Amor ri ha ne mua. I uka ma mu lili tala rua na nitora ne mua, na bainat na kiniperi ne mua. 13  * Vin 6:10-11A habia ne mua a malala, i uka ma mu leho vona. A habi ne mua a maka tanga i uka ma mu rata. Ngane mu made vona a maka tanga nga, mu kani a maka kanena kai a vain a oliv. Ra maka kai nga i uka ma mu varo na limane mua.’ ”

14 E Iosua i vakalongo lobo a nitane BAKOVI DAGI, i ta tabu i ta maea, “Ngane mu longo. Mu togoa e BAKOVI DAGI, mu ramaia mu rata vakaroro a leho vona na hatene mua. Mu lohopile vona a maka vure ranga e huriki a gare ne mua ri kavurike ria na tabeke ne Mesapotamia ne Egipto. Mu ramai kunanea e BAKOVI DAGI. 15 Mua, i uka ma mu ngaru ni ramai e BAKOVI DAGI, mu luhoi kamumu. E rei ngane mu gu ramaia? Mu gu kavurike a maka vure ranga ne huriki a gare ne mua o Mesapotamia? O mu gu kavurike a maka vure ranga ne huriki a Amor, ra mu made na malala ne ria ngane? Pali iau, turana a kabu nau, mete ge ramaia mete ge kavurike kunanea e BAKOVI DAGI.”

16 Lakea e huriki ri koli ri ta maea, “Mi koi hateka ni kavurike a vure ranga, mi gi kavurike kunanea e BAKOVI DAGI. 17 Ia kunana e BAKOVI DAGI a Vure ne mia, i bole mule mia turane huriki a gare ne mia na tahuna mi leho manga a vorakato o Egipto. Mi matai pali a maka nivakasiri dagi i rata. Na tahuna si laho polo vona a malala na kabu ranga, na tahuna si lakea na tabeke ranga e BAKOVI DAGI i matakari hita si laho kamumu. 18 Na tahuna si laho valai, e BAKOVI DAGI i vakatubu ni lili tala e huriki a Amor ra ri made muga koea. I mavonga, mia ranga mi gi kavurikea e BAKOVI DAGI. Ia kikeri a Vure ne mia.”

19 E Iosua i ratea ne ria a nita iea, “Pali iau a luhoi mua, i uka ma mu kara ni ramaia e BAKOVI DAGI. Re BAKOVI DAGI a narona i kamumu i malamala, i marikoi ne mua mu gu kavurike a vure ranga, bara mu rata mavonga i uka ma ge puga vuroki a nitagege, a naro hale ne mua. 20 Mua mu pea e BAKOVI DAGI mu kavurike a vure ranga bara i ngalahere i habi a vuranga ne mua. I muholi e BAKOVI DAGI i rata kamumu mua, pali na tahuna mu ngalahere vona, bara i ratapile mua.”

21 Pali e huriki ri takia e Iosua ri ta maea, “I uka liu, mi gi ramai kunanea e BAKOVI DAGI.”

22 Lakea e Iosua i taki ria, “Mua kunana mu puka tala a ngava pali, mu ta muholi mu gu ramai kunanea e BAKOVI DAGI.”

Lakea ri ta maea, “I muholi, mi ratea na ngavane mia a nita iea.”

23 E Iosua i ta tabu i ta maea, “I kamumu a ngava mu ratea. Ngane mu vuroki tala a maka vure na kabu ranga ri tabuli turane mua. Mu pulo a narone mua, mu lakea tabukoi ne BAKOVI DAGI a Vure ne hita a Israel.”

24 Lakea e huriki a bakovi a ngatavine ri takia e Iosua ri ta maea, “Mi ngaru kunana mi gi kavurikea e BAKOVI DAGI a Vure ne hita, mi gi ramai a maka vinara vona.”

25 Na parava iea kunana na tanga e Sekem, e Iosua i ratea tara ngava dagi turane huriki, i habi a maka vinara ne ria, i taki ria ri gi ramai. 26 E Iosua i here dili a nita nga na puhu i tabuli vona a maka vinara ne BAKOVI DAGI. Muri i bolea tara kedo i vakapesia na taruna a kai a ok, tabukoi na mailo ne BAKOVI DAGI.

27 Lakea e Iosua i taki e huriki i ta maea, “Na tahuna si masia a kedo iea, bara si luhoi mulea a ngava dagi si ratea. A kedo iea i longo pali a nita lobo e BAKOVI DAGI i taki. Bara i tabuli manga a kilakila ne vona ni bole mule a niluhoi ne mua, i uka ma mu gu longotaro a nitane BAKOVI DAGI ne hita.” 28 Muri e Iosua i tono e huriki ri vano, ri hamule lakea na malala takutaku ne ria.

29 Muri e Iosua, e tune Nun, a vora ne BAKOVI DAGI i mate na tahuna i tahoka a pida i ravulu mule na murina balaka taku a polona i ravulu (110). 30  * Ios 19:49-50 Ri tanua na malala vona na tanga e Timnat-Sera. Ra tanga iea i pesi na kupona na malala ne huriki a Epraim na tabeke mule sike na lolo e Gas.

31 Na tahuna i Iosua i tababana ni mahuri, e huriki a Israel ri ramaia e BAKOVI DAGI. Ri rata mavonga i harena na tahuna e huriki a matakari ri matai a maka maki e BAKOVI DAGI i rata ne huriki a Israel, ria ranga ri mate.

32  * Vuh 33:19; 50:24-25; Nim 13:19; Ion 4:5; Apo 7:16Na tahuna e huriki a Israel ri pea e Egipto, ri kaloho a tuhane Iosep ri tanu o Sekem, na tabekena malala hosi e Iakop i konea na moni silva i ravulu mule ma murina balaka taku (100) ne huriki e tune Hamor re tamane Sekem. Ra malala iea ngane, a malala ne huriki a hamone Iosep.

33 E Eleasar, e tune Aron, ia tara i mate, ni tanu o Gibea, ra tanga ni habi ne Pinias, e tune Eleasar. Ra tanga iea i pesi na kupona na malala ne Epraim.