1 Muri e Moses e Aron ru lakea ne Parao ru takia, “E BAKOVI DAGI, a Vure ne huriki a Israel, i taki go longo ne ria, ri gi lakea na tabeke i ngeki ri gi vasileki.”

2 Pali e Parao i koli, i ta maea, “E rei ra BAKOVI DAGI iea? Pali i navai ga longototoa ne mua a Israel mu gu vano? Iau i uka ma a lohoka vona a BAKOVI DAGI ne mua, i uka ma a ngaru mua mu gu vano.”

3 Lakea ru ta maea, “A Vure ne huriki a Hibru i bele ne maria. I taki maria miri gi tuli e huriki a Israel mi gi laho na parava ge tolu lakea na tabeke i ngeki, mi gi habi a nihabi ne BAKOVI DAGI a Vure ne mia. O longo ne mia mi gi vano. Mia i uka ma mi gi vano, bara i vakahale mia na gilanga dagi o na vabinga dagi.”

4 Pali a hariki o Egipto i taki e Moses e Aron, “I navai muru ngaru ni rata e huriki ri gi ha na leho ne ria? Muru tuli hamule ria na leho! 5 Ngane mu ala kupo hateka, mu ngaru ni hataro a leho ne mua.”

6 Na parava iea e Parao i vakuku e huriki a matakari na vorakato, i ta maea, 7 “Naha ni habi a varili ge kere ne huriki a Israel ri gi rata a brik, i manga a hini ri rata vakaroro. Ria kunana, ri gi vano ri gi bole a varili. 8 Pali mu taki ria ri gi rata a naguna brik ra ri rata vakaroro. Naha ni kali mule o ge popote a brik ri gi rata. Re huriki nga ri tuha malulu, lakea ri ngaru ni vano ri gi habi a nihabi na Vure. 9 Mu habi a leho ge kupo ne ria. Mu rata ria ri gi leho hateka, nahea ri gi longo mai a maka ngava taminga.”

10 Muri e huriki a matakari ri taki e huriki a Israel, ri ta maea, “E Parao i taki mia, nahea mi gi habi tabu a varili ne mua. 11 Mu vano mu matakana a varili, mu rata a brik ge manga a hini muga, naha ni rata ge popote.” 12 Lakea ri laho viliha o Egipto ri matakana a varili ri gi rata a brik vona. 13 E huriki a matakari na vorakato ri ta hinituhana ri ta maea, “A leho mu rata ge manga a leho mu rata muga na tahuna mi habi a varili ne mua.” 14 Lakea ri ubi e huriki a matakari ne Israel ni ru ri gi matakari a leho, ri ta maea, “I navai i uka ma mu rata a brik ge manga a hini mu rata muga?”

15 Muri e huriki a matakari ne Israel ri lakea ne Parao, ri ta maea, “I navai o rata maea mia? 16 Ra mia, i uka viri ge habi a varili ne mia, pali ni taki mi gi rata a brik. Ngane ri ubi mia. Mi uka a maregoa. A maregoa i tabuli ne huriki a viri vomu.”

17 Lakea e Parao i taki ria, “Mu tuha malulu! Mu kolomare mu ngaru ni lakea na tabeke i ngeki mu gu habi a nihabi ne BAKOVI DAGI. 18 Mu hamule, mu leho. A varili i uka ma ni gi habi ne mua. Pali mu rata a brik ge palupulupu manga a hini mu rata muga.”

19 E huriki a matakari ne Israel ri longoa a nitane Parao ri gi rata a brik ge manga a hini ri rata vakaroro. Ngane ri lohoka vona a maregoa dagi i bele ne ria pali. 20 Na tahuna ri pea e Parao ri vano ri matavisi e Moses e Aron ru dava ria. 21 Lakea ri taki e Moses e Aron, “E BAKOVI DAGI i matai pali a narone marua, bara i ratapile marua, a vuhuna muru ratea e Parao turane huriki a bolekori vona, ri luhoi mia ta mia a maki tavula. Ra marua, ngane muru vakarike a hatene Parao bara i rabalaki mia.”

22 Muri e Moses i lakea tabu ne BAKOVI DAGI i ta maea, “BAKOVI DAGI, i navai o rata hale e huriki a viri vomu? I navai o rudu iau a valai? 23 I vakatubu na tahuna a habi a ngava vomu ne Parao, i valai i harena mona, e Parao i vakavora hateka ria. Pali i uka ma o ratea tara maki ge tuhori ria.”