1 E Moses i ta tabu i ta maea, “Na parava ranga bara a bakovi ala rua ne mua a Israel, ru lakea na mari ni pelekado a maregoa ru gu pelekadoa a maregoa ne rua. Muri a mari ni pelekado a maregoa bara i matakilaka vona a bakovi i tahoka a rarenga, a bakovi tara i uka. 2 A mari ni pelekado ge taki ni gi lagu a bakovi i tahoka a rarenga. A bakovi iea ni gi lagu ge ramaia a naro hale i ratea. 3  * 2Ko 11:24Ri gi lagua balaka ravulu va kunana. Ma ri gi lagu balaka kupo hateka ge maruhu na matane mua.

4  * 1Ko 9:9; 1Tim 5:18 “Naha ni kolotata a ngavana bulmakau na tahuna i leho ni rata vuroki a vinina vit.”

5  * Mat 22:24; Mrk 12:19; Luk 20:28E Moses i ta tabu i ta maea, “Na tahuna a maki tari rua ru made vona tara malala, a viri tara ne rua i uka e tuna ga bakovi lakea i mate, e girihina nahea ge parangi lakea na kabu tara. E turana a bakovi i mate ge parangi vona. 6 A tabua na ngatavine ge podea ni gi gale ge tuna a bakovi i mate. I mavonga a hamona i uka ma ge lobo.

7  * Rut 4:7-8 “A turana bakovi i mate ge marikoi ni parangi vona a ngatavine iea, a ngatavine ge lakea na tanga ge matai e huriki a gare ge ta maea, ‘E turane girihigu i marikoi ni ramai a vinara, ge parangi nau ge vakabele a hamone turana, ma ge lobo liu na kabu ne Israel a hamona.’ 8 E huriki a gare na tanga ri gi gale vilia, ri gi ta turana. Ia ge tababana ni marikoi, 9 a havuri ge bele na matane huriki a gare, ge kali talea tara vahapolo ne turane girihina, ge kalupe tahoa a matana ge ta maea, ‘A rabu maea mi rata virihi a bakovi i uka ma i ngaru ni tuhori e turana ge vakabele e huriki a hamona.’ 10 Lakea mua e huriki a Israel bara mu galea a kabu na bakovi iea ‘A kabu na bakovi ni kali tala a vahapolo vona.’ ”

11 E Moses i ta tabu i ta maea, “Na tahuna a bakovi i ala rua ru vaubi, lakea e girihina a bakovi tara i tuhoria e girihina, i tuea a dolena bakovi tara, 12 naha ni dodoa a ngatavine iea, mu palakudua a limana.

13-14  * Levi 19:35-36 “Na tahuna a viri tara i valai na ruma vomu i kona a maki, naha ni pulo viliha a naguna maki mu habi. 15 Mu habi ge manga a naguna mu habi bala, i mavonga bara mu made tabaka na malala, e BAKOVI DAGI a Vure ne mua i taki ge habia ne mua. 16 E BAKOVI DAGI a Vure ne mua i marikoi a bakovi i rata a maka naro na taminga maea.

17  * Nim 17:8-14; 1Sam 15:2-9 “Mu luhoi mule a naro hale e huriki a Amalek ri rata virihi mua vona na tahuna mu pe e Egipto mu valai. 18 I uka ma ri mangenge na Vure, lakea ri luve na niane mua na tahuna i malulu pali a tuhane mua, ri luve valai muri, ri vaubi turane mua. Lakea ri rabalaki e huriki ri kodo ri laho muri. 19 E BAKOVI DAGI a Vure ne hita i habia ne mua a robo iea, bara i matakari kamumu mua mu made na nivalemu. Pali na parava tara bara mu rabalaki e huriki a Amalek i uka ma ni gi luhoi mule tabu. Naha ni longokaburungia a ngava iea.”