1 Qinée Yoohaneesa mi-ainainná qáfammasaafanausa kafáa maa-ainainná qáfeeqa. Qangiroo qaara faqa qaara faqa safása áti atisaa kikíqiqee máridaqa miqíqa máridaqa úfai maqásaa maqee maqee úqimari úfaina maqa máaqa mandáikianifee qímaseeqa úfai rafáaqafíisee máridaqa. Miqíqa máriafanoo sía úfai moó fannoo ooruku námmarisaa fee maqásaa fee saqárisaa fee sía fuaqéenoo. 2-3 Misá miqíqa márufaqa qinée qangiroo moó qáfaqiafana. Qangiroo moó fannoo súani óosana qáanaindari káqi márira Ánutuna ákarainaina úqirafa aniréenoo úfai rafáaqafímaru qangiroosa náaramásee qímanniminoo qinau. Ánutufa ínniara úfainnai maqá faqa ooruku námmari faqa mandáikamánnimaqaannee qifaqa éekaa káqikaa qóo káqi márifaqa qinée Ánutuna aináinira faiqiuqa níqinaaqa Ánutuna ákara rúmasaanaqa miqóo maqá faqa ooruku námmari faqa saqáriuqa faqa úfai quqásaifanoo firaaqóo úqinoo mandáikamánnimaqaani. Mi-qangiroofá miqí qímasoofaqa Ánutuna faiqi námu maqásaaqaraasa níqinaaqa ákara rúmasoofanoo moó fannoo ásaana rúmasee kooroomásee qímaqiminoo qinau.

4 Isaraeena áiku ásaukukiqari aiqáma moodáanaki quqáseenoo wan handaréeta faqa footi foo tauséenna faqa (144,000) fífau núkudara foorámmiqa máriqau. Miqímasee márunaki mi-namúsa kai níqinaaqa ákara rúmannimaqaseenoo Ánutunaindi márifanoo úfai fannoo sía náruanifeera rúmannimaqanau. 5 Isaraee máqaanna faiqi námu níqinaaqa ákara rúmannimaqaqoosa misá náadu náadu óosaa óosaa kai máriqau. Yudana áiku ásaukukiqari (12,000) tueerufa tauséenna moómoo Ánutuna ákara níqinaaqa rúmannimaqanau.

Reeubeenana áiku ásaukukiqari (12,000) tueerufa tauséenna moómoo Ánutuna ákara níqinaaqa rúmannimaqanau.

Kadana áiku ásaukikiqari miqí kai máseenoo 12,000 rúmannimaqanau.

6 Aseerana áiku ásaukukiqari miqí kai másee 12,000 ákara rúmannimaqanau.

Napatarina átiuqa márusa miqí kai másee 12,000 ákara rúmannimaqanau.

Mannaseena áiku ásauku márusa miqí kai másee 12,000 ákara rúmannimaqanau.

7 Simeeoona átiuqa márusa miqí kai másee 12,000 ákara rúmannimaqanau.

Reefina áiku ásauku márusa miqí kai másee 12,000 ákara rúmannimaqanau.

Isakeena átiuqa márusa miqí kai másee 12,000 ákara rúmannímaqanau.

8 Seeburuna átiuqa márusa miqí kai másee 12,000 ákara rúmannimaqanau.

Yooseefaana áiku ásauku márusa miqí kai másee 12,000 ákara rúmannimaqanau.

Beensaminna áiku ásauku márusa miqí kai másee 12,000 ákara rúmannimaqanau.

Miqímasee mi-qangiroofá Isaraeena áiku ásaukukiqari moodáanaki mara ruqáumáseenoo 144,000 fífau núkudara foora Ánutuna ákara níqinaaqa ákara rúmannimaqanau.

9 Qinée Yoohaneesa miná qáfamaseeqa quándaki qáfaafana moo súqirafa márinau faiqí ánaasee firaaqóo qúsimariqau. Sía faiqí moó fannoo nísaanarirana amaná moómoo uqanna máriqau. Misá aiqáma firaa máqannaasakiqari faqa káqikaa maqannaasakiqari faqa aiqáma fasiqa anaaseekiqari faqa aiqáma ufakiqari faqa Ánutuna qaarí óorinni sipsípa ánaaqi óorisaa aiqáma ufa qímarusa kikíqammafiqau. Misá qamunna éekara afisírausa aufaqáa saqari ásaana úqirausa Ánutuna óorisaa kikíqiqau. 10 Miqóo kikíqiqa máridaqa maaqí qímasee Ánutunara firaa kari qímamiqa qiqau. Maasá Ánutufa rakísira qaarisaa óoqumarifúananoo sipsípa ánaaqi faqa anísaaqaraaná kai maasá náaru márirana máraidaqee qiqau. 11 Miqí qímasoofaqa úriqararausa Ánutuna rakísira qaarí átimau fíqu fíqu iqá márusa faqa qaara faqa qaara faqa aandáu̱ márusa faqa márufaqa misá fíqu fíqu iqá máru qangiroosa misá kai maqásaa nóorindari áqufufaqa Ánutuna amooqíqa qiqau. 12 Kúqaa amooqírana faqa aréenarana faqa írirana faqa dúfi dúfi qírana faqa áuqu uqéerarana faqa úriqararana faqa afeeka faqa náaru náaru maasá Ánutunaindi kai máridaqa. Kúqaa fee qiqau.

13 Qaarí fíqu fíquqiranakiqari úriqarausakiqari moó fannoo quándaki qiní Yoohaneesa irámmirinoo qinau. Maa-fasiqa anaaseesá yáindaraasee éekara qámunna afisírausa aiqáma ufa qímarusakiqari aní máridee qufaqa qinée qiqíafana. 14 Sía qinée íridaqa anée qímaqimia qíafananoo mifá kooroo qímasee qímaqiminau. Maa-fasiqa anaaseesá Ánutuna ufamau fímarusa minásaara nárirana máree marusa minakíqari ámiqimasee ani márusa máridaqa. Misá nári ikairí ánaaqi qamunna sipsípa ánaaqi Yísuna fidíkaki nári qamunna nammáruqusee éekara arufifaqá afisúsee máridaqa. 15 Minára misá fáasaana faqa eendáki faqa Ánutuna náaquqara máqaki narí rakísinnimaqee maru qaarína óorisaa kikíqammambi eendáki faqa fáasaana faqa amooqídaqa. Qaarísaa márifa Ánutufa narí kai misá ititánnimaqaannoo. 16 Ititánnimaqaidanoo sía kafáa misá náara ráannoo, sía nammáriara nídiannoo, sía súani idídirafa nifaaqaí náruannoo. 17 Sipsípa ánaaqi rakísira qaari qámbaanai márifa mifá misá rakísirafa márinoo misá nífiqee múnusainaqa káqi márira nammari maqákiqari radíqisee ururée máriqoo neefáranoo. Ánutufa misá naukunu rukásaina misá ikíraqarafa taikáannoo.