1 Karaambáiqa Akaripaafa iriséenoo quándaki Pauroona qímaminau, Aneenná ufa qínaqa íria. Pauroofa miná iriséenoo ásauku uqéeraseenoo maaqí qímasee narúfa qinóonunara qinau.

2 Óo Karaambáiqa Akaripa, aní áfusaa ufa qíannanara dúfi dúfi qídaqa. Yuda máqannaasa qimoosáu máqee mária úfana qímamianaura. 3 Anée Yuda máqannaa máriana faqa misá óosana óosana ufa qímariana faqa anée írimarianafa márianaqa qinée minára aní ufa qímamirara dúfi dúfi fee qídaqa. Amanée anée qiní ufa íria. Aiqáma Yuda máqannaasa qinée kumaaráasaaqari fíndifuafannana írimariafanoo.

4 Qinée sía káqi nímarunausau máridau qeeqá maqúsaki faqa Yeerusaree máqusaki faqa máriafanausa márunaqa Yuda máqannaa minára faqa íridaqa. 5 Qinée Farisai ámaana ufa qímariafanausa márunaqa Yuda máqannaasa misá minára íridaqa qumeé ráidaqa. Farisai ámaana ufa qímariasa misá káaqa Ánutuna ufara afeekaíkimariasa máridaqa. 6-8 Qinée náaru kásooqaqee kambíqaaninna ainainara irimáree fídaqa. Óoqai Ánutufa maasá qikeekú qikaakúsaa qímafeekaíkunara qiní máqannaasa eendáki faqa fáasaana faqa Ánutunara innaaru qídaqa máridaqa. Kásooqaqee kambíqaaninna ainainara Ánutufa qímafeekaíkunara maasá irimáree fídaqa. Mi-ainaináfa ínaaqiana kambíqaaninnanara minára Yuda máqannaasa qiní qimoosáu máqaidaqa. Mi-ainaináfa Ánutufa kúqiranakinaana mara fíndifira ainaina miná máridanoo. Yuda máqannaasa nánaree sía íridee únna fee qídee.

9 Óoqai qinée faqa Yísuna Nasareetee máqusaindaraana áuqu taikáanifee qímasee qaini qáiniqa ímariqiafana. 10 Minára Yeerusaree máqusai óoruree aanáiqikirausa misá úriqararana ufa irisée Ánutuna faiqi námu moómoo rumbánnisee máriafanausa máridaqa. Miqímaqoosa akaqáusa nárufaqa qinée faqa dúfi dúfi ámiqimmiaafoo qíafanausa máridaqa. 11 Qinée Yuda máqannaa ufa suqíra máaqaki kéeqafufaqa Yísuna ufasáara nárimariafanausa máridaqa. Misá qumáreeqa Yísuna ufara minnísaaqee qímasee nárimariqiafana. Qinée misá minára firaaqóo áanoomaseeqa moo máqusai níanai fímariafanausa máridaqa.

12-13 Qinée Yeerusareenni óoruree aanáiqikirausa misá úriqararana pása mara máreeqa Damasakusa máqusai óoruree Yísuna ufa írimarusa rumbárara óoru fímariafananoo súani qámbaanai innaarúnaindari idáuru miqírafa súaniara foora firaatiá qiní faqa fusá aiqáma rafáaqafusanau.

14 Miqímasoofaqa maqásaa áqufuafananoo minakíqari ufa moó Heeburu úfakiqari maaqí qinau. Sauroo Sauroo anée nánaree qiní dárina nídanee. Qinée faaqaanánnai aní káqikaaqoo aní áfaaqai mundúnara anée aneenná kai faaqaana áaru̱ poodúqaani qíannana arumáraananoo firaaqóo áidafidanoo. 15 Qinée miqí qufaqa irámmiriqa qiqíafana. Óo Karaambáiqa anée yáfee qíafananoo mifá qinau.

Qinée Yísusa anée dárunausa máridaqa. 16 Dóo anée fíndifinana fúa. Qinée aníara qiní aináinira faiqikianneera aní áfusaa kooroo íqa. Anée maqee qáfaannanara faqa kásooqaqee kambíqaaninnanara faqa aiqámai qímannimianeera aní áfusaa kooroo ídaqa. 17 Qinée Yuda máqannaasaki faqa ánaamuru máqannaasaki faqa aní aqiqaanáura. Misá aní árirarifaqa rafáaqa fuanáuranoo. 18 Anée misá nífu maqannímaqeera foora asukunakínaana maréeqeenana káaqa qáranaki quqánnisáaneera, anée misá Sadannana rafáaqafiranakinaana maréeqee Ánutunaindi kíanneera, misá qiní saqárikiranannai misá numóo taikánnisaananoo Ánutufa narí rusandeesámumasainausaki quqásainaqa misá faqa minakí márifaranoo.

19 Óo Karaambáiqa Akaripa qinée aanásaa qífu pisipasamándai innaarúnaindaraa ainaina qáfaafanna ainaina sía mi-ufána rukíaafanausa máridaqa. 20 Indaarú Damasakusa máqusai óosana arasée Ánutuna fasáasa ufa qímannimiqiafana. Miqóoqari Yeerusaree máqusai faqa Yudeeaa máqa maaqai faqa ánaamuru márusa faqa qímannimidaqa maaqí qímasee qímannimiqia. Ínneeqa mandá nírana márirana nímeesuqusee quándakina Ánutufinai ubeekámafifaqa Ánutufinnai márirana nírana marasáinaqa kúqaa Ánutuna aanai ubeekámafiaafoo qiaqéera. 21 Minára kai qinée Yeerusaree náaquqara amaana maqaki márunaqa dáriraridaqa. 22 Ánutufa qiní dadaaqímarinara maqee ínni nífusaa kikíqiqa máridaqa úriqararausa faqa uréeqarausa faqa nífusaa Yísunara kooroománnimidaqa. Óoqai tamummáqara fasiqauqa faqa Mooseefa faqa qímarundee kaimmídaqa misá maaqímmiqau. Ánutuna ásauku mundírafa Yísufa teeroo firaaná máreeufanoo kúqinoo mi-kuqiránakiqari fíndifinoo fíndifirana indaarú níkamánnisaannoo. 23 Miqínnanannai ásauku mundírana Yuda máqannaa faqa ánaamuru máqannaa faqa maa-anutúna ufa fannoo qóomara fooqáana dóo ínnikina dóo aniréenoo. Misá miqí qímaqoona márifaqa qinée faqa minára kai qídaqa.

24 Pauroofa miqí qímasee naríara ufa qímarufanoo Feestusafa quándakufanoo fáaqa quqáseenoo qímaminau. Akasáa dóo anée fúrufarammiananoo. Aní írirana firaafá aní mandáinainaki afeéqamifana áqufuananoo.

25 Pauroofa miná iriséenoo maaqí qímasee qímaminau Óo Feestusa úriqararafa, qinée sía fúrufarau qídau miqídau. Nóori runúsee kúqaa ánoonainaina qímaria úfana qídaqa. 26 Óo Karaambáiqa Akaripa qinée aní áfusaa paasóosamasee maa-ainainnára kooroo ídaqa anée sía sía írimarianafa máriananoo, írimarianafa máriananoo. Anée maa-ainainná qáfaidana óonumafi írimarianafa máriananoo. Sía kukéeqaranaki maa-ainainnáfa márifa akooqóo marífa máridanoo. 27 Óo Karaambáiqa Akaripa anée tamummáqarausa ufa irisée kúqaa ánoona fee qídanee anée miqí qímarianaqa qinée íridaqa.

28 Akaripaafa mi-ufána iriséenoo Pauroona qímaminoo qinau. Anée maa-qusa ufánannoo qiníara Yísuna faiqikí quqée fee qídanee.

29 Pauroofa miná iriséenoo Akaripaana qímaminoo qinau. Qúsa ufa fee kísaaqa ufa fee sía qinée minára íridaqa. Qinée aníara faqa maa-qóo máridaqa qiní ufa írimariasara faqa innaaru qídaqa aiqámausara qinée ímarunandee íqa Yísuna saqari kiaqéera qídaqa, sáinandannoo rumbáqimaqarafa kai sía.

30-31 Pauroofa miqí qufaqa Akaripaafa faqa firaa kiapafa faqa Beeranisa námmarifa faqa fíndimeeqee ráudamaki fiqau. Fídaqa narí qímami narí qímami maaqí qiqau. Maa-fasiqáfa sía karabúsa ainaina qáfeemarífa sía kuqánnarira ainaina qáfeemarífa máridanoo. 32 Akaripaafa minára maaqí qinau Pauroofa narí sía Sisaana áuqureenoofau dóo idukíqini, Sisaana áuquramaseenoo sáina minni fúani.