Suha'na Paulus lako Jumaa' dio Roma
Bätäna issinna
Inde suha' natuli' Paulus napakatuam jumaa' dio kota Roma. Indo kota Roma mesa kota kasalle anna kaissangam yolona. Ia anna kaissanganni aka naongei ma'tadongkongam tomahajanna kahajaam Roma wattu eta too. Indo anna natuli'i Paulus inde suha', tä'pi deem lako Roma. Sapo' natuli' anna napakatui lako jumaa' dio Roma aka naua anna mala naissam tongam indo to matappa' dio pepa'guhuam illaam kasahaniam. Anna natuli' toi anna mala naissam to matappa' dio Roma naua: “Ma'pattujum Paulus la sule inde Roma napellambi'ikam.” Aka situhu' pattujunna la lempä salapi dio Roma ke le'ba'um lako Spanyol umbaba Kaheba Katilallasam.
Too'na issinna inde suha'na Paulus naua: “Illaam indo Kaheba Katilallasam dipa'paissangam lalanna anna mala mepomalolo Puang Allataala. Lalanna mepomalolo, tä' duanna tä' tallunna, anggam kamatappasam lako Kristus” (1:17). Diona indo too'na napomakaleso Paulus illaam inde suha'na, diua ingganna hupatau susi to Yahudi teem taianna to Yahudi sangngim pahallu napomalolo Puang Allataala aka sangngim nakuasai dosa. Anggam mala mapia sule kasilombunganna hupatau anna Puang Allataala, battu diua napomalolo Puang Allataala hupatau, ke matappa'i lako Yesus Kristus. Naua toi: “Taia kamanuhusanta lako Pepaondonganna Musa nasuhum napomalolokia' Puang Allataala, sapo' ia anna napomalolokia' aka kamatappasanta lako Kristus” (3:27-28). Napomalolongkia' Puang Allataala aka nasolongkia' Yesus Kristus wattunna anna matei yabo kaju sitambem (3:22-25, 5:8). Dadi, maka' takatappa'i Puang Yesus la naangkahangkia' Puang Allataala dio mai kakuasaanna dosa lambi' tä'ungkia' la nalambi' pa'tahungkunganna aka napomalolongkia' (3:22, 26; 4:24-25; 5:1). Iam too indo diuaam Kaheba Katilallasam!
Natuli' toi Paulus diona pattujunna Puang Allataala lako to Yahudi battu diua to Israel (hondongam 9-11). Indo to Yahudi pessubunna Abraham, anna ia siam puha napilei Puang Allataala la mendadi umma'na. Sapo' tappana mentamai inde lino Puang Yesus, tappa natumpu pala' buda to Yahudi. Dadi, taiam pole' umma'na Puang Allataala aka moka ungkatappa'i Puang Yesus (9:31-10:4). Tappana moka matappa', iya tibukkam pole' lalanna ingganna hupatau inde lino anna mala mapia sule kasilombunganna Puang Allataala. Dadi mala diua indo natumpu pala' to Yahudi, iya tibukkaa' kita pole' lalanta taiannakia' to Yahudi la ullambi' pa'tamba' kasallena Puang Allataala battu diua kasalamasam (11:11-15, 30-31). Ingganna ia too abana tisuha' loppo' illaam Battakada Debata (9:25-29; 10:19-21). Moi anna moka salapi ia to Yahudi matappa' lako Puang Yesus, sapo' tä' la moka liu (11:25-26).
Illaam inde suha', natuli' toi Paulus diona indo la sihatanna napogau' to Sahani, battu diua to matappa' (12:1-15:13), susinna: pahallu si'da-si'dakia' sikamase mesa sola mesa umba susi to siundu'-undu'; pahallu toi tapalako manappa pengkähängam puha nabeengkia' Puang Allataala; pahallukia' duka' manuhu' lako to ma'pahenta; anna pahallukia' untahima manappa solata to matappa' to malammapi kamatappasanna anna tä' mala la ussipengkaia' indo issi penabanna.
Lesoanna issinna
1. Kada passu'bä' (1:1-15)
2. Pungngu' tannunna inde suha' (1:16-17)
3. Ingganna hupatau sangngim madosa anna dihekem tä' malolo dio olona Puang Allataala (1:18-3:20)
4. Lalanna hupatau mendadi malolo dio olona Puang Allataala (3:21-5:21)
5. Kasilombunganta Yesus Kristus nasuhum lappa'ungkia' dio mai kakuasaanna dosa (6:1-8:39)
6. Pattujunna Puang Allataala lako to Yahudi (9:1-11:36)
7. La sihatanna napogau' to Sahani (12:1-15:13)
8. Napomasiä' Paulus kasuhunganna anna natuli'i inde suha' anna pattujunna la lako Roma (15:14-33)
9. Kada salama' sola katampasanna pepakilalaam (16:1-27)
1
1 Inde suha' buttu di kao Paulus mesaä' duka' sabua'na Kristus Yesus. Natuhoä' mendadi suhona anna natodinni la umpa'pakahebaam indo Kaheba Katilallasam buttu yabo mai Puang Allataala. 2 Kaheba Katilallasam ia too inna puha nadandi loppo'um Puang Allataala yolona napalombum ingganna nabi tisuha' illaam Suha' Maseho. 3-4 Inde Kaheba Katilallasam, Änä'na Puang Allataala diuaam, battu diua Yesus Kristus Debatanta. Di sesena mehhupataunna tihekem pessubunna Tomahaja Daud, anna di sesena menDebatanna anna kamasehoanna mannassa anna Änä'nai Puang Allataala, ma'tandaam aka puha dipatibangom dio mai alla'na to mate naponnoi kakuasaam. 5 Kahana pengkähäna Kristus napolalam napadokkoannä' lisu pala'ku Puang Allataala mana' pa'kamasena mendadi suhona la umpatette ma'hupatau, susi to Yahudi teem taianna to Yahudi, anna mala matappa' anna manuhu' lambi' dipa'kasallei sanganna Kristus. 6 Inde diuaam to matappa' anna manuhu', ikonna' too duka' to tihekem illaanna. Aka ikonna' too to puha ditambai mendadi umma'na Yesus Kristus.
7 Inde suha' kutuli' lu lako inggannakoa' to Roma to nakamasei Puang Allataala anna to puha napasähä' mendadi umma'na. Handandanni Puang Allataala Ambetaa' sola Debatanta Yesus Kristus la untamba'koa' anna namana' kamasakkeam sola kamasannangam.
Napemulu Paulus la lako Roma
1:8-15
8 Uhu-uhuna sihatam anna sipäto' ma'kuhhu' sumanga'ä' längäm olona Puang Allataala umpolalam Yesus Kristus, aka molele-lele lako lino diona kamatappasammua' lako Yesus Kristus. 9 Kupalako liu pengkähänganna Puang Allataala sola ponno penaba umpa'pakahebaam Kaheba Katilallasam diona Änä'na. Anna Puang Allataala muitaä' keta ma'sambajam oä' too kupa'sambajangam ongkoa' duka'. 10 Si ma'sambajam liuä' längäm Puang Allataala umba ke napoelo'i anna nabukkaannä' lalam la umpellambi'ikoa'. 11 Ia anna maelo' punalaä' la matim umpellambi'ikoa', aka maelo'ä' la kupasandaikoa' pa'mana' di ada' buttu di Penaba Maseho anna mala matoto' kamatappasammua'. 12 Ia anna ma'pattuju susiä', aka kuua anna mala sipakatoto'kia' mesa sola mesa ingganta to matappa' lako Yesus Kristus.
13 O inggannakoa' solasubungku, pahallukoa' kupaissanni kuua pembuda punalamä' ma'tamba la matim, sapo' sule lako temo buda liupi laba-labaangku. Maelo'ä' la matim anna mala deem buana pengkähäku illaam alla'-alla'mua', umba susi lako ongeam senga' deemmi buana pengkähäku illaam alla'-alla'na taianna to Yahudi. 14 Aka kusi'dingam kuua kaindangam lalam penabaä' lako ingganna ma'hupatau situhu' pa'padudunninna Puang Allataala lako kaleku, susi to Yunani teem taianna to Yunani, susi to massikola teem to tä' deem massikola. 15 Iam too kasuhunganna anna maelo' punalamä' la umpa'pakahebaam indo Kaheba Katilallasam illaam alla'-alla'mua' to tohho itim kota Roma.
Kaheba Katilallasam kuasa umpasalama' ma'hupatau
1:16-17
16 Kao-kao kukatappa'i si'da-si'da kuua inde Kaheba Katilallasam diona Kristus kuasanna Puang Allataala umpasalama' ingganna ma'hupatau to ungkatappa'i, mengkalao to Yahudi sule lako taianna to Yahudi. 17 Aka illaam indo Kaheba Katilallasam dipa'paissangam lalanna anna malai mepomalolo Puang Allataala. Lalanna mepomalolo, tä' duanna tä' tallunna, anggam kamatappasam, tä' deem lalam senga', umba susi puha tisuha' illaam Battakada Debata naua: “Iai too kusangai malolo iam too la untahima katuboam bakahu kahana kamatappasanna.”* Hab. 2:4.
Ingganna hupatau sangngim madosa anna tä' malolo dio olona Puang Allataala (1:18-3:20)
To tama'Debata la nahua aha'na Puang Allataala
1:18-32
18 Puang Allataala yabo suhuga umpahuai aha' lako hupatau to tama'Debata anna to kadake gau'. Aka tau susi ia too ma'gau' kadake liu, nasuhum indo gau' kadakena ullabai hupatau la muissam kaheba kamaloloanna Puang Allataala. 19 Setonganna kapaissangam diona Puang Allataala mala naissam hupatau, aka ma'kale Puang Allataala umpatitananni illaam penabanna ma'hupatau. 20 Pempom dadinna inde lino, mala ungkaleso manappa Puang Allataala hupatau. Moinna anna tä'i diita Puang Allataala, sapo' anggam diita pa'padadinna anna makalesom kapendebataanna anna kakuasaanna to la tontä liu sule lako salako-lakona. Dadi, tä' tia mala la naua hupatau: “Tä' kuissam diona Puang Allataala.” 21 Moi anna naissam siam hupatau naua: “Deem Puang Allataala,” sapo' tä' punala deem la naaku napa'kasallei anna napenombai anna tä' toi deem la ma'kuhhu' sumanga' dio olona. Sapo' buta hi pikkihanna anna anggam napikki' tää'na deem gunana. 22 Ussangai kalena manähä, sapo' setonganna to maho! 23 Moka umpenombai Puang Allataala to inna deemmi pempom dio mai anna la da'da' liu sule lako salako-lakona. Sapo' sanda-sanda bäbä hi tanapenombai susinna: tau-tau anna pa'pasusiam senga', deem ma'hupa dassi, olo'-olo' ma'bitti' appa'na anna susi toi tissollo'na dio litä', moi kela daa tä' ia la da'da' liu hupatau anna olo'-olo'.
24 Iam too kasuhunganna anna napäbäi bäbäm Puang Allataala untuhu'i kamohäeam sugali'na umpogau' gau' sessu', lambi' si sola-sola umpogau' indo dipa'kasihisanna. 25 Palla' ia penabanna hupatau deem siam Puang Allataala, iya napabala'i hi ia siam anna ia. Taia To ma'padadi napenombai, sapo' to dipadadi hi napenombai anna natuhu'. Moi kela daa indo hia To ma'padadi la sihatam dipuji anna dipa'kasallei sule lako salako-lakona! Abana inna la diua!† Abana inna la diua!: naua illaam basa Yunani, Amin.
26 Dadi, kahana inde hupatau untuhu'i kamohäeam sugali'na, nasuhum nalamba' bäbäm Puang Allataala lambi' napäbäi bäbäm untuhu'i kamohäeam sugali'na umpogau' indo la diposihi'na. Lambi' susinna baine taiam muane nasigausam, sapo' sabainenam nasigausam. 27 Susi siam duka' muane, taiam baine nasigausam, sapo' kende' lu lako hi samuanena kamohäeanna. Muane ia too ma'gau' dipomasihi'na sola samuanena nasuhum napalambi'i duka' Puang Allataala bala'na la sihatanna gau' kadakena.
28 Mane deenni, kahana mokam hupatau la umpengkalesoi manappa Puang Allataala, nasuhum illaam ia too napäbäi bäbäm Puang Allataala kadake pikkihanna lambi' umpalako gau' tala sihatanna dipogau'. 29 Anggam kende' illaam penabanna tau ia too ma'hupa-hupa gau' tää'na malolo anna kakadakeam senga'. Aka angga ma'podo kao, ma'penaba kadake, mailu anna matinna, angga maelo' la papateam, umpakende' kasipengkaam, manipu, anna si ma'pabali-ali kadake illaam penabanna lako solana. Susi toi angga untula'-tula' solana, 30 angga ma'pakolo'-kolo'i, ungkabassi Puang Allataala, moka umpehingngii pepatuduam, umpa'bahinni'i solana, malangka' penaba, anna ussanga-sanga kalena. Si manähä umpakende' kakadakeam, tä' manuhu' lako tomatuanna, 31 tä' naissam usse'la kamapiaam anna kakadakeam, tä' umpasule lako pa'tula'na, tä' deem pa'kamasena anna tä' pa'häntängam bua. 32 Tau susi ia too naissammi diona pahentana Puang Allataala indo naua: “To umpogau' gau' susi ia too la sipäto' dipalambi'i kamateam.” Sapo' moi anna susi, tontä liu siam ma'gau' kadake. Anna tä' angga mandi ia too, sapo' natilalla'ipi duka' ke deenni tau senga' umpogau'i kaha-kaha ia too.