1 Ang di tooltool yo ballingamim nga, kapalongo a awete betanga kasin pang. Ang ngan kin lomim modoko a katang le kasudungu tangini, yesoo so dook tiap moonoo la be pombe pang yang i. 2 Ngan so kiang dook mata yo ballingamim ye nga, ngan ben iminmin oo, inbe lonloningi kiang nga, ngan ben kuku itoto a dook tiap oo. 3 Inbe pat gol le silba kiang ngan ben giri isau ye oo. Nen le ye kene yo be Maro ikarata betanga kidi tooltool ye in nga, ngan giri ki tina ngan ole ipapos noonoo kiang lo mallangana, inbe ole ikan medamim dawa ben ei be ikanang nga. Ngan lal yo tana i be imot ye i, in iman potai oo, bong ang ngan katu ye winokanga balingi le so pang go.

4 Kakamata dook ngan! Di tooltool yo katar di a tiwinoko kaningi kanono ye kumu kiang nga, ngan kallung di le kakap pat ke urata kootoonoo kidi pang di le imot tiap. Ngan la titang pang Maro be iraua urata dook tiap kiang tina ngan kootoonoo pang. Ngan le tangini kidi tooltool ke winokanga kaningi tina ngan ilo le lo pombe pang ye Tool Mai yo gurana ki mai san le illos gurana ke so nga le imot i, in le ilonga ye talngana. 5 Ngan ye yepongo kiang ke tana i, in kanakana ngan kayimi so dook mata matana matana pang a be nen ngan ang tapmim lomim ponana ye, bong lomim tutu lal yo be Maro iyemenai ang ye, in tiap. Le ang ngan dawa ben di asara yo tikan kaiye so alunu mata le titup welewele, bong lodi galanga ye lal yo be tiraumata di ye i, in iman potai, ngan tiap. 6 Inbe ang ngan kakap di tooltool yo taukadi busunu nga, ngan a lo tikodo ye ni ke karatanga betanga, lo ngan be kallung pang di a tirau di a timmata. Ngan di tooltool tina ngan taukadi guradi be tikodokala dada dook tiap yo be kayei pang di nga.

7 Ang di diek nga, kin katemim malmal tarai ye urata moonoo yo be pombe pang yang ngan be, bong katoko too katemim inbe kakodo le kamede a kanam le lo Tool Mai imulu a isi. Ngan matamim too ye tool ke kapkingi. Ya in inam so ki tina yo ikapki ye tana ki nga le lo kanono imatu dook ngan. Nen le katen ro tiap, bong itoko too katene, inbe inama ki le imol a be nen ngan ikap ran pang so tina le lo itar kanono dook. 8 Ngan nen le ang lapau katoko too katemim, inbe kakodo le kamede a kasolo urata moonoo yo be pombe pang yang nga, yesoo lal yo be Tool Mai imulu a isi ye i, in iman potai oo. 9 Le ang di diek nga, kin kapasa mur ye di diemim be. Ole nen ngan tool ke karatanga betanga itarang lo kakodo ye ni ke karatanga betanga. Ngan tool tani in ya la nookoot nga man ikododo dada koonoo i.

10 Ang di diek nga, lomim tut ye di Maro koonoo yo muku ngan Tool Mai iwanga di a tipa be tikaua betanga ki pang di tooltool nga. Ngan di koi kidi tiyei dada dook tiap pang di, bong titoko too katedi, inbe tisolo urata moonoo tina yo pombe pang ye di nga. Nen le dada kidi yo tiyei nga, ngan ole iyei ben tarkilanga paidi be tatoo. 11 Ngan idi nga lod galanga nen, di tooltool yo tikodo le timede inbe tisolo urata moonoo dook tiap le lo imot nga, ngan Maro iyei urata dook mata pang di. Ang ngan o kalongo gasanga ke Yop oo. Le lomim tut, ya in urata moonoo alunu la pombe pang ye nga, bong ikodo le imede ye lono medana yo itaru i. Ngan nen le Maro iloni a iyei dada dook mata panga. Ngan nanga, Maro lono yo paidi i, in mai mata le ole ilonidi ye ke tina yo kanakana nga le imot.

12 Ang di diek nga, betanga medana atu yo be ipa muku ye betanga kapala i, in nen. Le be kawetewete nga, ngan kin kapootoo malala ke Maro, too so ke tana i, too so kapala edi a kapamede betanga ye, inbe kawete moolmool le ete be. Bong be moolmool nga, ngan kawete moolmool le iken leu. Too be tiap nga, ngan kawete tiap le iken leu. Ole nen ngan Maro ipaposang ye urata dook tiap kiang yo kayei nga, a be nen ngan iyemenai ang ye.

13 Kumata le ang tina ngan atu be urata moonoo dook tiap pombe pang ye nga, ngan ke be ipatarau pang Maro. Inbe kumata sei tool iyepe dook mata le be lon ponana nga, ngan ke be iwouwou woungu yo be iyitmaka Maro ene ye i. 14 Inbe kumata le sei tool be matamatenge ikauu nga, ngan ke be ikiu di kuto maimai ke di tooltool yo tigaua ye bareme ke Yesu nga, ngan a timan ye man tisalini ye kai olip surunu,* Ngan kai olip surunu tina ngan tikap ye puana. inbe tipatarau ye pang Maro be iloni. 15 Ngan kumata be titara lodi medana ye pataraungu kidi tina yo tipatarau ye nga, ngan Maro ole iyeie tool tani le tinini dook mata mulu. Inbe kumata be tool tani in iyei dada dook tiap sa ke noonoo nga, ngan Maro ole igiri noonoo ki tina lapau. 16 Ngan nanga, ang tina yo atu atu nga, ngan katulu noonoo kiang pang di diemim, inbe kapatarau pang Maro ye. Ngan Maro ole ilonang le tinimim dook mata mulu. Yesoo, pataraungu ke tool yo noonoonoo i, in gurana ki mai san ke be ilon di tooltool.

17 Ngan la matamim too ye Maro koonoo yo Ilia i. Ya in tool dawa ben idi nga, bong ipatarau le gurana be ki imol be. Ngan le Maro ilongo pataraungu ki tani le ki imol tiap ye rai tol inbe taudu limi be atu. 18 Motong la ipatarau mulu be ki imol, ngan le Maro ilongo pataraungu ki mulu a ki imol le kaningi le so yo ke tana i nga, ngan isupsup mulu.

19 Ang di diek nga, ngan kumata le ang tina ngan atu be iwala murini pang betanga moolmool ke Maro, inbe la ipa sokorai, lo ngan be ene atu ikauu a ipamule nga, 20 ngan ene tani in iyei dada dook mata panga. Lomim tutu betanga i: Kumata tool atu be ilono ene san le iyege dada dook tiap ke noonoo, inbe imulu man itoo dada ke Maro mulu nga, ngan dawa ben ene tani in ipamule ye matenge yo be igarungu i, inbe ya in iloni le Maro igiri noonoo ki le imot lapau.