1 Ngan yelei a patokongo le passakungu pombe kataunu kiang nga? Ngan dada dook tiap tina yo iken lomim nga, ngan la imadit be irautoo dada dook mata yo Maro lono be tatoo nga, ngan la le ang kaye di diemim kaparsu a kapattoko nga. 2 Au i awete nen, yesoo ang ngan lomim be le kakap so ke di diemim, bong o ke be kakap tiap. Nen le lomim be le karaumata di a timmata. Inbe ang ngan matamim gorengana ye so kidi, bong o ke be kakap tiap. Nen le kaye di kaparsu a kapatoko ye. Bong awete pang nen, ang ngan taukamim so yo nen nga, yesoo kapatarau pang Maro a katoru be ikap pang, ngan tiap. 3 Inbe ye kene yo kapatarau pang Maro be ikap so pang nga, ngan le ikap pang tiap, yesoo kakarata lomim dook tiap inbe kapatarau. Ang ngan lomim be le kakap so yo nen nga, a be nen ngan lomim ponana ye, inbe kagiri sokorai ye ang tapmim lomim.

4 Ang ngan dawa ben garup yo ikoo ye nintooroo, inbe la ipa a iyei dada dook tiap ke bauk i. Ngan nen le kapalongo; kumata tool atu be lono pang dada dook tiap ke tana i nga, ngan ya in lono pang Maro tiap. Inbe sei tool be iyei kale ye dada dook tiap ke tana i nga, ngan ya in iyei ben koi ke Maro. 5 Le Rau ke Maro iwete nen, be Maro lon pasakala Amunu Silene yo ikauu paidi a iyepe lodo i, be taparama ya taleu. Bong nga yelei, lomim tar be betanga yo nga o betanga sokorai, too? 6 Bong Maro lono paidi a iyei dada dook mata le ikenen leu paidi. Le ben tina Rau ke Maro iwete nga,

7 Ngan nanga, karaua pang Maro a katoo betanga ki, inbe kanganga tool kuto mai kidi so sadi i, ngan la be iyegang a ikoo nga. 8 Inbe kapa le kala potai pang ye Maro nga, ngan la be ya lapau ole iman potai pang yang nga. Le ang di tooltool ke noonoo nga, ngan kakatte dada dook tiap kiang. Ngan ole kayei dawa ben di sema tooltool yo tingas baedi a be nen ngan tinidi igalanga nga. Inbe ang di tooltool yo lomim rru ye dada yo be katoo nga, ngan kayege dada dook tiap yo iken lomim nga, a be nen ngan lomim iken galangana dook mata. 9 Ngan dook mata nen, be ang di tooltool yo kayei dada dook tiap koot nga, ngan lomim modoko ye a katang le kasudungu tangini. Inbe ang di tooltool yo nookoot ngan lomim ponana a kangele ye dada dook tiap kiang nga, ngan kaportak le lomim modoko ye a katang leu. 10 Kumata be ang tapmim katarang le kadu lopo ni ye Tool Mai matana inbe katoo betanga ki nga, ngan ole iyitmakang.

11 Ang di diek nga, kin kawete mur ye di diemim kapala be. Kumata tool atu iwete be ene atu in tool ke yeingi noonoo le dook mata be Maro iyemenaii ye nga, ngan tool tani in iwete mur ye ene san in leu tiap, bong iwete mur ye ger yo Maro ikap paidi, ngan lapau. Le ya in dawa ben ikaua malala ke ger tina. Inbe kumata le be ang ngan kakaua nene nga, ngan ang tapmim ngan kayepe parmana tiap, bong kayei urata ki. 12 Ngan Maro ya taleu la ikap ger tina ngan pang di tooltool i, inbe ya taleu la iyei tool ke karatanga betanga kidi i. Inbe ya in la ke be ikap di tooltool a ipamulu di ye so dook tiap yo be igarung di i, inbe ya in la ke be igarung di lapau i. Bong ong in tool belei a le kuwete mur ye em a kuwete be nen ngan dook mata be Maro iyemenaii ye dada dook tiap ki yo iyei nga?

13 Ang kapala ngan kawete nen, “Katai too bongbong nga, ngan ole takooi a tadu ye malala mai ni a du tayepe ye rai atu, inbe tayei urata yo be takap pat paidi ye nga.” Kapalongo, 14 ang ngan kawete betanga nen, bong lomim galanga ye so yo be pombe pang yang bongbong, ngan tiap. Ngan yepongo kiang ke tana i, in dawa ben ei kutana yo ikut a iken kasin lo ngan be palbe leu be ilene le ipa so i. 15 Le kin kawete nen be, bong ngan dook mata be kawete nen, “Kumata le Maro lono be tayei urata i, ngan la be tayepe a tayei urata tani in nga. Bong be tiap, ngan tiap.” 16 Bong ang ngan kawete nen tiap, nen le katiki a kayitmak emim, inbe kawetewete ye soo urata yo lomim be kayei nga. Ngan dada yo ke tikanga i, in dada dook tiap ki taunu. 17 Ngan nanga, kumata le sei tool lon galanga ye dada dook mata atu be iyeii, bong le be iyeii tiap nga, ngan ya in iyei noonoo.