12
Ya a-appeh David ni kameunnudin gitalah ni meidwat etan ni kamengipappangngulun a-appeh
1 Apu Dios, baddangi dakemi anhan, tep iyyadyan hahhakkey ida law hu makulug ni kamengu-unnud ni hi-gam. Endi hakey ni dammutun pandinnelan, tep wada hakkeyey maitek ida.
2 Anin ida etan ni nantatakdul baley da et ida kamanhinlalangkak. Ma-nud hinangga da, tep kakkayyaggud hu daka e-hela, nem ya kakulugan tu ey lawah hu wadad nemnem da.
3 Paineng mudda humman ni tuu et isiked dan mampahhiya
4 tep kanday “Han-ipahding tayu hu hipan pinhed tayu, tep mahepit itsu. Endin hekey hu tuun an mengippeinneng ni hi-gatsu.”
5 Nem kan Apu Dios ey “Inang-ang ku hu kapanligligasiddan anggehemmek niya newetwet ni tutu-u ey dingngel ku palak da tep ya kapehding ni edum dan tuun hi-gada. Et humman hu, um-ali-ak et ihwang kudda, tep humman hu nebayag ni daka hehheggedan pehding ku.”
6 Emin hu muka e-helan pehding mu e Apu Dios ey kaum-amnu, et mukun endi dewadewad hipan muka e-hela. Kamei-ellig etan di silver e hedin ineyug ni nangkappitu, man nemahmah law hu kametdai.
7-8 Nem anin ni attun bebley et dakel ida hu tuun ebuh hu lawah ni pinpinhed dan pehpehding ey katettebaladdan edum dan tuu. Et humman hu, ipaptek dakemi anhan ni tuum ni kamengu-unnud ni hi-gam e Apu Dios ma-lat meihwang kamin ingganah di hipan lawah ni daka pehpehding.