Psalms
Ya meippanggep nunyan libluh e Psalms
Huyyan libluh ni Psalms hu neamuamung ni a-appeh ni intudek idan Hebrew ni kamengullug nan Apu Dios. Huyyaddan a-appeh ey meussal ni penaydayaw nan Apu Dios niya umbaddang idan kamengullug ni menaydayaw niya mengu-unnud ni hi-gatun kewa-wa-wa.
Huyyadda kaia-appeh idan Hebrew ni daka keemmungin menaydayaw nan Apu Dios. Ya edum idan nunyan a-appeh ey daka iddasal ni daka pambeggain Apu Dios ni baddang ma-lat baddangan tuddad ligat da (Psalms 55) winu ma-lat peyaggud tudda hedin ida kamandedgeh. (Psalms 6 et ya 41) Yadda etan edum ey a-appeh ni tuun Apu Dios ni pantuttuyyuan tun liwat tu. (Psalms 32, 38, 51 et ya 130) Ya edum ey a-appeh ni penaydayaw nan Apu Dios. (Psalms 113, 117 et ya 145–150.) Ya edum ey tugun idan kamengullug nan Apu Dios et ya elaw ni pambi-biyag da. Ya edum ey peamta tu impahding Apu Dios ni nengihwang idan tutu-ud buhul da. (Psalms 18, 81 et ya 107)
Wadadda mewan edum eyad libluh ni Psalms e tuka ene-ehhela hu elaw Jesus Christo et yadda pehding tullin ellian tud puyek, ma-lat peang-ang tu e hi-gatu hu pinilin Apu Dios ni Patul niya mengippaptek ni tutu-u, niya metegguan alid katey. (Iingngeh yu Psalms 22 et ya Acts 4:25-27, 13:33-34) Hi Jesus Christo hu pinutuk Apu Dios ni mei-appit tep ya liwat tayu. (Psalms 40:6-8 et yad Hebrews 10:1-10) Inhel mewan Apu Dios e hi Jesus ey mambalin ni Eta-gey ni padi. (Psalms 110 et yad Hebrews 7:17-21) Hi Jesus hu kei-elligan ni ‘batu’ ni pinilin Apu Dios. (Psalms 118:22-23 et yad Matthew 21:42)
Ya Nemangulun Nunyan Libluh e Psalms
1
(Psalms 1–41)
1 Man-am-amleng ni peteg ida tuun eleg da u-unnuda hu kaittugun idan lawah ni tuu. Eleg ida mekikkillaw idan nunman ni eleg mengu-unnud nan Apu Dios ey eleg da iu-unnud di daka pehding.
2 Tep ya ngu daka pan-amlengi ey ya daka pengu-unnudin tugun Apu Dios et kewa-wa-wa niya kahilehileng ey humman hu daka ilillingisin eddaeddalen.
3 Ya pambalinan ni daka pehpehding ey panyaggudan ni biyag da et henin etan ni keyew ni simmemel di gilig ni kulukul e eleg mekling niya makallameh.
4 Nem beken ni hanniman hu meippahding idan tuun lawah daka pehding, tep heniddalli ngu degin metel-ap et ihuyaw ni dibdib.
5 Et humman hu, yallin kedettengan ni panhuwetan Apu Dios ey eleg tu hehmekadda humman ni tuun lawah daka pehding niya eleg ida mabalin ni mei-dum di tutu-un kaebbulutan Apu Dios.
6 Em, mebahbah idalli lawah ni tutu-u, nem hedin yadda etan tutu-un kamengu-unnud ni tugun Apu Dios ey ippaptek tudda.