1 Na Foruini iyanu naiye Dimodini uwama abake arie wake weaisu. Nama Yesu Kerisonu irau wake weibisara ibake na ana ebaro odiakaro ibine.

Fairimoni, yewa owaowa mufakuie kakuake ea. Ae, iya ukaisi demui waiya ukaku mi. 2 Enoba yewa owaowa aini anu uwararo ku uke ibaada Godi imukaisa orouini i moi aweka una Afiaini Yesu Kerisonu moi meremere mi ari mi Ekifasini ya orou yaisinabake arie wake weaisua eawe.

3 Babae Godini iyanu Dai Waria Mi Yesu Kerisoini emuama a irauaiai unu kofisike emenu irau ukeka mafisiro me irauaiai mane ibifane ibake weakune.

4-5 Fairimoni, ae Yesu Kerisoini Godi imukaisa orouini emuabake imukari ukakunero moi orouma eno weisaro na naue ibake Godibairo guriguri ukaada we ma irauaiai ukakune. 6 Nanu ararae ama anu imuka yaisina Yesubairo odi ibai imusu oroubairo wefaro emuama naufisake i irauaiai eraerabusa Yesubairoma iyabairo faraku ibai yaisina iwoka sinenewaa ufisane ibake aine wai ure Godibairo guriguri ukeibakune. 7 Naiye, anu imukari ukeka ima i moi orounu Godi imukeka imuka ma irauaiai ukaku ibake nanu imuka irau ukaada rooro daiwere ukakune.

8-9 Anu imukari emebairo ukaku ibaibake nanu eenu weeka wake wemane weakune. Nanu ararae Yesu Kerisonu ibiro buna ukaada wemau i deima idua wemauro enaenari ufaku. Nono abake imukari ukaada ibake buna wake da wemauke owainanaku eenu wake mane wemauro naufaku. Na Foru nae ofe iiri mi, nae Yesu Kerisobake weisake ana ebaro odiakaro ibine. Enoya nanu eenu weeka wake wemaro a naua.

10-11 Onesimasi dawae nanu amara ubi ariba ibake weakune. Nama ana ebaro ibaada dawabairo Godinu wake wero nauike awoena adara mi ari eno sini ibake nae danu babae ari eno sine. Adinaro dawa abairo ibaadae waiya ukenewaa daukeibi. Nono awoenae aini naini uwabairo danu imukeka waiya ukenewaa ufeku.

12 Nama dawa we odaimauro abairo aafekuie nanu imukaini abairo aafekuke ibifeku. 13 Nae Godinu irau wake we ibake ana ebaro odiakaro ibine. Enoba yewa mima anu orofa mufike na unu kofarine ibake eno we imukakune. 14 Eno we imukakunekema nono na arara me ama nanu imukeka waiya ukeka. Nanu ararae anu wefaku wake naumauie idua irau. Enoba na arara me nama a eno ua weekaro ukeka. Enoba nanu ararae anu arararo aneme aneme ufaku i deima idua irau.

15 Enoya imuke ea. Dawae a mediaike fema aniba ibake awoena deima abairo ba idua ibifeku. 16 Adinaro dawama Godinu wake nauiba ibake dawae nanu naiye mi ari eno. Adinaro dawae anu waiya ukeka mi mane, nono awoenae dawa anu waiya ukeka mi mane mero dawae anu naiye. Nono abairoe adinaro dawae anu waiya ukeka mi nono awoenae dawa Godinu wake nauiba ibake dawae anu waiya ukeka mike nono anu naiye.

17 Nae anu naiye imukakunaraba ibake dawa abairo fafekuie nabake aneaneme ukaku dawabairo enaenari uake dawa we mua. 18 Dawa adinaro abairo ibaadae aneme meramawere uike anemerabu waira ui ibai na yainaro naumake dawa ma wiroma. 19 Nae yaisina abake moko mamauanea ba weakune. Yewa owaowae nanu wanama uke odakunea ea. Nama a Godinu wake wero nauike awoena mi ari siniba ibake nabairo aneme moko mafarakuke anu imuka yaisina nabairo odifaku? Ibai imuke eake yewa nanu we odaisakune mi ama we mua.

20 O naiye, nanu weakune wake i ari eno irauaiai ua. I mi iyanu Dai Waria Minu ibiro mufakuie nanu imuka irauaiai sifekuro Yesu Kerisonu ibiro we ma irauaiai umane ibake weakune.

21 Na iwoka nanu wene ibaini moibaini ufaku ibake yewa owaowa yanake odakune. 22 Moi aineka ooru nabake uke bou ua. Ama Godibairo nabake guriguri ukaku ibake abairo aamane imukakunea.

23-24 Efafarasi dawaini naini uwae Yesu Kerisobake ana ebaro demuiro ibinisu. Enoba dawama abairo arie wake we odaisaku. Makini Aridikasini Dimasini Rukini i orou yaisina naini demuiro waiya ukaisi. I orouini emuama abairo arie wake we odaisaisa.

25 Iyanu Dai Waria Mi Yesu Keriso Dawama a irauaiai unu koreimine ibake weakune. Nanu wake idua me sininu.