Jon Uqa Jaqec Je Lecisdoc
Jaqiaden
Aqunec Je
Tamanec agena cofadec matu dana oso uqa jaqec je i jaqen. Dana i uqa Aposel Jon. Dana mati age Jon uqa tamanec osona dana cajaca jaqiaden ec cisdogina. Jon uqa age nalug mecebmecebecnuca, uhulec iwaladec jenu ulauladecnuca jaqiaden.
Je Dunuhnu Dado Mec
1. Feele adec je (1-3)
2. Nalunuga mec kobol eu kobol cunug wooldona (4-6)
3. Uhulec iwaladec jenu ulauladena (7-11)
4. Cit qoc je (12-13)
1
1-2 Ija tamanec agena cofadec matu, ija caja Anut nesili ehudenca uqana melca* Dana leih age “caja Anut nesili ehuden” uqana gug eu tamanec oso, odocob “uqana mel” uqana gug eu tamanecna dana cajaca ec cisdogina. Euqa dana leih age Jon uqa caja oso jaqiton ec cisdogina. jaqiadigina. Ija mele bahic agenu nalunuga migina. Ija himec agenu qee nalunuga migina qa mele je eu egeca gabandoc bilina, eu egeca gabandu bileceb catanigian eunu cunug age mele je dogina ageha agenu nalunuga megina. 3 Anut ege Memigeca Jisas Krais uqa Memige Melahca ale eelgec uum igecca, wawala qocca, malol bilecca iguwasan. Odocob ege mele jeca nalunuga mecca gabandu bileqan.
Ege nalunuga mec kobol gaid toodoqale
4 Agena mel leih age mele je eu toodogina eu odi Memige Anut ege odocnu magenwe ec dah mimig geh bahic ceelem. 5 O caja, qila ege nalug mecebmeceboqale ec ninihigina. Ija je gagadic haunnu eu odiwe qee jaqihigina. Euqa je gagadic hahawan saenna om qila hewoqona eunu ija jaqihigina. 6 Odocob nalug mec eu odi. Ege Anutna je gagadic eu toodu odeqan. Je gagadic eu age hahawan saennadec dah mein eu odi, age nalunuga mec kobol toodoigale.
Ege Kraisna mele je gagadic hewoqale
7 Ge, uhulec dana mati bahic age maha cunugna beladein. Dana eundec age Jisas Krais uqa dana deweg calen ec wawaga qee meleena.† Age je 1 Jon 4.2na nijia eu feiga. Dana eundec oso eu uhulec dana, eu Kraisna cad. 8 Agedodocnu cofdoigale. Gadgad age ceteh ocnu cabi gagadic oin eu culuwainnu qa age ameg me bahic eu am bec oigale. 9 Oso uqa aquniadi nuina, odocob uqa Kraisnu je iwaladecca gabandoc qee bilina eu uqa Anutca qee bilina. Euqa oso uqa Kraisnu je iwaladecca gabandoc bilina eu uqa Memige Melahca aleca bilina. 10 Eunu oso ageca humei uqa je iwaladec eu qee ehi hocobfi age agena jona cain ehudi lowain, odocob age cain feele dowain. 11 Ge, oso uqa dana eundec feele dona eu uqa dana eundec age gami qisol mec cabi osina.
Tamanecna cofadec uqa tamanec eu feciadecnu gale don
12 Ija je jaqiadecnu geh bahic nijia qa ija bagacna jaqiadecnu qee gale tena. Euqa ege gabandu geh bahic ceeleqannu ija ageca limig feciadecemin age gami je madeqan ec cisdugina.
13 Age caja cotoga Anut nesili ehuden eu uqana mel age feele adegina.‡ Age je 1-2na nijia eu feiga.