Pol Uqa Jaqec Je Lecisdoc
Timoti Jaqiton
Aqunec Je
Timoti uqa Pol cabi hijag, eunu Pol uqa Timoti kobol me toodu odocnu ihacdugiannu jaqec je i jaqimei sulduton. Saen euna Pol uqa uqana waug meleecnu gihacdoc jona bilen. Pol uqa Timoti me je cofdu cuhadugian (1.14), uqa uqana waug meleec eu hewi daugdumei toodu odigian (3.14), odimei uqa me je gaidgaid qasali maadigian (4.2) ec madona. Odimei culumen eu Timotica hocobfi Timoti uqa Pol osoben sol jeli gahidugian ec madona (1.8, 2.3).
Pol uqa ceteh ben osonu Timoti ulauldona. Timoti uqa je caunca qee dana leih gauc togodogina eunu qisacdu biligian (2.16). Agena je eu isoh alal donawe odi odona eunu. Eu Kristen agena wawaga meleec me qee mudigiannu odona. Euqa Timoti uqa Polna waug meleecca, uqana waug susumulca, uqana nalunuga mecca, uqana waug duuec tawecca, uqana deweg tudocca eu wele fen. Eunu Pol uqa Timoti Polna me coboc toodu cobigiannu cesusdona (1.13, 2.2, 3.10).
Je Dunuhnu Dado Mec
1. Aqunec je (1.1-4)
2. Pol uqa Timotinu cisdona (1.5-14)
3. Pol uqana bilec eunu madena (1.15-18)
4. Pol uqa Timoti adi biligiannu madena (dac 2)
A. Uqa gagadic tawigian (2.1-13)
B. Je caunca qee eunu qisacdu biligian (2.14-26)
5. Deel cit qocna kobol me qee mati caloqagannu ulauldona (dac 3)
A. Saen me qee caligian (3.1-9)
B. Ceteh me qee adi cilehadigian (3.10-17)
6. Pol uqana odio ec je (4.1-8)
A. Timoti uqa Anutna me je gaidgaid qasali maadigian (4.1-5)
B. Pol uqa ameg me bahic ugian (4.6-8)
7. Polna inondoc jeca, feele adec jeca (4.9-22)
1
1 Ija Pol, ija Krais Jisasna aposel. Anut uqana gale docna ija aposel miten. Ija cebac bilec Jisas Kraisnadec egeca hona eu uqa ege Jisas Krais gabangec biluquna igigiannu wele magen eunu silig sildiadecnu cabi dewenina men, eu ugina.
2 Timoti, hina ija melami bahic, ijana jaqec je i jaqihigina. Anut ege Memigeca egena Tibud Jisas Kraisca ale eelgec uum igecca, waug qocca, malol bilecca ihesiale.
Ele me jenu majanile cain leiaun
3 Ija Anut cewel utugina, jajanileilha age Anut cewel utoloigwe ijaha wawi cataniecca cewel utugina. Ija Anut inondudu gaid cishimig hinanu hetaga dugina eu odi ija Anut cewel utugina. 4 Ija hina amulin nec eunu cisdumig ija wawi ceeligiannu hina li mecihecnu witic cahinegca wawi ben hoolena. 5 Ge, hina wawin meleecnu cisdugina, eu wawin meleec bahic. Wawin meleec eundec wele asin Loisca anin Junisca alena bilen. Qilaqa hinana bilina eu mele bahic dugina. 6 Eunu ija hina dahin hewigina. Hina cabi ocnu duman Anutnadec ija ebeni ilom tatacan mecna ihem, eu tulidocob cebac biliale. 7 Ge, Kis eu Anut ege igen eu kis cucuianca eundec qee. Kis eu uqa kis gagadic codocca, nalug mecca, uqa odigeceb egedodoc tutuc moqona.
8 Eunu egena Tibudna me je dana cajaca qasali maadecnu majain cain heiaun. Odocob hina ija qila Jisasnu gihacdoc jona biligina eunuha majain cain heiaun. Euqa hina ijaca culumen lec Jisasna me je maadi cobowona eunu dewenilena hona, eu osoben sol jeli gahidocnu cain culugaun. Ge, Anut gagadic odoc ihina. 9 Cahahalen eu uqa, uqaha uqana cabi gun bahic ocnu utalen. Eu odilen qa eu cabi oso ooh eu ameg ilecnu qee qa uqadodocna cisdocnuca, uqa waug elenu uum ilecnuca eunu odilen. Uum ilec eu wele bahic gug qoc saen qee calec Anut uqa ele Krais Jisasca gabandoc ilen. 10 Odocob qila uum ilec eu egena Cahahagec Krais Jisas cali hon euna camasac men. Ge, Jisas uqa cal mec uqana uen tolon, uqa cebac bilec catanec eu me je maadecna camasac muden.
11 Uqa me je ina cabinu ija je qasali maadec danaca, aposelca, iwaladeccanu doot qiten. 12 Eunu ija qila saen ina deweninu sogoigina. Euqa age oditegina eunu ija majani qee tel. Ge, ija innu wawi meleen nijia, eu dugina. Uqa me je cabi ija ebenina men eu cofdutecnu ihoc, eu li deel cit qocna cabi eu gaid me biligian eu du cuhadugina.
13 Mele je ija iwalhecemin dom eu amenna tataweb fifi toodu iwaladagale. Odimeg wawin meleecca, nalug mecca eu egena Krais Jisasca gabandoc biluquna euna biliga. 14 Mele je eu ceteh me bahic Anut hina ebenna men eu hina Kis Gun, ege dunuhna bilina, uqana gagadic odocna eu cofdu cuhadogale.
15 Hina dogona, Esia mahanadec eundec cunug age ija hibemtein. Age eundec leih Figelusca Hemogenisca.
16 Euqa saen mati Onesiforas uqa cesultec je madecna wawi duuen. Eunu Onesiforas uqa aideg talaculca gami Tibud agenu waug qoiale. Ija gihacdoc jona bilem eu uqa qee majag dol. 17 Euqa uqaha Rom ono calimei ija megiti cocobi lili gulucten. 18 Tibud uqa uqanu waug qoc eu cit qoc deelna utiale! Uqa wele Efesas ono bibili me oditen eunu hina du cuhadogona.