3
Naiꞌ Paulus nafeek he nreek naiꞌ Timotius he nnao neu Tesalonika
1-2 Hi mihini te, noo goah! Neon goes ii, oras hai misaitan ki mbi naan, ka natuik ma natai fa nok hai romim. Hai neekm ein anmariin anmaten he iim amkius ki, mes ka njair fa. Aꞌroo-ꞌroo te, hai ka mibeꞌi mtein fa goen, etun hai mifeek he mreun naiꞌ Timotius neit inkius ki. Mes au ꞌok naiꞌ Silas mibaar ambi kota Atena. Naiꞌ Timotius naan, hai aom-bian. In reꞌ naan, hai partei ja nbi mepu reꞌ hai mibua oras hai minaob Yesus Kristus In Rais Reko. Hai mreek ee neit he in nanoniꞌ ki ma nhaꞌtain ki, he hi rais pirsait meu Uisneno naan naꞌkiiꞌ ma naheer antein.✡ Haef ein sin Retaꞌ 17:15 3 Nok ranan naan, karu hi mipein susat, hi neekm ein naan ka naꞌoin ein fa. Ampooh ma mnaaꞌ miher-heran hi rais pirsait naan. Fin hi mihiin mak, apirsait ein neun Kristus, ro tebes of napenin susat on reꞌ naan. 4 Neon goes ii, oras hai mok ki feꞌ, hai mimnaub main ki mmak, tuaf-tuaf reꞌ npirsai neu Usif Yesus, of napenin susat humaꞌ-humaꞌ. Oras ia, areꞌ kanan susat naan, anjarin nrarin, aiꞌ on mee?
5 Natuin au ꞌsusa ꞌmaet ꞌok hi ꞌtokom ma hi ꞌhakem, es naan ate au ꞌreek naiꞌ Timotius neit neu Tesalonika, maut he hai mipein hanaf nak, hi mpirsai piut feꞌ meu Uisneno, aiꞌ kaah. Natuin au neek ii nabait imsaꞌ, kais-kaisaꞌ niut reuꞌf ein sin aꞌnaak kouꞌ goe neem ma nfuir ki he hi maikoit Uisneno. Karu njair on naan ate, hai mepu neno naan, ruum am parsuum!
Naiꞌ Timotius nfain neem ma neik hanaf naꞌko apirsait ein abitan Tesalonika
6 Oras ia, naiꞌ Timotius anfain neem een naꞌko Tesalonika, ma neik hanaf reꞌ nhariin kai. In nareet am nak, hi mpirsai piut meu Kristus, ma mmaneek piut. Rarit in natoon am nak, hi mimnau kai msaꞌ, on reꞌ hai mimnau ki.✡ Haef ein sin Retaꞌ 18:5
7-8 Aok-bian arki! Maski hai abit ia mnaben maꞌfenaꞌ natuin hai mipein susat humaꞌ-humaꞌ ka kreꞌ-reꞌo fa, mes naiꞌ Timotius in neik rais haan maut batuur-batuur neu kai. Natuin rasi naan, oras ia hai mihiin mak, hi mpirsai Uisneno piut-piut ma mmafuut reko mok Ne.
Naiꞌ Paulus anꞌonen anteek too sraniꞌ abitan Tesalonika
9 Onaim hai misaeb sukuur makasi kouꞌ-koꞌu meu Uisneno nok neek marine, natuin hi mituin Ee piut. 10 Hai mꞌonen fai-manas, he reko te, hit arkit bisa tateef attein. Hai he minoniꞌ minokab ma mimtisib meu ki Uisneno In raan aꞌhonis.
11 Hai mharap ma mifnekan hai teenb ii meu hit Amaꞌ Uisneno, ma hit Usiꞌ Yesus Kristus, reꞌ anfei ranan, he hai iim miteef mok ki mtein. 12 Hai mtoit he Uisneno nmepu nbi hi neekm ein he hi rais maneekt aan nanaob on piut. On naan amsaꞌ, mok hi aom-bian sin ok-okeꞌ, on reꞌ hai mneek ki msaꞌ. 13 Nok ranan naan, Uisneno nhaꞌtain ki, he mmoin nok neek amneꞌo ma kninuꞌ, tar antea Usif Yesus ankoen On anfain neem nok Iin na, hi mhaek mok amsaꞌ ambi hit Ama Uisneno In human ma In matan, ma hi ka misaah ma mroi meik fa sanat meseꞌ msaꞌ.