Filemonrhu gontwat
Porr dwandfakhato htafmot
Barkof kfo nuhas mrokfom
Ndar gontwat Filemonrhu yufatpno yimo gontwayet. Filemonr Kolosithu Kristen yimayer. Filemonr tohmohat wom slefr kakitohmour. Nd yimarhu yufat, Onesimusr. Wom yiha nd yima Onesimusr, turhu tohak yimarpno wom nefm na tanyhato Romko fakrmenimor. Romko yakrmanyihato ndko tohmor.
Wom yiha Porr ndha Romtn kalabus tohetrn rorpno mfnahmor. Rorpno mfnahhato kfo ptha dbrufmorm ror na tanyuk nefm. Porr wanyhato Bro Nkifrarpno kfo bruttnamotrr be nd duka krho hasomo yima yuhur wuthanimorr. Porr Onesimusrhu rhu nmbuhat yak marnyanimorrn, tfit dukamour kfo tkrurafhato turhu tohak yimarpno tfit yinyeft. Onesimusr fanho hanymour tfit turhu tohak yima Filemonrpno yinyeft. Rroh neft inji namoum: wom yimar womrhu slef hingrna yimar tohhato wom nefm na tanyhato yakrmanyihato tfit bi fekmr, nd slef yimar nhai rhurmoar. Wasmoumr.
Nd dukefm Onesimusr rhumoatmr, Porr kalabus tohetrn be gontwarpat wandfahato kfo nuhas bonuhasmorr Onesimusr rorpno yimo nmbuhat. Yo kfo nuhas memorr, “Na Porann kfo tkrurefiwotanr niewur. Ni tamoh krhopam nd yimarpno korhwomn, mirahn rorn nd krhopam ahtayanm. Nann rorhu krhopam wahtotwa. Nann titaruhanm.” Yo kfo memorr, “Nd yimar afo be slef hingrna yimar kanjo hingrnamor. Arihat htirahnr ninhu hingrnefm rorn yaknho hakurahrn.” Nd nd mrokfom gontwatn hta buganimormn, nd gontwat tu Onesimusr hemotr turn hanyhato Filemonr mhemor.
Filemonrhu slefr wom nefm na tanyhato yakrmanyihato Romko nd ror nayuk neft myak marnyakhato Porr kfo tkrurafmotrr tu tohak yimarpno tfit yimor.
1
1 Na Pora, nann ndar gontwat wandfakhato htefiwant. Krais Jisasrhu gutnius mrokfothu pthaneftpno kalabus htamoma. Nompno rpat Jisasr hikwa yima Timotir rpat rhuhato ndar gontwat wandfakhato htefiwunont ni Filemonnhu yufatpno. Ni tu nmoh yimate yo nom hingrnewa hingrneft tohnuhiwa yimaye. 2 Yo nhai mmokahnont nnoh mndarem Apiat yo Arkipusr. Arkipusrn soldiam kanjo tohhato yahrt tohnuhiwurnom. Yo ni Filemonnhu kunys rifiny hakuta Kristenm duka bugewunonm. Kfo bugewunonko.
3 Nmoh Bro Yifemri Nungothet Jisas Kraisr ayuhuwafkahfko, yima yuhum ayak marnya bomarnyafko.
Porr kfo yindhormorm Filemonrhu dborioh nefm
4-5 Wanyakmoya ni Nungothet Jisasrhu dukefrpar rhuhato Bro Nkifrar hiket yimam yakitohwa yuhat. Na inji wanyakhato Bro Nkifrar kfo bruttna yindhorwanr. 6 Kfo bruttna kanga, Kraisr yakitoh hanykahnn rpat tohrahnom. Nompno nia rpat tohhato Kraisrpno frtkafet yimanom Kraisr yak marnyiwa yuhat tunn hti hikrahn. 7 O, yinowe, Bro Nkifrar hiket met yindarim ninn yakitohwatnm, rroh yima yuhenm myindhornitmm. Nanhu yima yuhur ndnatpno yindhorhato miyorhwor.
Filemonr tfit Onesimusr yakmiyakkfot
8 Na ndar yimaya, na Jisasrhu hingrna yimaya. Na to kforfoyann tamoh tamohroh finji naneft. To nhai. Na nhai tamohm kforhotann. 9 Htitann Bro Nkifrar hiket yimam ninn kaki-tohwonm. Na inji htitwoyann na nhai wom tamohm kfo tkrurrhotann. Nhai. Na be kfo ttiwonkfot kfo ttiwon-ruhann. Na Pora, na bi bro yima kasha, nann Jisas Kraisrhu mrokfot hatone htfaswant. Na kalabus toh-wohat to nd nmbuhatpno kalabus htamoma. Nann be wom kfo ttiwon mrokfot kfo ttiwonwann. 10 Nanhu yon Onesimusrhu yakmiyak nmbuhat be kfo ttiwonwann. Na kalabus toh hasetann Onesimusr mfnahmor. Nanpno mfnahhato nd yiharn Jisasrhu tirmn htamoyanr. Bi nanhu yoner. 11 Ror ninpno tohmohat nhai tu hingrnanho marnyarmorn. Nhai. Hingrna hhrekmor. Tfit arihat awi, ni hingrnanho yo na hingrnanho inji narahr.
12 Bi kfo tkrurefiwotanr bi tor bi niewur bi tfit tunpno. Nanhu yima yuhur rorn korhr. 13 Nd gutnius mrokfothu pthaneftpno kalabus htamoma. Na kalabus tohwohat afo rorn ninhu tkitt yakhato rorn niahato mhti duka tany hanyrfoura. 14 To nhai. Nhai be nanhu fijo ror yakitoh-kfot. Ni tu nd yimar yakitohwa tikat yimanhu kfo yakio mrokfot awanyant, ee btn yakitohrfoyanr. Kto be tunn kangn, ania tohnhora, na nhai mro-kfom. 15 Nd Onesimusr yakrmemohat rot fakrmenamor. Yakrmanyehato dfik yiham frtrohmorn. Ndt rot ka Bro Nkifrar Onesimusr tfit kfo tkrurafhato ninpno toh nkifranineftn, nd neft inji rhumot.
16 Arihat mirahn ka be slef yimar ninpno tohrahr. Nhai. Mkuko slef yimar tohrahr. Mkuko htirahnr najoh toht tohwa kanjo tohrahfn. Na tuka htitanr rpa yimarhuno kanjo. Ndnetann na hti yindhorwanr. Ni, to inji hti yindhorrahnr. Ror nayuk nefm htirahnm tu slef yimam kanjo. Yo tfit Kraisrhu yuhat htirahnr tu najoh toht tohwa kanjo. Inji htihato nhai yafhoruhatnr.
17 Ndnettn na ninhu hingrna tamnou yimaya kanjo, no rpat kakitohwonont Kraisrhu hingrneft, nd yimar tfit wayakmiyaktwanr ni na yakmiyakrfo kanjo. 18 Ror ninpno wom tamohm yak he thombat, rorhu yufat wayak thukahnt tfit nanhu yufatn wahtatwa. Nann nd ror nayuk nefm marufa htaruhanm. 19 Na pthiwa mrokfot asot bi tukanhu tire yikt yakitohhato wandfa kanga. Na Porann Onesimusrhu nefm marufa htaruhanm. Ni to wadukaf hanyswa, ni Bro Nkifrar hikwa yuhat frohmn nd yuhat fak nuhasafmomn? Ni nd mrokfot tawo kahukann. 20 Yinowe, wawanyn. Jisasrhu yufatpno kfo kangann nanhu yima yuhur wuyaktwanr. No buga Kraisr hikwono. Ndnettn nanhu yima yuhurn wamikmbrekahtn nanhu yima yuhur be yindhorhato marnyarahr.
21 Awi htita, na kfiwa mrokfom hikrahnm. Ndnatn ndar gontwat wandfiwann. Yo htita, ni Onesimusr-pno naruha nefm, tu dborioh nefm narahnr. 22 Wom mrokfo nmbuhent be kfiwant. Na nda kalabus tohwohat, nanhu bro yima yuhur duka kangr nikmoh kfo bruttna nmbuhat na kfo bruttna hasiwohat Bro Nkifrar wany-ruharn yak hfhanaforahra. Yak hfhanafohato tfit nikompno hnerahra. Ndnetann kanga wom hweyuk tkitt bi wayak hta hanyswakomt.
Porrhu hingrnanho yimaroh kfo yindhor mrokfom
23 Epafrasr kfo yindhor kfot htefiwurt. Ror to Krais Jisasrhu gutnius mrokfothu hanyeftpno kalabus hta-momr. 24 Yo Mak, Aristakus, Demas, Luk, nd nd yimandount, nanpno hingrnewam, rom wom kfo yindhor mrokfot htefiwumt. 25 Nungothet Jisas Kraisrhu yuhuwafeft athu kasi bugatwatko.