1 Paasigaa bonchchiya gallassay gakkanaappe kasetiide, ha sa7aappe shaakettiide, Aawuwaakko biya wodii gakkeeddawaa Yesuusi ereedda; ha sa7an de7iya barewantta ubba wode siiqeedda; wurssethay gakkanaw unttuntta siiqqeedda.

2 Yesuusinne kaalliyaawanttu kawuwaa miishshin, Simoona na7aa Yihudaa Asqqorootu Yesuusa aathi immanaadan, xalahii A qofissi wotheedda. 3 Yesuusi bare Aawuu ubbabaa A kushiyan wotheedawa, qassi Xoossaa matappe I yeeddawaanne, simmiide aakko baanawaa ereedda. 4 Yesuusi miyasaappe denddi eqqiide, bolla bagga mayuwaa qaari wothiide, pooxaa bare xeessan danceedda. 5 Hewaappe guyyiyan, haathaa meechchaa miishshaan tigiide, barena kaalliyaawanttu gediya meechchaanne bare xeessan danceedda pooxan qucussaa doommeedda.

6 Yesuusi Simooni Phexiroosakko yiina Phexiroose, <<Godaw, neeni ta gediya meeccanaw hanayiyee?>> yaageedda.

7 Yesuusi zaariide A, <<Taani oothiyaawaa neeni ha77i erakka; shin guyyeppe eranaassa>> yaageedda.

8 Phexiroose, <<Neeni ta gediya ubbakka meeccakka!>> yaageedda.

Yesuusi A, <<Taani ne gediya meeccana dhayooppe, newunne Tawunne ittipetethay baawa>> yaagiide zaareedda.

9 Simoona Phexiroose Yesuusa, <<Godaw, yaatooppe, ta gediya xalalaa meeccoppa; ta kushiyaakka ta huuphiyaakka meecca!>> yaageedda.

10 Yesuusi zaariide, <<Bollaa meecettidiggeedda uray ooninne gediyaappe harabaa meecettanaw koshshenna; aw ubbasaykka geeshsha. Qassi hinttenttukka geeshsha; shin ubbay geeshsha gidikkita>> yaageedda. 11 Ayissi gooppe, Yesuusi barena aathi immana uray oonenttonne ereedda; I, <<Hinttenttu ubbay geeshsha gidikkita>> geeddawe hawaassa.

12 Unttunttu gediya meecceeddawaappe guyyiyan, Yesuusi bare mayuwaa mayyiide, baresaa guyye simmi bi uttiide unttuntta yaageedda; <<Taani hinttenttussi ootheeddawaa akeekiitee? 13 Hinttenttu Taana, tamaarissiyaawoonne Godaw giita; Taani he hinttenttu giyawaa gidiyaa diraw, loytheeddita. 14 Taani hinttenttussi Godaanne hinttentta tamaarissiyaawaa gidaadde, hinttenttu gediya meecciyaawaa gidooppe, hinttenttukka ittu ittuwa gediya meeccanaw bessee. 15 Ayissi gooppe, Taani hinttenttussi ootheeddawaadan, hinttenttukka oothana mala, hinttenttussi leemisuwaa gidaaddi. 16 Taani hinttenttussi tumuwaa oday; qoomay bare godaappe aadhdhenna. Qassi kiitetteedda uraykka barena kiitteeddawaappe aadhdhenna. 17 Hinttenttu hewaa eriide oothiyaawaa gidooppe anjjetteeddawantta.

18 <<Taani hinttenttoo ubbabaa haasayikke. Taani dooreeddawantta eray; shin Xoossaa Maxaafay, <Taani barsseeddawe Ta kushiyaa sa77eedda> geeddawe tuma giddanaw bessee. Maz 41:9 19 Hewe haniyaa wode Taani Taana * Taani Taana: Yoh 8:24 xeellite. gidiyaawaa hinttenttu ammanana mala, hewe hananaappe kasetaade hinttenttussi hananawaa oday. 20 Taani hinttenttussi tumuwaa oday; Taani kiittiya oonanne mokkiyaa uray taanakka mokkee; qassi Taana mokkiyaa ooninne Taana kiitteeddawaa mokkee>> yaageedda.

21 Yesuusi hewaa haasayeeddawaappe guyyiyan, bare wozanaan daro metootiide, <<Taani hinttenttussi tumuwaa oday; Taana hintteppe ittuu aathi immanawaa>> giide qoncciyaan odeedda.

22 I oona haasayinttonne, kaalliyaawanttussi ubbaakka erettennaan ixxina, ittuu ittuwa xeelleeddino. 23 Yesuusa kaalliyaawanttuppe ittuu, Yesuusi siiqiyaawe, Yesuusa matan utteedda. 24 Hewaa diraw, Simoona Phexiroose he kaalliyaawaa simi77iide, <<I oona gintto, ane A oochcha>> yaageedda.

25 Hewaa diraw, he kaalliyaawe Yesuusa haythaakko shiqiide, <<Godaw, I oonee?>> yaageedda.

26 Yesuusi zaariide, <<Taani ukithaan cabbaa tushaade immiyaawe A>> yaageedda. Qassi ukithaa menthi akkiide, cabbaa tushiide, Simoona na7aa, Yihudaa Asqqorootussi immeedda. 27 Yihuday ukithaa menthowaa akowaappe guyyiyan, Seexaanay elekka Yihudaan geleedda. Yesuusi A, <<Neeni oothanawaa elleella ootha!>> yaageedda. 28 Shin he sa7an utteeddawantuppe ooninne Yesuusi hewaa A ayissi geeddenttonne eribeenna. 29 Yihuday miishshaa qarcciitiyaa oyqqiyaa diraw, kaalliyaawanttuppe ittu ittuu Yesuusi Yihudaa, <<Paasigaa bonchchiya gallassaw barena koshshiyaawaa baade shamma woy hiyyeesaw mixuwaataa imma geedda>> yaagiide qoppeeddino.

30 Yihuday ukithaa menthowaa akkiide, elekka kare kesseedda; he wode sa7ay qamma.

31 Yihuday kare keseeddawaappe guyyiyan, Yesuusi yaageedda; <<Ha77i Taani Asa Na7ay bonchchettaaddi: Xoossaykka Ta bagganna bonchchetteedda. 32 Xoossay Ta bagganna, Asa Na7aa bagganna bonchchettooppe, I bare huuphew Taana Asa Na7aa bonchchanawaa; qassi I Taana elekka bonchchanawaa. 33 Ta naatoo, Taani hinttenanna daro wodiyaa gami77ikke. Hinttenttu Taana koyyana; shin Taani Ayihudatuwaa, <Taani biyaasaa hinttenttu baanaw danddayikkita> geeddawaadan, hinttewukka ha77i oday. 34 Taani hinttentta ooratha azazuwaa azazay; ittu ittuwa siiqite. Taani hinttentta siiqeeddawaadankka, hinttenttu ittu ittuwa siiqana bessee. 35 Hinttenttu ittu ittuwaanna siiqettooppe, Taana kaalliyaawantta gidiyaawaa asay ubbay erana>> yaageedda.

36 Simooni Phexiroose Yesuusa, <<Godaw, neeni haqa bay?>> yaageedda.

Yesuusi zaariide, <<Taani biyaasaa neeni ha77i Taana kaallanaw danddayakka; shin guyyeppe kaallana>> yaageedda.

37 Phexiroose, <<Godaw, taani neena ha77i kaallanaw ayissi danddayikkitaa? Taani ne diraw, hayqqanawukka giiga uttaaddi!>> yaageedda.

38 Yesuusi zaariide, <<Ta diraw hayqqanaw ha77i tumu giiga uttaaddii? Taani new tumuwaa oday; kuttuu waassanaappe kase, neeni Taana heezzu gede kaddanaassa>> yaageedda.