adumao masi simaore Tawingna emo tuwa mene emo wowosigaora ge saya aung yaise sero adumao masi simaore auna atu adungno ge buro yero nauwa. Nupema awong emo putoungne awiya emo bauno mene gaya kasayaise sero atu aduno nauwa.

Agewa 1/3 Ge awiya Keregao 8, 9 auna atu mitiya. Nona etama auna zo amaze wan-tad (1/3) ayero sero nowa. Arare tawingna nona apakana gagausero dubu etama yai aune auna atu zo aung yai etobe gege mitarineyato. Ayero yai aune “Agewa 1/3 aung yetiya,” ayero sarinenane.

aita Aita auna susuwa etobe. Zo awiya daba mene porero gamao. Zo awiya i mene gamao ara. Yuda emo mene zawing Tuwa Bayau eno pugari sero wota nona minao zo pu aita tame gairo aune igitinauwa.

Angelo Tuwa Bayaura soumani uritira atu mitasani Tuwa Bayaura buro yero nowa. Ena awiya Tuwa Bayaura ai mani yero nowa. Arata ena mene zo Tuwa Bayau eno iwo yewa giro uritira atu awang senu Sanda aune dema zuwewa.

Aposolo Aposolora susuwa awiya burora iyengtao. Yesu mene emo ena Bowi Iwaing tugata yaora buro auna babaese sero yangtagairo puro burora pugaina. Buro-mani nuna 12 awiya gege oko, Paulo, Sila, Banaba, arita emo ena dema — awong apakana aposolo ayero sao ara.

Asia Paulo mene buro yero nasani nauna be aune Roma emo mene tawing zo yazo nuna Asia amaze diya yero nasani provins baina ayero sero nauwa. Auna mokora provins mamanikaka ena mitauwa.

Asisi Benaung gaora nona. Ewowo naname awong u awangtu mene ou duno benaung glas mene gaine yero nauwa, deka ayao ine emo ena kapa puro kora nauwa glas ine naunu benaung nunae gosinauwa. Glas mene benaung giro baititinonane ayao ine okowata, maingkoka gege gosinauwa.

Be baina Be baina awiya wari be dekaongka okowata. Awiya be imoko ine ara. Be baina kasayai aune Tuwa Yesu mene kapetegairo dubu nuna sorero pumai nung aune dema nao gege narineya. Be aune Tuwa Bayau mene abena meko pasena emo eno pugariniya.

Bielsebul Iwae dubu auna gitau yao yazo nuna zo Sanda.

Bozo tauyaore Yaya meko zo yazo nuna lepra. Yaya awiya Ziara una aung, arata Papua Nu Gini agewa enana-una atu mitiya. Yuda emo zo nung yaya amaze puro nasani nauna amimene emo baunona ditira atu nao teng oko. Nung akepari yero naise sao mitauna. Yuda emo mene emo ayao ine amaze gosinauwa waru yao ine yero nauna, arare tema yero nasani nauwa. Arata Yesu mene emo bozo tauyaore ena amaze dingyero kora yena.

Bunao Tuwara Gera atu bunao wawong zo miteya. Siwongpatige awiya bunao meko.

Dawidira sai Awiya Mesiya, o Kristo, auna yazo zo.

Dubo-ozao Zia ge amimene Grik ge etama pupuniya. Zo awiya eyao era: Tuwa Bayau mene ning gao yai nona zamena simenane nase. Zo awiya eyao era: Tini kapao aung, monone nase. Zo awiya eyao era: Awang yao aung, etutero dubo iwaingne nase.

Emora Mani Yesu mene Yuda emora Sorao Emo yazo Kristo yero nasani nauna, arata nung nuka nutope Kristo asati siya, awiya Yuda emo mene gorobo yero nung mena dateya. Arare nung yazo nuna Kristo amaze puingti nasani nuka nutope na Emora Mani ayero sero nauna.

Ewenselis Bowing Iwaing sao emo.

Farisayo Yuda emo awong dubu etobe mitauwato. Dubu zo awiya emo bauno wowosigao, dubu zo awiya emo babuze. Ora emo babuze mene gausero dubu etobe yero nauwa. Dubu baina awiya Farisayo, dubu maingkoka awiya Sadukayo. Farisayo awong Mosera sao tauyao ge dipunasani aune kotumao nunae ena susuuno puro nasani dipunauwa, arare awong nuka nuyetope gosinauwa emo iwaing yero nauwa. Arata awong emo bauno dubu baina, wini ge apakana oko dimao nauwa, awong ami zo gosinauwa pasena emo bauno yero nauwa. Arare Farisayo emo mene aeno taung puro wiwitinasani nauwa.

Ge ewe-pape Oweno mene tapunoiya Oweno mene emora mokora toitinoi dau yaine nasani ge ewe-pape sinowa. Awiya emo ou tauyao miniro dau yero ge memeko-mameko sero nowa ayao ine okowata. Oweno mene dubo nunae topetitinoi awong tawingna ge zota uritira ge zo sero nasani Tuwa Bayaura yazo de ika gatinowa. Awong ge awiya oko nigao amimene ge susuwa mene saine yero nowa.

Ge gayao zo mitiya Tuwa Bayaura ge porofete mene gitau nigiro gaewa mitoiya auna agewa zo.

Geing Siru ipura diyao.

Ge ou suwao Baptais. Baptais awiya kiawa ge okowata, Grik ge ara. Gera susuwa eyao era: Oura dusao. Yohane mene emo bauno dubo darawa yero nauwa oura dusinauna. Ago Yesu magayero iropuro witi uritira yenu aune ge nigao emo mene Yesura dubu auna susumari sero ge ou susunasani nauwa, deka ayero yeme yero nenane. Yeme ge nigao dubu ena mene emo bauno ge ou suwari sero oura dusero nowa. Ora ge nigao dubu ena mene mani wuire ge ou susunowa.

Gewera Ge nigao emo zo mene Sanda aune dema winade nete oko yangduwao, o Yesu oko bewae yao, tauyero dopariniya, nung awiya gewera emo. Keregao 2,3 auna atu gi.

Gitau yao dubu Yuda emora gitau yao apakana — pirisa babuze, arita Farisayo babuze, arita Sadukayo babuze — amimene au dekaongna gairo Yuda emo bauno diya yero nasani nauwa.

Haleluya Ge awiya Yuda ge. Ge naname-una atu eyero sao: “Tuwa Bayaura yazo de ika ganene!” Keregao 19:1, 3, 4, 6.

Herode Herode awiya emo zora yazo okowata, dubu zora yazo, arare Herode sayaoko nasani nauwa. Zo awiya Herode Baina ayero sero nauwa. (Matiu 2). Zo awiya Herode Antipas. Nung Yohane ge ou zayero suwao emo auna dubo kapena. Nupema Yesu mene benaung nuna-una atu dopena. Zo awiya Agripa Namba Wan. Nung Yakobora dubo kapero Petoro bunao gare pugaina. (Aposolo 12). Zo awiya Agripa Namba Tu. Paulo mene benaung nuna-una atu dopena. (Aposolo 25–26).

Herodera Pati memba Yesu tawingna atu nasani nauna be aune Yuda emo ena mene eyero sero nauwa, “Roma emo zo okowata, Herodera dubu auna zo mene nae diya yaise.” Ayero sero nauwa amimene kotumao pu dekaongna gairo nuka nuyetope Herodera Pati ayero sero nauwa ara. (Matiu 22:16; Mak 3:6; Mak 12:13).

Hibru Awiya Yuda emora yazo zo. Yazo nunae etama: Yuda emo, Isreli, Hibru.

Ibu Yuda emora ibu susuwa etobe mitauwato. Zo yazo nuna Tuwa Bayaura ibu baina awiya Yerusalem nape atu mitauna. Auna mokora atu pirisa mene zawing pugao buro yero nasani nauwa. Tuwa Bayau mene ibu bainana atu mitoiya ayero sero nauwa. Ora Yuda emora yere ibu mamanikaka napo sero mitauwa auna susuwa zo. Ibu mamanikaka auna atu Yuda emo Sabat iya be sero augati nasani Tuwa Bayaura ge zazagairo sero nigiro ayero nasani nauwa. Ibu mamanikaka nunae awiya yere ibu naname ine ara.

Iskeriot Yuda nung napo yazo Keriot auna atu kasa yena, arare yazo nuna Yudas Iskeriot ayero sero nauwa. Ge naname-una, “Keriot natopo.”

Isreli Yuda emo dubu auna yazo zo ara. Ewowo nunae Yakobo auna yazo zo Isreli, ora ewowo nunae zo auna yazo awiya Yuda. Arare be ena Yuda emo ayero sero nasani be ena Isreli emo ayero sero nasani nauwa, deka ayero sero nonane. Nupema yazo nunae zo awiya Hibru.

Iwae Emo mamagayaora ititi okowata, Sandara soumani.

Izip Kai ge Aigita. Tawing baina zo Yuda emora-una nugu atu mitiya.

Korayao Yesu mene name kora yena auna susuwa eyao era: Tuwa Bayau mene pasena naname auna abena name eno pugoiye sero Yesu mene abena awiya diuna. Arare zo nung Yesu tumo didinoiya amimene pasena nuna-una abena oko tamariniya. Awiya gege oko, zo nung Yesura-una susuuno noiya amimene pasenana putoung puro wowosinasani noiya. Noeno oko, Yesu mene nung Sandara waweng atu sorero puna. Awiya gege oko, zo nung Yesu tumo didinariniya awiya kowa iyaore auna baboiye sero Tuwa Bayau mene be bainana atu nung sorero puro pu nuna-una gariniya.

Kowa iyaore Kiawa ge hel. Awiya masi meko nibamu zo. Zo nung Yesu oko tumo diyao nete magayariniya amimene masi auna baungno yaya-biyaya tapunasani nao gege nariniya.

Kristo Yuda emo mene emo zo emo tuwa nunae yaise sero emo baunona benaungna atu uweri nuna-una tame yasagati nauwa. Ayero nauwa emo bauno eyero gosinauwa, “Nung emo tuwara buro auna gerao.” Emo ayao ine amaze Yuda gera “Mesia” ayero sero nauwa. Ora Grik gera mene zo “Kristo” ayero sero nauwa. Ge naname auna mene zo “Burora gerao yari sero uweri suwao.” Arare Tuwa Bayau mene Mani nuna Yesu emo bauno mekora atu sorero puro korayaise sero senu porofete mene “Tuwa yaise sao amimene bumariniya,” ayero sari sero “Kristo bumariniya,” ayero sero nauwa. Ayero sinauwa Yuda emo daigairo mene nigiro eyero kotupunasani nauwa, “Tuwa yaise sao yazo nuna Kristo amimene buro gorobo emora gitau yao yero name iwora waweng atu sorero puro iwo naname tunai aune name mono bagora atu mitarinenane.” Ayero kotupunasani nawe duwa Yesu kasa yena. Arata nung gorobo emora gitau yao oko yao yena, arare awong nung gigiwa Sorao Emo nunae Kristo me oko yena. Awong susuwa ewiya oko gao yewa: Sorao Emo Kristo mene Yuda emo bauno awiya Roma emora-una waweng atu sorero pumari sero oko buna. Nung tawing sero sero auna emo bauno pasenana atu sorero pumari buna.

Lama Wo sipsip auna mani.

Magayao mene awong Daigaina auna oregao Yuda emo bauno Izip tawingna atu nawe duwa Tuwa Bayau mene awong Izip emora waweng atu sorero pumari sero ge senu awong lamana yu mene garo be towao suwewa angelo gorobore zo mene muwo mani apakana dari sero kasa yero yu awiya giro Yuda emora muwo mani ao-diro oko dao daigaina. Ayero yena, arare dawang sero Yuda emo bauno mene be awiya kotungno oregao be pugairo oregati nasani nauwa.

Mana Mose mene Yuda emo bauno dubu bainane awiya yuno puro eu yanawira baungno atu nasani nauwa be aune Tuwa Bayau mene nona minao zo yazo nuna “mana” amaze uritira atu pugati naunu wowosi naunu mininasani nawe duwa dawang 40 ayero aung yena. Mana awiya Yuda ge. Ge naname auna mene zo “A noiye?”

Mesia Mesia awiya Yuda ge. Kristo awiya Grik ge, arare ning ge Kristo auna susuwa keregaora ge tauno zazagairo ge Mesia auna susuwa garinesa. Yohane 1:41 arita Yohane 4:25 auna ge dema zazagairo gi.

Nao me iwaing Emo bauno apakana nao gege narinenane. Ena mene Tuwa Bayau aune dema nasani nao me iwaing tauno puro nao gege narineya. Arata ena mene zo nao meko yaya-biyayare awiya tauno puro nao gege narineya.

Napo Paradais Tuwa Bayaura napo iwaing uritira atu mitoiya. Yazo Paradais arita Uriti awongto dekaongka ara.

Oweno Tuwa Bayaura Oweno dang.

Pentekos Pentekos awiya Yuda emora iya be baina zo. Gitau Yesu oko kasa yaore awong Tuwa Bayaura benaungna atu ma pugaora iya be ayero sinauwa. Arata ago mene zo Oweno mene iya be aune wosi tawingna yena, arare yeme Oweno wosina auna iya be ayero sinonane.

Pewayao Dubo pewayao arita nao pewayao arita nona pewayao auna susuwa dekaongka awiya eyao era: Tuwa Bayaura gerao.

Pirisa Pirisara susuwa awiya era: Awong zawing pugao emo. Awong Tuwa Bayaura ibu baina auna mokora atu buro yero nauwa. Awong sao tauyao ge Mose mene gaena awiya ago yero nasani emo baunona pasena nuwe bautara gaise sero wore nona enane Tuwa Bayaura benaungna atu aita tame pugairo igitinauwa.

Pirisa babuze Pirisa baina mature sekare amimene pu dekaongna gairo dubu zo yazo pirisa babuze ayero sero nasani nauwa.

Pirisa baina Nung Yuda emora pirisa apakana auna gitau yao. Dawang sero auna mokora atu nung wari be dekaongka aune Tuwa Bayaura ibu baina auna masi dang nibamu auna atu toiro Tuwa Bayau mene pasena nunae nuwegaise sero wora yu mene zawing pugati nauna.

Porofete Porofetera susuwa awiya eyao era. Gitau otu Yesu oko kasa yaore porofete emo nasani nauwa. Awong ge Tuwa Bayaura bera atu nigiro puro kapetegairo emo bauno eno tugata yero nauwa. Awong Yesu ago kasa yariniya auna ge bere gitau keregairo gaewa mitauna awiya yeme mitiya.

Sabat iya be Sabat awiya Yuda emora oregao iya be zo. Fraide ture 6 kilok zayero bautunema Sarere ture 6 kilok aune aung yero noiya. Be aune awong buro zo oko nauwa, nupema ake-akemo oko bautunauwa.

Sadukayo Yuda emo baunona emo babuze gausero dubu etobe yero nasani nauwa. Dubu baina awiya Farisayo, dubu maingkoka awiya Sadukayo. Sadukayo awong Farisayo daigati nasani emo babuze yero nasani nauwa. Pirisa baina nung Sadukayo zo. Sadukayo awong magayaora atu iropao awiya gigiwa ge iwao yena. A gege oko, awong name emo bauno awiya ititi aung ayero sinauwa. Nupema angelo aung ayero sinauwa. Aposolo 23:8 awiya zazagairo gi.

Sam Sam awiya Yuda emora yere ena. Awong gita dedunasani yere yazo Sam amaze gapunauwa.

Sanda Sanda nung Tuwa Bayaura iwo. Nung iwae apakana auna gitau yao.

Sao tauyao ge Sao tauyao ge 10 Tuwa Bayau mene Sinai diri atu Mose eno pugaina, awiya gege okowata, sao tauyao ge apakana awiya pu dekaongna gairo sao tauyao ge ayero sero nauwa.

Sifas Sifas awiya Petorora yazo zo. Yazo nuna zo awiya Saimon.

Siluano Luka mene Aposolo Buro Yero Nauwa auna ge gainasani Siluanona yazo amaze kapero Sila ayero sena.

Simao waegaore Kiawa ge glori. Tuwa Bayaura una atu waegao bainakama mitoiya, arare emo zo mene benaung nuna gao ine teng oko. Arata name simao waegaore nuna awiya kotupunasani susuwa nuna eyero gosinonane: Nung putoung bainane; nung dang nibamu; nung etutero noiya; nung nona apakana auna Maung.

Sipsip Sipsip awiya wo zo wo meme ine. Wo meme awiya nuka nuyetope diya yero nowa, arata wo sipsip mene zo nuka nuyetope diya yao ine teng oko. Diya emo nunae mene nona minao nunae tapunasani iwo nunae tuninasani ayero noiya.

Tairo naora nao sekawa aune tairo naora nao matu T-u tauyena. Ago Mose kasa yero nenu aune Tuwa Bayau mene nung puro Tuwara dubu auna gitau yao yaise sena. Ayero sero sao tauyao ge witao Mose eno senu gaena ara. Arare tairo naora nao matu auna sao tauyao ge awiya Mose mene gaenu Yuda emo puro dimari yero nasani nauwa. Arata emo zo za oko Mosera sao tauyao ge diungno baingtao yero nauwa, arare Mosera sao tauyao ge auna emo zo mene iwaing oko yero nauwa. Ayero nawe duwa aune Yesu mene tairo naora nao sekawa auna ge puro wosi tawingna yena. Name iwaing yero dubu nuna yanenese sero Tuwa Bayau mene Mani nuna Yesu amaze iyengtinu buro nawe abena naname magayero iropunu iwaing yewangne. Arare tairo naora nao sekawa auna susuwa eyao era: Zo nung Yesu tumo didinoiya amimene Tuwara dubu auna zo yero noiya.

Takis Roma emo mene tauyero Yuda emo puro wosiwa soumani ine yero nauwa. Arare Roma emora emo tuwa yazo nuna Sisa mene Yuda emo apakana takis moni nung eno pugaese sena ara. Senu gigiwa teng oko yao yena, arata awong putoung aung, arare saineba pugati nasani nauwa ara.

Takis pumao emo Roma emora emo tuwa Sisa mene Yuda emo apakana takis moni nung eno pugaese sero Yuda emo ena mene angyero pumaese sena. Arata awong moni pugaese sao auna teng oko pupunauwa. Moni ena tebeba pupunauwa. Puro agewa Sisa eno pugairo agewa sorero emo wau monine yero nauwa. Ayero yero nauwa Yuda emo bauno otao mani nunae mene gosinauwa pasena yero nauna.

Taung aingso kapao Yuda emo mene sao tauyao ge Mose mene gaena awiya dipunasani mani emo didi nunae auna woya dung auna taung aingso kapinauwa. Amimene awong tairo nao matu auna susuuno nasani nauwa auna susuwa awiya keregati nauna.

Tenina atu dekaongka Yuda emo awong 10 kina tauno wan kina Tuwa Bayau eno pugatinauwa. Moni gege okowata, nona apakana benaung giti tapunauwa auna agewa dema Tuwa Bayau eno pugatinauwa. Matiu 23:23; Luka 11:42; Luka 18:12; Hibru 7:5-9 auna atu gi.

Tuwa Bayau nata tuwa yero nao Yesu mene tawingna atu nasani nauna be aune Yuda emo bauno awong Roma emora emo tuwa mene diya naunu awong awena wese yero nasani nauwa. Awiya gosinauwa oko teng yero nauna. Tuwa Bayau nata Tuwa nunae yero nasani awong diya yaise aratapunauwa. Awong nuka nuyetope eyero kotupu nasani nauwa: “Tuwa Bayau nata Tuwa yero nai aune name Yuda emo mene tawing sero sero auna emo bauno diya yarinenane.” Ayero kotupu nasani Tuwa Bayau nata Tuwa yero nao auna be tawingna kasa yaise diya nauwa.

Wawong mera adumao Ge euna susuwa awiya Tuwa Bayau nung putoung patoungna maung mene mani nuna Yesu Kristo magayaora atu uwenu iropunu puro pu uriti masi me auna gainu mitoiya. Ayenu nung masi auna atu Maungna wese yero angelo witaota wosao, emo tuwa bainata maingko, uritirata tawingna, iwaingta meko, apakana auna gitau yao yero mitoiya.

wuit Wuit awiya nona minao zo me nuna rais ine. Yuda emo mene urero mininasani nauwa. Awong wuit me kowero mozero plawa yero puro buro brete igiyero nauwa.

Yis Yis awiya nona minao zo. Emo mene brete yari sero yis puro plawa aune dema tairo pugairo dawero nowa titisero baina yero noi aune igitinowa. Yis toiro sinero plawa zere tutupore apakana ayero pupunoiya, deka ayero pasena mene toi emo baunona mokora noi pasenane nonane. Arare Yuda emo mene pasena maze yisra pugairo sero nauwa. Awong oregao be baina auna atu mitari sero yis semini nasani aune oregao be auna atu mitauwa.

Yohane Yohane etobe nasani nauwato. Zo awiya Yohane ge ou zayero suwao emo. Ora zo awiya Yohane Yesura buro-mani 12 auna zo. Maung nuna Zebedi, ai nuna Salome, aune tato nuna Yakobo. Nung YESU KRISTORA BOWI IWAING YOHANE MENE GAENA amaze gainasani yazo nuna pungyena. Nung yazo nuna puingti nasani nuka nutope “Petorora otao” arita “Yesura buro-mani iwaing” ayero sena ara. Yohane 18:15-16, 20:3-8, arita Yohane 13:23, 19:26-27, 20:2, 21:7, 21:20-24 awiya zazagairo gi.

Yuda oko Emo bauno awong Yuda dubura atu oko bumao o ewowo awena emo Yuda oko amaze “Yuda oko” ayero sinauwa. Arare Papua New Guinea name Yuda oko ara. Yuda emo bauno mene emo bauno Yuda oko amaze gosinauwa emo bauno wosao yero nauwa.

Zaiyon Napo Yerusalem awiya diri yazo Zaiyon auna tame atu diwa mitauna mitoiya. Nupema napo Yerusalem awiya Yuda emora napo baina. Arare porofete ena mene Yuda emo dubu auna yazo puingti nasani Zaiyon ayero sero nauwa. Ora Hibru 12:22 awiya uritira yazo puingti nasani “Zaiyon” ayero siniya.

Zaz Zaz awiya koto nigaora emo. Nung kotora atu emo enana ge sero aung yero noiya. Name be ena zaz awiya mazistret o zastis ayero sinonane.

Ziyo simaora nona Ziyo simaora nona auna susuwa etobe. Susuwa zo awiya eyao era: Tawingna emo tuwa mene putoung nunae pu daung gari sero angsi tenao zo gol mene yao puro ziye wosogairo puro nasani nauwa. Yeme deka ayero nowa. (Keregao 12:3, 13:1, 19:12). Gorobo emo mene Yesu izinasani angsi dungne puro tenero emo tuwara ziyo simaora nona ayao ine etotoma Yesura una ziye atu wosogaiwa. (Matiu 27:29; Mak 15:17; Yohane 19:2, 5).