2 TESALONAIKA
Pol ere Tesalonaika komri tatame emne yurik sene bas rasem siglou.
Kiyi late tuma.
Gwote siglou Pol eter bas rasen Tesalonaika komke temenem Kristen tatame emne newopitim. Ere siglou pes emne bas rasem. Gwo ere yurik sene bas rasem siglou.
Jisas ere sene yate tuma Tesalonaika komri Kristen tatame eme noub beke met. Kau eme etep abom. Jisas ere sam, ere sene wayen God eteri komke yim. Yin temenem, yuri ere sene yam. Eme etep abomke, Pol ere eke gwote siglou bas rasen emne etep wom. Jisas ere God eri komke yim, ere sene mak yaten. Ere mak yamentek, nowselri tatame eme wos yaper kiyi nente nenbe. Wule tousibe tame wuri ere tete nenbe. Ere Jisas eteri peiktame tete. Ere peiktame tetek, Jisas ere sene ek yate. Ere yate, ere nemne pette nenbe. Etepkap be wos be wos yaper tete, kem Jisas erne kenawaike som abobetete. Kem yaku yenbo som kerebetete. Kem yaku bul mane worate. Kem akeite tatame emne kobo som labetete. Pol ere emne etep bas rasem.
Pol ere Tesalonaika komri tatame emne yuri bas rasem tuma gwo.
Sapta 1—2. Aneyen eri yabel eisau ere yurik tete nenbe.
Sapta 3. Tesalonaika tatame eme emri bul worabe wule yaper eyaren yaku noub kerete.
1
1 Kem Tesalonaika komri Kristen tatame, kem neremri Apei Godken Aneyen Jisas Kraisken etepri tatame. Nema Pol, Sailas, Timoti, nema kemne gwo siglou bas rasbe. 2 Nema abobe, Apei God, Aneyen Jisas Krais epe kemne pap yewon noub eyarte, kem pap yenbo temente.
Tesalonaika Kristen tatame eme mus metbetem, eme taskurbetem.
3 Geisimase, kwokwos kwokwos nema God erne kemne pir wobe. Etep beke kip nen, e yaper. Beke nema etep tebe? Kenawaike abobe wule kem kenake nenbe. Pap yewon noub nenbe wule kem wurara wurara kem awoawo kenake nenbe. Etepkap nema God erne pir wobe. Etep tebe, e yenbo. 4 Kristen berai tatame eme kemne yaper nenbe, kem mus kenake metbe. Etep metbe, kem taskuren kenawaike abobe wule noub som tobobe. Eke nema kemne gaben metekwasbe. Kerem tebekap, God eteri akeite komke tetan tatame emne nema etep wusoube.
God ere nemne wule yenbok seigte nenbe.
5 Eme kemne yaper nenbe, kem mus meten kem taskuren Apei God erne som abobe. Epkap, God ere kemne lan etep wobe. Kem wule yenbo nenbe. Aren panen siten kom, Heven, kem etek yite nenbe. Etep wobe. Etepkap, nema metten, God ere nowselri tatame emne noub seigte. 6 God ere wule yenbo gwopke nente. Ere kemne wule yaper nenbe tame emne yaper awosein nente nenbe. 7 Kem mus metbe tatame, God ere wom, kem neremken yenbo meten ege site nenbe. Aneyen Jisas ere yate, nema ege ek site. Ere eteri komri mureken tame etemken Heven mesginin yate nenbe. Eme ker eisauken yan 8 God erne beke abo tatame emne yaper awosein nente nenbe. Aneyen Jisas eri tuma yenbo beke meten tobo tatame emne ere kir yaper awosein nente nenbe. 9 Emne yaper nenen, eme yaper som temente nenbe. Aneyen ere emne beke yan kip la. Berai. Ere emne me mesginte. Eme eteri bitimi, eteri mure eisau sene beke la. 10 Krais ere yate yabelke eme yaper tete nenbe. Ete yabelke eteri tatame eme erne sig eisau wobetete. Erne abobe tatame eme erne tuma yenbo wobetete. Kerem, kem etemken temente. Neremri wom tuma kem noub meten kenawaike abobe, etepkap keremken kir kem etemken temente nenbe.
Pol ere God erne etep wometem. Ne Tesalonaika komri tatame emne mure newote.
11 Etepkap, kwokwos kwokwos nema neremri God erne gwo tuma wobe. Ere kemne wopeten wule yenbo nente womkap, ere kemne kobo late, kem ete wule noub sen kem tatame yenbo ek tete. Kerem yenbo nente abobekap, kerem kenawaike abobekap ere eteri murek kemne kobo late, kem etep kuyese nenen omote. 12 Etepkap tete, keremke neremri Aneyen Jisas eri sig eisau wote. Eterke kemri sig eisau tete. Neremri Godken Aneyen Jisas Kraisken etep epe pap yewon wotek, ete wos tete nenbe.