1 Ngaya-waj nga, yaani Jude. Ngaya anaani nganu-yandhurrbangana-yinyung na-Jesus na-Christ. Marri na-James ngayawi-nyinyung naa-murruyung.

Na-God, na-Baba nugurru nanii-gaḏii, marri nanii-ḏamarr-ngu-burraa nugurru warraarrawindi. Ngaya anaani nga-warrarrii nugurri-wuy. Na-God nugurru nani-rangarrii nubagi-yung yamba na-Jesus Christ.

2 Niga na-God nambani-man.galagana nugurru, marri nambani-lhamaamura-gang, marri nambanii-ḏamarr-ngu-burraa runggal windiyung, nugurru aadanu.

3 Gurruwaj, aadanu nganaa-ḏamarr-ngu-burraa-yinyung, anaani ngawu-ngaynbandangi-windiyung nganggarrarrangi nugurri-wuy. Anaani ngirri-ḻibi-ḻibawana, na-God ngarrani-wiri-gayn ngagurru. Ngaya anaani nganggarrarrangi wudani-yung-jinyung.

Yagu anaani ngaya nga-warrarrii nugurri-wuy, nguynju yadhu numburru-dhi-maṉdhina. Warra-mulung-aynbaj-maynji warruburru-yung numburru-wundaa, nugurru numburru-lhara andhurrg. Wugurru yamba ari nambambi-magana aynbaj lhaawu, waari aniijgubulu ana-lhaawu na-Jesus-inyung wugurru.

Yagu na-God ngarrani-yayn anaani ana-lhaawu, anaani-yung ngurru-jambarrgina-yinyung, ngagurru anaani nigawi-nyinyung warra-wurru-wurruj. Niga ngarrani-yayn anaani ana-lhaawu, malg-aynjaabugij-bugij.

4 Nugurru aadanu numburraawanggina. Warruburru-yung warra-mulung-arrgi-yung buguni wurru-yanggi nugurri-wuy, nurraaliynjiyn, anaani wu-miḏaamimi wu-midaarrg. Warruburru waari ambunu-ngaynbandang na-God. Ngagurru anaani ngurru-marrbuy, na-God ngarrani-walgaṉmana anaani. Yagu warruburru-yung wirriiynbijgana ana-lhaawu, wurru-yamana “Ngagurru anaani ngaambaaṉbina-wugij aniij-galaaladi, wiiya aḏaba, na-God yamba ngarrani-walgaṉmana.” Dani-yung anaaladi lhaawu wurru-yambina-yinyung. Marri warruburru-yung wurru-lhaabina na-Jesus Christ. Yagu nigaaj-bugij, dagi-yung-bugij Jesus nguunu-yandhurrbangana, marri niga-waj ngagurri-nyinyung na-Buunggawa.

5 Anu…bani-yunggaj, waarrarrini warruburru-yung-jinyung. Anaani ana-wubiba ngarranggu-magana, na-God warruburru-yung ambani-jadugang. Anaani nugurru nurru-marrbuy, anaani waarrarrini anubani-yunggaj. Yagu ngijang marri ngaya anamba-magana wu-malgadhaadharrijgiyn, nugurru.

Anu…bani-yunggaj na-Buunggawa wani-maṉmangi warruburru warra-wurru-wurruj marri wani-yarrijgini warruburru-yung ana-Egypt-gala. Wurrugu marri, nubagi-yung wani-jadugayn warruburru warra-mulung-arrgi-yung. Warruburru waari-yinyung ambuu-jambarrgini, warruburru-yung wurru-ngawini wugurru.

6 Marri anaaynbaj ana-wubiba ngarranggu-magana, anubani ana-angel wu-burri wubani-rruj maaḻamburrg-duj. Yagu anu…bani-yunggaj, ana-mulung-aynbaj ana-angel anubani-yung arruyn wu-burri-rruj wu-maṉdhini-rruj. Wudani-yung-gala, na-God ni-radbini, marri ni-burriyn wubani waangudumaa-rruj. Anubani ana-angel wu-radba-radbidhi wuguuguni. Marri yiibagi-rruj yi-runggal yi-waḻirr-uj, anubani ani-nguynju-nguynjijgang marri ambani-lhajbumana, anubani ana-angel wugurru.

7 Anaani wiij-nguynju, anubani-yung ana-Sodom marri ana-Gomorrah. Warra-wurru-wurruj anubani-yung ana-lhal-wulawaa-yinyung ana-lhal marri anubani anaaynbaj anubagu wu-ridiynjina-yinyung, anubani-yung wurraandha-wuguuguni wurraaynji-yaay arrbidi, wurru-waṉbini aladi-windiyung. Anubani na-God wanii-ḏiyaldhiyn warraawurru-yung, wani-guldhiyn. Wani-burriyn wubani-wuy a-ngura-wuy, anubani ana-ngura anggu-wuguuguni. Anaani wiijamana, warruburru-yung warra-mulung-aynbaj amburru-waṉbina-yinyung aniij-galaaladi, warruburru-yung na-God ambani-burrang a-ngura-rruj, wugurraayunggaj.

8 Yagu anaani ana-yimbaj, warraawurru-yung warraalaaladi wurru-yamana wiij-nguynju. Wugurru wurru-wuryarrii aynba-gaynbaj-jinyung ambarrj, wurraan-jamana niga na-God wani-magana, yagu waari. Wurru-waṉbina-wugij anaaladi, wugurri-nyinyung-mirri ngun.gu. Waari anubani-yung ambunu-yandhurrbang na-Buunggawa, marri anaarrawindi ana-mamanunggu ana-angel wugurraayung wurraaladi-yamawana wugurri-wuy.

9 Yagu nugurru aadanu numburraawanggina, na-runggal-yung-jinyung na-angel-yung, na-nimuwaj-jung Michael. Anu…bani-yunggaj, naagi-yung na-Michael, marri nubagi-yung na-baḏirrnya-yung, na-Satan, wini-wundi. “Aadanu ana-ngun.gu na-Moses-jinyung ngayawi,” ni-yamayn, marri nigaayung, “ngayawi,” ni-yamayn nigaayunggaj. Yagu naagi-yung na-Michael waari ani-runggal-wini, yagu waari naagi-yung anu-lhajbini nubagi-yung na-Satan, waari anaaladi-yamawaa. Marri yagu ni-yamayn, “Dagu Buunggawa-yung ani-lhajbumana,” dani-yung-bugij ni-yamayn niga.

10 Yagu warraawurru-yung warra-wurru-wurruj wirriiladi-yamawana anaarrawindi-lhangu. Wiiya wurru-maḻaḻadi anubani-yung, yagu wirriiladi-yamawana-wugij wugurru. Marri wurru-waṉbina anubani-yung aynbaj, yagu waari amburru-wijangang. Warruburru nguynju yaga yii-jarrangu-yii marri ana-bulugi-yii, wu-ngarra-jaarri yaga yigaj arrbidi yuuguni yaanuwuy. Wurru-waṉbina yamba anubani-yung, wurraaladi-wina, marri amburru-jadugina wugurru.

11 Marri anubani runggal aladi wu-waṉina wugurri-wuy! Ana-raga-ragij-gaj anu…bani-yunggaj nubagi-yung na-Cain anubani-yung ni-waṉbini aladi. Anaani warraawurru-yung wuu-yamana wurru-burraa. Anubani ana-raga-ragij nigaayung na-Balaam niwu-ngaynbandangi windiyung, anubani-yung anu-ṉuga. Marri waniiladi-waa warruburru warra-wurru-wurruj na-God-jinyung. Anaani warraawurru-yung wurru-yamana nguynju nigawi-yii. Anu…bani-yunggaj nigaayung na-Korah anubani-yung ni-wij-galadi-wayn na-God-guy. Marri na-God nu-jadugayn. Wudani-yung-jii, warraawurru-yung ambani-jadugang wugurru.

12 Nugurru-maynji aadanu nurru-nguyii aynjaabu, warruburru-yung warraalaaladi wurru-yaarri nugurri-wuy, anubani-wuy ana-marrya-wuy, warruburru-yung ambirriij-galadi-wana anubani-yung. Warruburru-yung wurru-rangarrina wugurraajbaj, marri wurru-yilg-baliyn marri wurru-wan-gaagidhina. Yagu waari anubani amburraambulang wugurru.

Warruburru-yung nguynju yaga wudani a-ngubunung yaga yigaj, wu-rijbina yaga. Waari anubagu anggu-warra-rabang yaga, marri anubani-yung wudhanguyn wu-lhanguyn-bayamani wubani marri barawudii, wu-yamana. Marri warraawurru-yung wurru-yamana nguynju a-rangag-jii, waari anubagu ana-marrya anu-ngugulmung, anubani-yung-duj. Warraawurru-yung wurru-yamana nguynju a-rangag-jii yaga yigaj, anubani-yung ambirri-ngarrgiwang-maynji ana-rangag anubagala anaaban-gala anggu-ngarrdang. Anubani anggu-ngawang anggu-wulagiynjang wugurru.

13 Marri warraawurru-yung nguynju yaga amubami ama-lhagayag-jii maar-ngarra-ngarralhii. Wurru-waṉbina aynba-gaynbaj yij-galaaladi. Nguynju yaga maadamu ma-rijbina mana-mungulu, wiijamana anaani anaaladi. Warraawurru-yung amburraambulangi-magaa. Warraawurru-yung nguynju yaga dagu yaga arrbidi ngi-milhiynjina miyiri. Marri anubani wurru-yaarri wubani-rruj aa-ngududumaj-guy. Anubani anaa-ngududumaj wugurraa yungguyung, wuguuguni amburru-burraa wugurru.

14 Warraawurru-yung warra-miniwiyayung na-Adam-gala marri na-Enoch-guy, warra-marang-aynjaabugij marri wini-wulawaa. Naagi-yung na-Enoch anu…bani-yunggaj ni-yambini warraawurru-yung-jinyung warraalaaladi. Naagi-yung na-Enoch ni-yamaa, “Anaani anggu-waṉbang wurrugu marri, malgadhaadharri. Ngaarranggaa, nga-wuryarrangi. Na-Buunggawa marri anaarrawindi ana-maṉngulg-jinyung ana-angel wu-yanggi, 15 nguynju yungguyung ambani-nguynju-nguynjijgaa warraarraarrawindi. Warruburru-yung wurru-waṉbini-yinyung anaaladi, waari-yinyung anubani-yung ambirri-yandhurrbangaa ana-lhaawu-runggal na-God-jinyung, anubani-yung ambani-lhajbiyn, wurru-waṉbini yamba aladi. Marri warruburru-yung wurru-yambini-yinyung anaaladi ana-lhaawu nigawi-nyinyung na-God, marri anubani-yung ambani-lhajbiyn, anubani yamba anaaladi ana-lhaawu.” Dani-yung na-Enoch ni-yamaa ana-lhaawu.

16 Yagu warraawurru-yung wurru-ḻamina-wugij. Marri wurraandha-wuguuguni-wugij warra-lhajbumana warraaynbaj-guy. Anubani-yung-maynji ambirri-ngaynbandang, marri bani-yung amburru-waṉbina. Anubani wurru-lhama-lhamina marri wuu-yambina runggal lhaawu. Marri anubani wuu-yambina lhaawu wu-lhaguḻa-ninibina warra-mulung-aynbaj-guy, nguynju yungguyung ambarraarriiyii anubani anaarrawindi-lhangu.

17 Yagu nugurru-waj aadanu, ngaya nganaa-ḏamarr-ngu-burraa. Warruburru-yung wirri-lhaawu-yarrijgina-yinyung na-Buunggawa-yinyung na-Jesus Christ, anubani-yunggaj wurru-yambini anubani-yung-jinyung anggu-waṉbina wurrugu. Nugurru anubani numburraawanggina anaani ana-lhaawu. 18 Anubani nambi-yamijgaa, “Anubani-yung-maynji anggiij-dhamun.gurrg-maynji, warruburru warra-mulung-aynbaj ambunu-rajburrnayii na-God, marri nambambi-rajburrnayii nugurri-wuy. Anubani amburraarra-ngaynbandii, aynba-gaynbaj yij-galaaladi. Marri anaani-yung amburru-waṉbina-wugij.” Dani-yung wurru-yamaa wugurru.

19 Warraawurru-yung warraalaaladi, nambi-mulu-ḻibawana nugurru aadanu nurru-jambarrgina-yinyung. Warraawurru-yung wurraawanggina-wugij aani-yinyung a-lhal, marri waari anubagu ana-Maṉngulg Mawurr anggu-burrangang wugurri-rruj, anaaji ana-lhirribala.

20 Yagu nugurru aadanu, ngaya nganaa-ḏamarr-ngu-burraa-yinyung, anubani-yung numburru-waḏa-waḏaḏ. Numburru-magaynjina, marri numbuu-yambiynjina anaani ana-lhaawu ana-maṉngulg, anubani-yung-jinyung nurru-jambarrgina. Numbunu-yandhawawana na-God, nimbirri-yandhawiwana anubani ana-Maṉngulg Mawurr, marri nambanggu-maṉmani. 21 Yagi nurru-yarrami na-God-gala, numburru-burraa-wugij nigawi-rruj, niga yamba nanii-ḏamarr-ngu-burraa nugurru. Numbunu-rangarrii wurrugu marri, na-Jesus anubani-yung nambani-man.galagana. Wurrugu marri nimbirri-waṉagana ana-wiri, anubani-yung anggu-wuguuguni wugurru.

22 Warra-mulung-aynbaj-maynji warruburru-yung amburru-wurrij-gadhaarimina, nugurru-waj nambarra-man.galagana. 23 Nambarra-maṉmang warruburru-yung warra-mulung-aynbaj, nguynju yaga danu nurraadina wubani wu-nagina-wala. Nugurru-waj danu nambarra-man.galagana warra-mulung-aynbaj. Yagu numburru-dhi-maṉdhina. Waadurru warraalaaladi-yinyung wurru-waṉbina runggal aladi. Nugurru nimbirrii-ḏiyaldhang anubani anaaladi. Yii! nimbirrimaa-ḏiyaldhang mana-yaaḻi yagu anaarrawindi-lhangu wurru-warra-waṉagana-yinyung ana-ngurrji.

24-25 Na-God ni-waḏa-waḏaḏ. Niga-waj nambani-waṉagana nguynju yagi yungguyung nurru-rabi. Niga-waj nambaniijarina anubani-yung anaarrawindi-yinyung anaaladi nugurri-wala. Nambani-lhangijgang nigawi-rruj wu-milhiynjina-rruj, marri numburru-ḏinggina runggal. Aynjaabu-nyung-bugij God, ngagurru ngarrani-wiri-gana-yinyung. Marri dagu nga ngaanu-warraarriwana, yagu yamba niga na-Jesus Christ, ngagurri-nyinyung na-Buunggawa. Nigaayung na-God, anubani-yung wu-milhiynjina-yinyung nigawi. Marri ni-runggal-windiyung. Niwu-waṉagana anaarrawindi-lhangu, marri ngarrani-narrii ngagurru warraarrawindi-lhangu. Dani-yung anu…bani-yunggaj ana-wulhu-wulhurr, marri ana-yimbaj, marri anggu-wuguuguni. Yijgubulu.