1 JUAN
Nacharam ẽsap Juanau phã deepʉ̈itarr
Khaíu phãjĩ. Mʉg carta jũrr Juan chi Jesuucha ich dʉ̈i nʉrramkhĩir jʉr autarrauta phãjim; ajapcharan Evangelio de San Juan phãtarr wounauma. San Juan gaai irua jaaujim, jãga ʉ̈u maach peerdʉajẽ; mamʉ jũrr mau mʉg ich carta nacharam gaai jaaujim, jãga mag ya ʉ̈u peerdʉwi nʉmjã maadëu khaphʉ aajẽ. Jöoi Juanau mʉg cartadam phãawai ya jöoiraa khitajim aajem.
Chijã khʉʉn atheeta phãjĩ maimua khan jawaagta phãjĩ. Juanau mʉg nacharam carta phãju nawe año khapan Cristoou maach peerdʉ aaujem iekhan ya õor ee aaidʉ wëjoojim aajem, durrpierr. Mamʉ mag nʉm ee ĩchab ich maagwaiweta sĩi Cristo iek awi parhoob nem jaaujem khʉʉn khĩirjug dʉ̈ita waaurëu jaau nʉrrjëe ajim anaabá. Makhʉʉnau jaauwai maach mor mʉg simʉn Ẽwandamau oowai nem ãkhãraaga simgui aajeejim anʉm. Magua amag chan pöd Cristo õor khĩir thegwi wounag paju khaba sĩejim anaabá. Mag wounag pawi maachjö mor paraa nʉrrʉm aiguin amagan Cristoon sĩi ich pekau eeta nʉrrʉmjö sĩejim anʉm. Mag amau jaau wënʉrrarr ʉ̈khapimaaugau Juanau jũrr amag, “Cristoon chadcha woun ajim, í maachjö ich mʉg sĩebajieb” a jaaupʉ̈ijim aajem (1:1-3; 4:1-3).
Maagwai jũrr ãaur khʉʉn mag sëukha wënʉrrarr khʉʉnau jaauwai Jesuun sĩi maachjöpaita sĩejim aajeejim anʉm; mamʉ mag ichpai Ẽwandamkha sĩerrʉm anʉmta amau ʉ̈khaba aajeejim aajem. Amau mag parhoob nem jaau nʉm ee, jũrr Juanau chi ʉ̈kha durrarr khʉʉnag, “Jesuuta warrgarwe ich Ẽwandamau ichdëucha jʉr auwi maach peerdʉ aumkhĩir pʉ̈iju aajerr Cristo khabahab” aajeejim anʉm, “ichta chadcha Ẽwandam Iewaa” (1:3,7; 2:22-23; 3:23; 4:15; 5:1,20).
Juanau chan makhʉʉn dënjö parhoob nem jawaag khaba maadëu Ẽwandam ajapha khaugwi i dënkha nʉisiewain ãba i ipierraanaa ichdëu khõsimjö wënʉrraajem a jawaagta mʉg ẽsap phãjim. Magta wënʉrrʉmʉn maadëu chadcha ich Ẽwandamjã khõsinaa, dich khapeenjã kha khõsi, mag nʉm dʉ̈i ĩchab sĩi parhooba dichdëu nem waum aig nem wauba aphöbaadëju (1:6-7; 2:4-6,9-11,28-29; 3:4-10,23; 4:7-8,20-21; 5:1-5).
1
Jesucristoouta õor iiupi wai sĩejem
1 Warr nem thum ompaawaiwe sĩerr igwiata mua mʉg ẽsap phã chirʉm, tagam khʉʉn ich Cristooucha jʉr autarr khʉʉn dʉ̈imua muajã mʉch jʉ̈gʉucha ũrwia mʉch daúacha ootarr jawaag; maachdëuta maach daúacha oonaa maach juaucha i gaai pʉrjim. Wajapcharan magan ar ʉ̈gthar õor öbërpiejemma, ich Cristo; i igwiata mua pãrag mʉg ẽsap phã chirʉm. 2 Mag ichdëuta õor Ẽwandam aar öbeerpiwia ich mag iiupiejemʉn warrgarwejã ich Aai dʉ̈ita sĩejeejim; pari magtarrta dau daaucha ich oopien bëewia marau maach daúachata i ootarr aawai maachdëu ootarrta jaau nʉm. 3 Mag maach daúacha oowia maach jʉ̈gʉucha ũrtarrpa pãrag jaau nʉmʉn, mʉg maachjã ich Jöoi chaar dʉ̈ijã khapeerkhanaa chi Iewaa Jesucristo dʉ̈ijã khapeerkha nʉmjö ĩchab pãarjã maach dʉ̈i khapeerkhanaa õor ãbpaimjö naamkhĩrau. 4 Mʉg thum ẽsap gaai mua phã deepʉ̈i chirʉmʉn, pãachdëujã cha mʉchdëu jaaupʉ̈i chirʉmjö abaawai warag pãach oneecha amkhĩrau.
Ẽwandaman õtdauu
5 Pãrag jaaumkhĩir ich Jesucristooucha marag jaautarr iekhan mʉgau: Ẽwandaman õtdau paa dʉnʉmjö araraata sim; i gaai bʉ̈ʉrjã pekau chukhu sĩewai i sim aig chan bʉ̈ʉrjã khĩkhĩsupaijã khaba sim. 6 I mag sim dʉ̈ita maachin khapeerkha nʉm. Pari mag i dʉ̈i khapeerkha nʉmta maachdëu nem khaigba wau nʉm gaaimua khĩchag eeta wënʉrrʉmjö nʉm chan magan maachin sëukhaawaita mag i dʉ̈i khapeerkha nʉm a iekha nʉm. Mag nʉm dʉ̈i ĩchab maachdëu nem waauwaijã khaigbata wau nʉmʉn magan parta mag i dʉ̈i nʉm a iekha nʉm. 7 Pari ich jãg Ẽwandamjã pekau chukhu ararag eeta sĩejemjö maachjã ĩchab pekau wauba nʉm gaaimua ararag eeta wënʉrrʉmjö nʉmʉn, magan Ẽwandamau dich khapeen dʉ̈ijã õor ãbamjö ö ãba apinaa ĩchab ichdëu ich Iewaa Jesucristoog ich bag maach kõit ãrtarrauta maach khaibagjã thumaa chugpaapiejem, ich jãg döou memerkhög ʉawai chugpaajemjö.
8 Maadëuta dich igwia bʉ̈ʉrjã pekau chukhum a nʉmʉn, chadcha pekaupanta mag pekau chukhum anaawai, maachdëupaita wir aig maach khũgur nʉm; mag nʉm aig chan chadam iekjã khaugbata nʉm. 9 Pari chadcha dich pekau pöm nʉm khap irigta chaigpanaa dich khaigba abarm jaaumʉn, magan chadcha Ẽwandamau nem agchata waaujeewai agpierr maach khaibagjã thum chugpaapʉ̈imaju. 10 Wa sĩi khãijã maadëu maar chan bʉ̈ʉrjã pekau wauba aajem a iekhakhiin, magan jũrr maadëu ich Ẽwandamta sëunemeg phë nʉm, i iek mag maachin thumta pekau pöm khithëem aajeewai. Mag nʉm aig chan magan maadëu i iek ʉ̈khabata nʉm.