Ri nabey wuj ri xutz'ibaj ri apóstol San Pablo chare ri Timoteo
Yare' ri nabey wuj ri xutek ri apóstol San Pablo chare ri Timoteo. Ri Timoteo jun c'ajol achi pastor riche (rixin) ri iglesia ri c'o pa tinamit Efeso. Riya' c'a ma jane c'o ta q'uiy runa'oj chi yeruc'uaj ri quiniman chic ri Dios, rumari' tek ri Pablo nutek re wuj re' riche (rixin) chi nupixabaj ri Timoteo chrij ri achique quic'uaxic nuben chique ri kach'alal, y nuya' chuka' na'oj chare ri achique nuben quiq'ui ri xa ma ya ta ri ruch'abel ri Dios niquitzijoj chiquicojol ri quiniman chic ri Dios. Y nucukuba' chuka' ruc'u'x chupan ri rusamaj ri Dios, riche (rixin) chi queri' ri Timoteo ntoc jun utzilaj rusamajel ri Dios.
Chupan ri tanaj 1 y napon c'a pa ruq'uisbel chare ri tanaj 3, ri Pablo nuk'alajsaj chare ri Timoteo ri achique nuben chi utz ruc'uaxic nuben chare ri iglesia. Y queri' chuka' quinojel ri yesamej pan iglesia, can pa ruchojmil tiquibana' chare ri rusamaj ri Dios.
Y chupan ri tanaj 4 y napon c'a pa ruq'uisbel chare ri tanaj 6, ri Pablo nuk'alajsaj más chare ri Timoteo ri achique utz chi nuben chiquicojol ri kach'alal, y ri achique chi na'oj ri utz chi nuya' chique chupan ri quic'aslen ri ruya'on ri Dios chique.
1
Ri San Pablo nutek el rutzil ruwech ri Timoteo
1 Riyin ri Pablo, yin jun ru'apóstol ri Jesucristo ruma queri' xubij ri Dios Kacolonel y queri' chuka' xubij ri Kajaf Jesucristo. Y can chrij wi c'a ri Ajaf Jesucristo cukul wi apo kac'u'x. 2 Ntz'ibaj c'a el re wuj re' chawe riyit Timoteo* Hch. 16.1. ri can yit achi'el nuc'ajol, ruma can animan wi ri Jesucristo. Ri utzil, ri joyowanic y ri uxlanibel c'u'x ri nuya' ri Katata' Dios y ri Kajaf Cristo Jesús xtic'oje' ta c'a pan awánima.
Ri Pablo nubij chare ri Timoteo chi tuchajij ri' chuwech ri tijonic ri xa ma ye kitzij ta
3 Y achi'el ri xinbij ca chawe tek riyin xipe wawe' pa Macedonia,† Hch. 20.1, 3. queri' chuka' nbij chawe wacami, chi cac'oje' na pa tinamit Efeso, ruma chiri' yec'o c'a ri niquic'ut ch'abel ri xa man achi'el ta nubij ri ruch'abel ri Dios.‡ Ga. 1.6, 7. Y nic'atzin chi nabij chique chi ma tiquic'ut ta ch'abel ri xa ma ye kitzij ta. 4 Chuka' tabij chique chi ma tiquiya' ta quixquin chare ri nitzijox chiquij ri winek ri xec'oje' ojer ca y ri nic'aj chic tzij ri xa choj ye tz'ucutajnek pe.§ 1 Ti. 4.7; 2 Ti. 2.23; 4.4; Tit. 1.14. Tzij achi'el ri' can yec'o pe y majun bey xqueq'uis ta. Yetzijolox, pero xa niquisuk' kana'oj. Y xa ma yojquito' ta riche (rixin) chi yojq'uiy chupan ri kac'aslen riq'ui ri Dios, c'aslen riche (rixin) ri kacukbel c'u'x riq'ui Riya'. Yac'are' nbij chawe.
5 Ronojel re nbij chawe, re' can ruma chi nwajo' chi can ta quinojel ri kach'alal nicajo' qui'* Ro. 13.8; Ga. 5.14. riq'ui jun cánima ch'ajch'oj,† Sal. 51.10; 2 Ti. 2.22. jun cánima ri nuna' chi utz c'o chuwech ri Dios, y riq'ui chuka' jun kitzij cukbel c'u'x. 6 Ruma yec'o nic'aj ri xa xquiya' ca rubanic ronojel re'. Xaxu (xaxe) wi chic tzij ri majun rejkalen ri yequibila'. 7 Riye' nicajo' yequitijoj ri winek chare ri ruley ri Dios ri rutz'iban ca ri Moisés. Pero xa ma nik'ax ta chiquiwech ri nubij ri ley ri'. Ni ma quetaman ta chuka' ri achique yequibila' chrij ri nubij ri ley.
8 Riyoj ketaman chi ri ley ri' can utz wi.‡ Neh. 9.13; Ro. 7.12. Pero nic'atzin chi nucusex pa ruchojmil. 9 Y ketaman chuka' chi ri ley ma xya'ox (xya') ta pa quiwi' ri winek ri choj quic'aslen. Ri ley xa xya'ox (xya') pa quiwi' ri winek ri ma yeniman ta tzij,§ Ga. 3.19. pa quiwi' ri ma utz ta quic'aslen chuwech ri Dios, ri aj maqui', ri c'o itzel pa tak cánima, ri niquixolk'otij ri rubi' ri Dios, ri yequicamisala' quite' quitata', ri yequicamisala' xabachique winek.* Ap. 21.8. 10 Chuka' ri ley c'o pa quiwi' ri achi'a' y ri ixoki' ri niquicanoj qui' riche (rixin) chi yemacun y xa ma quic'ulaj ta qui',† He. 13.4. y pa quiwi' ri achi'a' ri xa quiq'ui quech achi'a'‡ 1 Co. 6.9. yemacun wi. C'o chuka' pa quiwi' ri ye'elek'an winek,§ Ex. 21.16. pa quiwi' ri yebin ch'abel ri ma kitzij ta, pa quiwi' ri can niquinataj wi rubi' ri Dios tek yetzijon riche (rixin) chi ninimex ri niquibij,* Mt. 5.33. pero xa ma kitzij ta ri niquibij. Y c'o chuka' pa quiwi' ri winek ri ye'etzelan† 2 Ti. 4.3. ri ruch'abel ri Dios. 11 Queri' nubij ri lok'olaj ch'abel ri niya'o colotajic, ruch'abel ri nimalaj Dios ri nikaya' ruk'ij ruc'ojlen. Y ya c'a ch'abel re' ri chilaben chuwe riyin chi ntzijoj.‡ 1 Ti. 2.7.
Ri samaj ri chilaben chare ri Pablo ruma ri Dios
12 Sibilaj c'a yimatioxin chare ri Kajaf Cristo Jesús, ri can ruya'on wuchuk'a' y rucukuban ruc'u'x chuwij chi can nben wi ri rusamaj. Rumari' xuben chuwe chi xinoc rusamajel.§ Col. 1.25. 13 Queri' xuben chuwe, astape' tek rubanon ca xa xiyok'on chrij, y xenya' pa tijoj pokonal* Hch. 8.3; 9.1. ri winek ri quiniman Riya'; y q'uiy pokon ri xinbanala' chique. Pero ri Ajaf xujoyowaj nuwech, ruma ri tiempo ri' riyin ma wetaman ta ri xenbanala'† Lc. 23.34. ruma ma jane nuniman ta ri Jesucristo. 14 Yac'a ri Kajaf Dios sibilaj nim rutzil‡ Lc. 7.47; 1 Co. 15.10. ri xuya' pa nuwi'. Ruma xuben chuwe chi xincukuba' nuc'u'x riq'ui y xuya' chuka' ajowabel pa wánima can achi'el ri yatajnek chique ri xa jun chic quibanon riq'ui ri Cristo Jesús.
15 Y re ch'abel re nbij chawe wacami, can kitzij wi, y ruc'amon chi ninimex cuma quinojel: Chi ri Jesucristo xpe chuwech re ruwach'ulef chiquicolic ri aj maqui',§ Mt. 9.13; 1 Jn. 3.5. y yin c'a riyin ri más yin aj mac que chiquiwech ri nic'aj chic aj maqui'. 16 Pero astape' ta na chi q'uiy ri numac riyin, ri Jesucristo xujoyowaj nuwech y xucuy numac riche (rixin) chi xuc'ut chiquiwech ri winek chi Riya' sibilaj nicoch'on. Xucuy numac riyin riche (rixin) chi xinoc jun c'ambel na'oj chiquiwech ri winek ri xqueniman riche (rixin), chi xabachique ta na rubanic ri quimac, xquerucuy riche (rixin) chi niquil ri c'aslen riche (rixin) xtibe k'ij xtibe sek. 17 Ri Dios can ya Riya' ri Rey* Sal. 10.16; 45.1, 6. riche (rixin) ronojel tiempo re benak,† Sal. 145.13; Dn. 2.44; 7.14; Mi. 5.2. Riya' ma camel ta, ni ma tz'etetel ta, y xaxu (xaxe) wi Riya' ri Dios y nimalaj etamanel. Can ta xtiya'ox (xtya') ruk'ij ruc'ojlen Riya' riche (rixin) xtibe k'ij xtibe sek.‡ Mt. 6.13. Amén.
18 Y riyit Timoteo ri can yit achi'el nuc'ajol, nbij c'a chawe chi man c'a tamestaj ta ri bin ca cuma ri kach'alal chi xatoc jun rusamajel ri Dios. Y ri' can ya wi ri Dios ri xk'alajsan chiquiwech riye'.§ 1 Ti. 4.14. Man c'a tamestaj ta. Xa can tatija' ak'ij chi naben ri samaj ri bin ca chawe chi naben, can achi'el nuben jun utzilaj soldado. 19 Riyit cukul chic ac'u'x riq'ui ri Dios, y ri awánima nuna' chi utz c'o chuwech ri Dios,* 1 Ti. 3.9. y can quec'ari' tabana'. Ruma yec'o kach'alal ri ma que ta ri' xquiben, y rumari' xsach quic'u'x. 20 Queri' xquiben ri Himeneo† 2 Ti. 2.17. y ri Alejandro,‡ 2 Ti. 4.14. y rumari' xenjech pa ruk'a' ri Satanás, riche (rixin) chi queri' tiquetamaj chi ma tiquiyok' ta ri Dios.
*1:2 Hch. 16.1.
†1:3 Hch. 20.1, 3.
‡1:3 Ga. 1.6, 7.
§1:4 1 Ti. 4.7; 2 Ti. 2.23; 4.4; Tit. 1.14.
*1:5 Ro. 13.8; Ga. 5.14.
†1:5 Sal. 51.10; 2 Ti. 2.22.
‡1:8 Neh. 9.13; Ro. 7.12.
§1:9 Ga. 3.19.
*1:9 Ap. 21.8.
†1:10 He. 13.4.
‡1:10 1 Co. 6.9.
§1:10 Ex. 21.16.
*1:10 Mt. 5.33.
†1:10 2 Ti. 4.3.
‡1:11 1 Ti. 2.7.
§1:12 Col. 1.25.
*1:13 Hch. 8.3; 9.1.
†1:13 Lc. 23.34.
‡1:14 Lc. 7.47; 1 Co. 15.10.
§1:15 Mt. 9.13; 1 Jn. 3.5.
*1:17 Sal. 10.16; 45.1, 6.
†1:17 Sal. 145.13; Dn. 2.44; 7.14; Mi. 5.2.
‡1:17 Mt. 6.13.
§1:18 1 Ti. 4.14.
*1:19 1 Ti. 3.9.
†1:20 2 Ti. 2.17.
‡1:20 2 Ti. 4.14.