Muⱪeddes Kalam (yǝngi yeziⱪ) Əstǝr 7

Əstǝrning padixaⱨⱪa Ⱨamanning yaman ƣǝrizini eytixi

1 Xuning bilǝn padixaⱨ bilǝn Ⱨaman hanix Əstǝrning ziyapitigǝ dahil boluxⱪa kǝldi. □ 2 Padixaⱨ ikkinqi ⱪetimliⱪ ziyapǝt üstidǝ xarab iqiliwatⱪanda Əstǝrdin: — I hanix Əstǝr, nemǝ tǝliping bar? U sanga ijabǝt ⱪilinidu. Nemǝ iltimasing bar? Ⱨǝtta padixaⱨliⱪimning yerimini iltimas ⱪilsangmu xundaⱪ ⱪilinidu, — dedi.

3 — Əgǝr nǝzǝrliridǝ iltipatⱪa erixkǝn bolsam, i aliyliri, wǝ padixaⱨimƣa muwapiⱪ kɵrünsǝ, mening iltimasim ɵz jenimni ayiƣayla, xuningdǝk mening tǝlipim ɵz hǝlⱪimni saⱪliƣayla; 4 qünki biz, yǝni mǝn wǝ mening hǝlⱪim birgǝ yoⱪitilip, ⱪirilip, nǝslimizdin ⱪurutuluxⱪa setiwetilduⱪ. Əgǝr biz ⱪul wǝ dedǝklikkǝ setiwetilgǝn bolsaⱪ, süküt ⱪilƣan bolattim; lekin padixaⱨimning tartidiƣan ziyininimu düxmǝn tɵlǝp berǝlmǝytti, — dǝp jawap bǝrdi Əstǝr.□

5 Padixaⱨ Aⱨaxwerox hanix Əstǝrdin: — Bundaⱪ ⱪilixⱪa petinƣan kixi kim ikǝn? U ⱪǝyǝrdǝ?! — dǝp soridi. Əstǝr jawabǝn: —

6 Bu düxmǝn wǝ zǝⱨǝrhǝndǝ mana muxu rǝzil Ⱨaman! — dewidi, Ⱨaman padixaⱨ bilǝn hanix aldida xu zamatla dǝkkǝ-dükkigǝ qüxti.

Ⱨamanning ɵzi tǝyyarliƣan darƣa esilixi

7 Xuning bilǝn padixaⱨ ⱪǝⱨri-ƣǝzǝpkǝ kelip ziyapǝt-xarab üstidin turdi-dǝ, qaribaƣⱪa qiⱪip kǝtti; Ⱨaman bolsa hanix Əstǝrdin jenini tilǝxkǝ ⱪaldi; qünki u padixaⱨning ɵzigǝ jaza bǝrmǝy ⱪoymaydiƣan niyǝtkǝ kǝlgǝnlikini kɵrüp yǝtkǝnidi. 8 Padixaⱨ qaribaƣdin ziyapǝt-xarab dastihiniƣa ⱪaytip kǝlginidǝ Ⱨamanning ɵzini Əstǝr yɵlǝngǝn diwanƣa taxliƣiniqǝ turƣinini kɵrdi-dǝ: —

— Ⱪara, uning ordida mening aldimdila hanixⱪa zorluⱪ ⱪilƣiliwatⱪinini?! — dewidi, bu sɵz padixaⱨning aƣzidin qiⱪixi bilǝnla adǝmlǝr Ⱨamanning bax-kɵzini qümkǝp ⱪoydi. □ 9 Padixaⱨning aldida turuwatⱪan ⱨǝrǝm’aƣiliridin Ⱨarbona isimlik birsi: — Yǝnǝ bir ix bar, mana, Ⱨaman aliylirining ⱨayati üqün gǝp ⱪilƣan Mordikayni esix üqün, ǝllik gǝz igizliktǝ yasatⱪan dar tǝyyar turidu, u dar ⱨazir muxu Ⱨamanning ⱨoylisida, dewidi, padixaⱨ: — Ⱨamanni uningƣa esinglar! — dedi. 10 Xuning bilǝn ular Ⱨamanni u Mordikayƣa tǝyyarlap ⱪoyƣan darƣa asti; xuning bilǝn padixaⱨning ƣǝzipi besildi.

□7:1 «...Əstǝrning ziyapitigǝ dahil boluxⱪa kǝldi» — ibraniy tilida «... Əstǝrning ziyapitigǝ iqixkǝ kǝldi».

□7:4 «Əgǝr biz ⱪul wǝ dedǝklikkǝ setiwetilgǝn bolsaⱪ, süküt ⱪilƣan bolattim; lekin padixaⱨimning tartidiƣan ziyininimu düxmǝn tɵlǝp berǝlmǝytti» — baxⱪa birhil tǝrjimisi: — «Əgǝr biz ⱪul wǝ dedǝklikkǝ setiwetilgǝn bolsaⱪ, mǝn süküt ⱪalattim; qünki biz tartidiƣan külpǝtning padixaⱨni awarǝ ⱪilƣuqiliki yoⱪ idi». «Düxmǝn padixaⱨimning tartidiƣan ziyininimu tɵlǝp berǝlmǝytti» degǝnning mǝnisi bǝlkim birinqidin, Yǝⱨudiylar ⱪul-dedǝk ⱪilinsa baj tɵlimǝytti; ikkinqidin, Huda Ibraⱨimƣa: «Kim sǝn wǝ ǝwladliringni ⱪarƣiƣan bolsa mǝn uni ⱪarƣaymǝn, sǝn wǝ ǝwladliringni kim bǝrikǝtligǝn bolsa mǝn uni berikǝtlǝymǝn» dǝp wǝdǝ ⱪilƣanidi («Yar.» 12:2-3). Kim Yǝⱨudiy hǝlⱪigǝ ziyankǝxlik ⱪilsa, Hudaning jazasini tartidu. «Ⱪoxumqǝ sɵz»imiznimu kɵrüng.

□7:8 «bax-kɵzini qümkǝp ⱪoydi» — bǝlkim ɵlüm jazasiƣa mǝⱨkum ⱪilinƣanlar padixaⱨning yüzini kɵrmisun dǝp xundaⱪ ⱪilƣan bolsa kerǝk.