15
Resa Palaloh Jesus Imol Pilatus
(Matthew 27:1–2, 11–14; Luke 23:1–5; John 18:28–38)
1 Lemaguyog chog ngo tamol temarong kowe mo mal kowe yar mo mokawe sensel Hatobtob we mo panger loh chol Ttey we resa hanngeta yar ttey bo rebe gola mele rebe foru. Resa chena Jesus resa palaloh irel Pilatus. 2 Pilatus sa kasiya bo, “Gel mele king we yar Jews?”
Iwe ngo Jesus sa kangalu bo, “Gel mele ho sor.”
3 Ye cholop mekla tamol temarong kowe re sor le derel Jesus. 4 Iwe Pilatus sa wol kasiya le ye sor bo, “Kemahoy lepal mekla yarmat re sosor le derem, tor mele hobe sor iyang?”
5 Ye lluwdah Pilatus irel molwe Jesus ye tay mechal sor sepad hapatpat.
Jesus We Re Sor Bo Be Mes
(Matthew 27:15–26; Luke 23:13–25; John 18:39—19:16)
6 Pangal yal ma hola molwe Bungul Paska ngo Pilatus yema toa hachuya semal mo lal kalbus le yarmat cholop rebe dangro. 7 Irel yodle ngo ye mel semal mal le Barabbas idal mo luwulur chol kalbus kowe le ye daber rechokwe re fedeg ngal Am. Luwul wahaha we ngo ye llimeseloh semal yarmat. 8 Rela ttey fengal buwa we ngo resa dangro Pilatus molwe yema faesul foru. 9 Iwe Pilatus sa kasiyar bo, “Ha dipli bo ibe taldi king le yar Jews?” 10 Pilatus ye faesul gola le tamol temarong kowe re hasidoh Jesus irel le fael yar loltomay irel.
11 Iwe ngo tamol temarong kowe resa hakkela ngalir chog yarmat bo rebe kangalu Pilatus le Barabbas mele yebe taldi. 12 Iwe ngo Pilatus sa wol maliliy ngalir buwa we le ye sor bo, “Meda mele ha dipli le iy be faor ngal yeramtale ha sor bo yar Jews king?”
13 Resa tawulagli le re sor bo, “Ha krudu!”
14 Pilatus sa kasiyar bo, “Meda tayikof le yeramtale sa foru?”
Iwe ngo resa hapalingi tot yar tawulagli le re sor bo, “Ha krudu!”
15 Pilatus ye dipli le yebe hafle deper buwa we iwe sa taldi Barabbas ngo sa sor bo rebe wwodu Jesus ngo resa hasiloh bo re bela krudu.
Saldaw Re Tape Jesus Kamemal
(Matthew 27:27–31; John 19:2–3)
16 Saldaw kowe resa hasilong Jesus lal yororol imw we imwel tamol Aam we ngo resa rol ttey fengal mo panger saldaw kowe choluwar. 17 Resa hamengagu ngal sew mengagucha ngo resa ffaor marel ral ire we yor chil iwe resa hamarmare ngali. 18 Iwe resa budoh hasorol tamol ngali ngo resa sor bo, “Yebe sulay King le yar Jews!” 19 Resa wwodu molwe chemal ngal setab ire ngo re gutdah uwol ngo resa hasubgudiy resa cchem ngali. 20 Yodwe rela mol irel yar tapeli fedaley kamemal ngo resa hachuya mengagucha we re hamengagu ngali resa hatefaelidah molwe faesul mengagol uwol. Iwe resa paliloh bo re bela krudu.
Jesus We Re Krudu
(Matthew 27:32–44; Luke 23:26–43; John 19:17–27)
21 Yodwe re loloh ngo re sala chungu semal mal le Simon idal le ye budoh mo solbos sa bubulong lal haplom we. Iwe ngo saldaw kowe resa ddingi ngali bo yebe hasi krud we yael Jesus. (Simon ila semal yeramtal Cyrene ngo iy mele temal Alexander mo Rufus.) Ro 16:13 22 Resa paliloh Jesus irel loboswe rema sor bo Golgotha, le fael mele ila “Liliyel Pol Fusug”. 23 La lobole ngo resa fang lemel Jesus wine le resa peda ngal samat tafey le rema sor bo myrrh ngo Jesus ye temechal yul. 24 Iwe resa krudu ngo resa hamahla mokwe mengagol uwor wol miril yar sulbeli hare mengag kefa mele semal mo semal ir yebe hasi. Ps 22:18 25 Re krudu irel molwe sa duwow kolok lemaliyel. 26 Ye teftaf fael yar krudu le ye sor bo, “King we yar Jews.” 27 Re wol krudu rumal chotayikof mo lengchel Jesus le semal mo rela gilemra ngo semal mo rela gilchegil. 28 (Ila sala lahloh le tos molwe Babior we ye Santus ye sor, “Yesa chilag ngalir chotayikof irel hagerger kala yar.”) Is 53:12
29 Rechokla re dedarloh lengchel lobowe ila rema yuchgaloh chemer ngo resa hapatpat tayikof loh irel Jesus le rema sor bo, “Yuu! Gel molwe ho sor bo hobe hatawsi Templum we ngo bela solral ngo sa mol yam hasu tefaeli! Ps 22:7; 109:25; Mk 14:58; Jn 2:19 30 Ila, bidiy mo woal krud la bo hode mes!”
31 Ye wol ila senger tamol temarong kowe mo mokwe sensel Hatobtob we bo re tape Jesus kamemal le rema sor bo, “Ye yoh ngali le yebe hamolowar yarmat ngo ye teyoh le be hamolowa iy llufulyal! 32 Siya kemahoy Kristus le yar re Israel King, le hare be bidiy mo wol krud la igla, ila ngo sibe chepar ngali!”
Wol ila senger rechokwe rumal we re krud sew mo Jesus bo ye wol tayikof yar hapatpat ngali.
Jesus We Ye Mes
(Matthew 27:45–56; Luke 23:44–49; John 19:28–30)
33 Yodwe yela wwel yaal ngo sa ruchupung loh wulfuluy le suluw awa sulayel. 34 Molwe yela suluw kolok ngo Jesus sa tawulagliloh le ye sor bo, “Eloi, Eloi, lema sabachthani?” Fael mele ila ye sor bo, “Yai Deus, yai Deus, meda mele hosa ttahcheyey loh iyang?” Ps 22:1
35 Tot rechokwe re mel lobos we re rongrong yalol Jesus ngo resa sor bo, “Ha talenga, yesa fefesangu Elijah!” 36 Sa hamdaloh semal mo irer le ye hasi sedep forwa le yesa chiri ngal wine kowe ye mwall sa fodadah wol setab ire sa hadingadah irel molwe yewal Jesus ngo sa sor bo, “Ha widyey sibe kemahoy hare Elijah be bidiy be hachuya mo wol krud le!” Ps 69:21
37 Jesus ye ttawul loh ngo sa chuyloh yal ngas.
38 Iwe ngo sa ssahagloh mengag we ye hopa Templum we sala rudep mo iyang. Ex 26:31–33 39 Tamol saldaw we ye su mo imol krud we ye wiri yael Jesus mes. Iwe ngo sa sor bo, “Tosol bo mal le ila Lol Deus!”
40 Yor tot fefel le re kekaladoh mo medaw. Luwelur fefel kowe ngo ye mel Mary Magdalene mo Salome mo Mary, we sil James we miril yarmat ngo wol sil Joses. 15:40–41; Lk 8:2–3 41 Ye chaep chog yar dabey Jesus irel yodwe ye chil mel wol Galilee iwe ngo rema kekamale fedaley. Ye cholop fefel kala re dabedoh wol Jerusalem le re mel lobowe.
Jesus We Re Leba
(Matthew 27:57–61; Luke 23:50–56; John 19:38–42)
42-43 Yodwe sa pal loh yaal ngo sa dohdoh Josephel Arimathea we. Iy ila semal chol Ttey we ngo ye ssor fael yal yengang. Joseph ye chil wiwidi yodla be budoh mala Lamliyel Deus iyang. Rallale ila rael yar Hafelfel (mele ila rallawe bele chaep Sabbath). Sa yedamgel Joseph sala dangoro Pilatus molwe porgol Jesus bo yebe hasi. 44 Ye lluwdah Pilatus irel molwe yela rongrong bo sa mes Jesus. Iwe sa ffesangu tamol saldaw we sa kasiya hare sa sulay yal mes Jesus. 45 La wol miril molwe Pilatus sa rongrong mokwe tamol saldaw we ye kangalu, ngo sa moch kangalu Joseph bo bela hasi molwe porgol Jesus. 46 Iwe Joseph sala chuwayi sew mengag ngo sa hachuyadiy Jesus mo woal krud ngo sa hasi mengag we sa dugmi ngali. Yesa hasi molwe porgol Jesus yesa yetolong lal sew pey le ye kil long mo wolpegil sew hohyal. Iwe sa hatapuludoh sew porow le ye palleng sa pelta ngal hatmal pey we. 47 Mary Magdalene mo Mary we sil Joses re kekemahoy re sala gola loboswe ye mel molwe porgol Jesus iyang.