1 F’ihe, Taroño ze mañeva atao enta-mahity, 2 hahapendreñe o androanavio ho vañoñe, hilie-batañe, higahiñe am-patokisañe, an-koko naho am-pahaliñisañe; 3 manahake zay o rakemba beio, t’ie ho vañon-dia mpañeveñe aman-Kake, tsy mpikanifoke, tsy ondevozen-divay, fa mpañoke havañonañe; 4 mpanoro o ampelao ho hendre, mpikoko valy naho mpitea anake; 5 ie mahalie-troke, tsy aman-kila, mahay mañalahala anjomba, matarike, mpiandaly ami’ty vali’e; soa tsy honjirañe ty tsaran’ Añahare.

6 Osiho ka o ajalahio te hilie-batañe. 7 Le an-tsata’o iaby, mañaveloa ho fitsikombeam-pitoloñan-tsoa* Mat 16:27, ho mpañoke vantañe vaho migahiñe, 8 añ’enta mifehe, tsy itiñeañe, hanalarañe ty mandietse, tsy hinjeañe.

9 Osiho ondevoo hiambàne amo tompo’eo, hampifalea’e an-tsata’e iaby, vaho tsy hanointoiñe; 10 tsy hampikametse, te mone hitoloñe am-patokisañe do’e, soa te ho bangoe’e amy ze he’e ty fañòhan’ Añahare Mpandrombake antikañe.

11 Fa niboake ty hasoan’ Añahare minday fandrombahañe ho a ze kila ondaty, 12 mañoke antika halaiñe ty hatsi-an-Kake naho o hadrao’ ty voatse toio; naho ty hilie-batañe an-kavañonañe, vaho hañori-Kake ami’ty sà toy, 13 ie liñisantika i fitamàñe andriañañey—i fiboaham-bolonahen’ Añahare jabahinakey, Iesoà Mpandrombake Norizañey, 14 i namoe’ay hijebañe antika amy ze fonga fandilaran-Kakey† Jn I 3:4, Mat 1:21, Top 3:19, 3:26, 26:18, Rom 6:1-22, Efe 2:1-10, Jn I 3:8, Tit 3:5, hañefera’e ho aze ondaty mahimbañe am-pitoloñan-tsoao‡ Mat 16:27.

15 Itaroño naho añosiho naho añereto an-dily fonitse vaho ko apo’o honjiren-drehe.