1 Tovo’ ty razan-tsaontsi’

i Selomò iretiañe,

o nitsikombean-droandria’

i Kez’kia, mpanjaka’ Iehodao.

2 Engen’Añahare ty mampikafi-draha,

naho volonahe’ o mpanjakao

ty mañotsohotso.

3 Ty haabo’ i likerañey,

ty halale’ ty tane toy,

zay ty hasaro-pitsikarahañe

ty arofom-panjaka.

4 Afaho amo volafotio ty taim-pira’e,

le ho amam-panefea’e finga ty mpanefe;

5 asitaho añatrefa’ i mpanjakay

o tsereheñeo,

le hijadoñe an-kavantañañe

ty fiambesa’e.

6 Ko mañonjom-bata

añatrefa’ i mpanjakay,

ndra mijohañe an-toe’ o aman-kasiñeo;

7 Hàmake te anoeñe ama’o ty hoe:

Miheova mb’aolo atoa,

ta t’ie hareke añatrefa’ o roandriañe

niisam-pihaino’oo,

8 ko malisa hanese sisy;

fa inoñe ty hanoe’o ampara’e,

t’ie ampisalara’ indatiy?

9 Mifandahara hey am’indatiy

le ko borahe’o ty tsikenta’ ondaty;

10 tsy mone hinje’e te mahajanjiñe,

vaho tsy ho modo ty halolo-lahi’o.

11 Hoe raketa volamena

niravaheñe volafoty

ty saontsy soa mañeva.

12 Hoe bange volamena naho

ravake volamena ki’e,

ty endake an-kihitse

an-dravembia mahafijanjiñe.

13 Hambañe ami’ty hanintsim-panala

am-bolam-binta

ty ìrake lili-po amo mpañirak’ azeo;

ie ampanintsiñe’e ty arofo’ o talè’eo.

14 Hoe rahoñe miharo tioke

tsy amañ’orañe

ty misenge ravoravo tsy atolo’e.

15 Mete handreketse ty mpifehe

ty fahaliñisañe,

naho mahafipoza-taolañe

ty fisaontsy malea.

16 Ihe tendreke tantele,

mikama ze mahaeneñe,

kera habodàja’o te mitipak’ eratse.

17 Soa re te tsy siak’ añ’akiban-drañe’o ao o fandia’oo,

tsy mone ho etsak’ azo, vaho ho heje’e.

18 Hoe kobaiñe, naho fibara,

vaho ana-pale masioñe

ty manara-bande ama’ ondaty.

19 Hoe nife folake ndra fandia mikoletra

ty fiatoañe ami’ty mpamañahy

an-tsam-poheke.

20 Hoe mañafa-tsaroñe

añ’andro manintsy,

ndra ty vinegra nalaro sokay

ty mibeko ami’ty milendèñe.

21 Ie saliko ty rafelahi’o,

anjotso mahakama;

ie taliñiereñe, fahano rano;

22 zay ty hamotria’o foroha mirekake

añ’ambone’e eo,

vaho hanambe azo t’Iehovà.

23 Minday orañe ty tiok’ avaratse,

naho minday laharañe miloroloro

ty lela manao tsikony.

24 Hàmake himoneñe

añ’ilan-tampenak’ ao,

ta te añ’anjomba mitraoke

aman-drakemba mpitrabike.

25 Hoe rano manintsy

ami’ty maran-drano,

ty talily soa boak’an-tsietoitàne añe.

26 Hoe rano manganahana

nileoren-ditsake,

naho vovoñe nitivaeñe,

ty vantañe miheve ty lo-tsereke.

27 Tsy mahasoa te mikama tantele maro,

vaho tsy enge’o t’ie mandrenge vatañe.

28 Hoe ty fiboroboñafañe an-drova

tsy aman-kijoly,

t’indaty tsy maha-lie-batañe