1 א Hedèy te nakopo’ i Talè an-drahoñe ao t’i Tsione amy haviñera’ey!

Naretsa’e boak’ an-dikerañey

pak’ an-tane eo

ty hatsomerentsere’ Israele,

vaho nandikofa’e ty fatimpaha’e

amy androm-pifomboa’ey.

2 ב Fa nagedra’ i Talè

tsy aman-tsehanga’e o kiboho’ Iakobeo,

vaho tsy niferenaiña’e;

fa nafetsa’e ambane eo o kijoly fatrats’

i anak’ ampela’ Iehodàio;

ie nafotsa’e an-tane;

tiniva’e i fifeheañey

naho o roandria’eo.

3 ג Fa naitoa’e an-kaviñerañe

mena ty tsifa’ Israele;

nasita’e aolo’ i rafelahiy

ty fità’e havana;

vaho finorototo’e hoe

afo misolebatse t’Iakobe,

afo mangotomomoke mb’eo mb’eo.

4 ך Nabitso’e hoe rafelahy ty fale’e,

najado’e hoe ravetro ty fità’e,

vaho zinama’e iaby ze nisoa am-pihaino;

an-kivoho’ i anak’ampela’ i Tsioney

ty nampidoandoaña’e

ty haviñera’e hoe afo.

5 ה Fa ninjare rafelahy t’i Talè henanekeo,

fa nigenohe’e t’Israele;

hene nabea’e o sokemitraha’eo,

rinotsa’e o fipalirañe fatratseo;

vaho nampitomboe’e amy

anak’ampela’ Iehodày

ty fangololoihañe naho fandalàñe.

6 ו Hinatsakatsa’e i kivoho’ey

hoe t’ie nigoloboñe;

nampiantoe’e i toem-pivori’e namotoañañey;

nampahaliñoe’ Iehovà e Tsione ao

o Famantañañeo naho o Sabatao,

vaho ninjè’e ami’ty fitorifiha’

i fifomboa’ey i mpanjakay

naho o mpisoroñeo.

7 ז Navokovoko’ i Talè i kitreli’ey,

nampangorìñe Aze i toe’e niavakey;

napo’e am-pitan-drafelahy

o rindrin’ anjombao:

ie nikorake añ’anjomba’

Iehovà ao, manahake

te añ’androm-pivory miavake.

8 ח Sinafiri’ Iehovà ty handrotsake

ty kijoli’ i anak’ ampela’ i Tsioney;

fa kinazazà’e ty taly,

tsy nampoli’e ty fità’e

tsy handrotsake;

nampirovete’e iaby ty fahañe

naho ty rindriñe;

mitrao-pinìke iereo.

9 ט Nalentek’ an-tane ao

o lalam-bei’eo;

fa rinotsa’e vaho pinoza’e

o sikada’eo;

songa an-tane tsy mitan-Kàke

i mpanjaka’ey naho o roandria’eo;

eka tsy manjo aroñaroñe boak’

am’ Iehovà o mpitoki’eo.

10 י Mitozòke an-tane eo

ty androanavi’ i Tsione,

mijomohoñe,

nampibobò deboke añ’ambone’eo;

midian-gony am-baniañe;

miondre-doha’ mb’an-tane

o somondrara mieha’ i Tsioneo.

11 כ Milesa o masokoo ty amo ranomasoo, mioremeñe ty troko;

fa nadoañe an-tane ty ateko,

ty amy fandrotsahañe

i anak’ampela’ ondatikoy,

ty amo anak’ajajao naho o mpinono

mitoirañe an-dalan-drovao;

12 ל Hoe iereo aman-drene,

aia ty tsako naho ty divay?

ie tsipike hoe mate an-dala’ i rovay ey

ie midoañe añ’arañan-drene’e ao

ty fiai’ iareo.

13 מ Akore ty havereko azo?

Añoharako ami’ty inon-drehe

ry anak’ ampela’ Ierosalaime?

Ino ty hañirinkiriñako ama’o

hañohòako azo,

ry anak’ampela’ i Tsione?

Fa mienene manahake i riakey

ty fere’o, ia ty hahamelañe azo?

14 נ Nahaisak’ aroñarom-bande

naho hagegeañe ho azo o mpitoki’oo;

vaho tsy nabora’ iareo o tahi’oo,

hampipoliañe azo boak’an-drohy ao,

fa fetsen-dremborake ty niisa’ iareo,

toe talim-pandroahañe.

15 ס Songa miteha-pitañe ama’o

ze miary eo;

sindre mikosake naho mikofikofi-doha amy

anak’ampela’ Ierosalaimey

manao ty hoe:

Itoy hao i rova nitokaveñe ty hoe:

Fahafoniran-Kasoa Vintañe,

ty firebeha’ ty tane-bey toiy?

16 פ Nampidañadaña falie ama’o

o fonga malaiñe azoo;

mikosasàke naho mikodrìtse nife

manao ty hoe:

Fa nabean-tika;

itoy ‘nio i andro nitaman-tikañey,

fa tendreke, le isake.

17 ע Fa nanoe’ Iehovà i naereñere’ey;

fa nihenefa’e i fetse najado’e

añ’andro taoloy;

fa naretsa’e ambane eo le tsy niferenaiña’e;

vaho nampirebehe’e ama’o o rafelahi’oo;

naonjo’e ty tsifa’ o malaiñ’azoo.

18 צ Mitoreo añ’arofo amy Talè iereo:

O ry kijoli’ i anak’ampela’ i Tsioney,

ampikararaho ranomaso hoe

sorotombake handro an-kaleñe;

ko ampahazoe’o fiaiñe ty fañova’o;

ko ampitofa’o o fihaino’oo.

19 ק Miongaha, mikoeaha te haleñe,

ami’ty fiorota’ o fijilovañeo;

adoaño ty arofo’o hoe

rano añatrefan-dahara’ i Talè;

añonjono fitañe ama’e ho ami’ty fiai’

o keleia’o mitoirañe ami’ty kerè

an-doha o lalañeo iabio.

20 ר Hehe ry Iehovà biribirio:

ia o nanoa’o o raha zaoo?

Habotse’ o rakembao hao

o tolin-tsabo’eo?

o ajaja otroñe’e am-pitàñeo?

Ho zamaneñe an-toe’ i Talè miavak’ ao hao

ty mpisoroñe naho ty mpitoky?

21 ש Ty tora’e naho ty androanavi-bey,

songa màndre an-tane an-dalañe eo;

o somondrarakoo naho o ajalahikoo,

fonga zinevo’ i fibaray;

binaibai’o amy andron-kaviñera’oy

zinama’o fa tsy niferenaiña’o.

22 ת Kinoi’o hoe añ’androm-

pivory miavake,

o hekoheko miariseho ahikoo;

vaho leo raike tsy nahabotatsake,

tsy nanisañe amy andron-kaviñera’

Iehovày;

o notroñekoo naho nibeizekoo

ro fonga nabea’ i rafelahiy.