2 Ee t’ie nanahake o volañeo,

naho o andro narovan’ Añahare ahikoo;

3 ie niiloilo ambone’ lohako eo ty failo’e,

naho i hazavà’ey ty nirangako añ’ieñe ao;

4 ie tañ’andro naha añoñ’ay ahy,

vaho tambone’ kibohoko eo

ty firañetan’ Añahare;

5 ie mbe tamako t’i El-Sadai,

naho niarikoboñ’ ahy o keleiakoo;

6 ie nisasan-kendron-dronono o liakoo,

vaho nadoandoa’ o vatoo amako

ty menake!

7 Ie niakatse mb’an-dalambein-drova mb’eo raho,

ie rinambeko antameañe eo

i fitobohakoy.

8 Nisitak’ ahiko o ajalahio te zoeñe,

songa niongake ty bey vaho nijohañe;

9 Nitroatse ami’ty fivesoveso’e

o roandriañeo vaho nitàm-palie.

10 Nianjiñe ty fiarañanaña’ o roandriañeo,

le nipitek’ an-dañilañy o famele’eo.

11 Ie jinanjin-dravembia,

le natao’e haha raho,

ie niisam-pihaino, le nitalily ahy;

12 amy te rinombako ty rarake

nikai-drombake,

i bode-rae tsy amam-pañimbay.

13 Nivotrak’ amako ty tata’ i nipetrokey,

vaho nampisaboeko an-kaehake

ty arofo’ o vantotseo.

14 Niombeako ty havantañañe,

le nisalora’e;

nanahake ty sabaka reke-tsarimbo

ty havañonako.

15 Ni-fihaino ami’ty fey raho,

naho fandia amo kepekeo.

16 Ni-rae’ o poie’eo,

vaho nitsikaraheko

ty nipaia’ i alik’amakoy.

17 Pinekako ty famotsi’ o tsereheñeo naho tinavako amo nife’eo

i nitsindrohe’ey.

18 Le hoe ty fitsakoreako,

t’ie hikenkañe añ’akibako ao,

naho hampimiràko amo faseñeo ty androko;

19 mitsiriaria mb’an-drano o vahakoo vaho mialeñe amo tsampakoo ty zono.

20 Vao amako nainai’e ty engeko,

vaoeñe an-tañako ao ty faleko.

21 Nijanjiñe naho nandiñe ahy ondatio,

nianjiñe t’ie namereako.

22 Ie nilañon-draho, tsy nisaontsy iereo,

nitsopatsopak’ am’iereo o entakoo.

23 Hoe orañe ty nandiñisa’ iareo ahiko;

ie nipaña-palie

hoe aman’ oram-panjaka.

24 Nisomilahako t’ie tsy niantoke;

le tsy nazè’ iereo ty filoeloean-tareheko.

25 Jinoboko ty lala hombà’ iareo

vaho nitoboke hoe talè,

nimoneñe hoe mpanjaka ami’ty borizà’e,

manahake ty mpañohòm-pandala.