1 Hejeko ty haveloko;

hampidadaeko ty fitoreoko

hivolañe ami’ty hafairan-troko.

2 Hoe ty ataoko aman’Añahare,

Ko ozoñe’o;

ampahafohino ahiko ty lie’o amako.

3 Mahasoa azo hao te ihe mamorekeke,

te mavoe’o ty satam-pità’o

vaho ampiloeloea’o ty fikinià’

o lo-tserekeo?

4 Amam-pihaino nofotse v’iheo?

Mahavazoho manahake ty fañentea’ ondatio hao?

5 Hambañe ami’ty andro’ o olombeloñeo hao o andro’oo,

mira ami’ty tao’ ondatio hao o tao’oo,

6 t’ie tsoehe’o o tahikoo,

vaho kodebe’o o hakeokoo,

7 ndra t’ie arofoana’o te

tsy tsereheñe,

tsy eo ty haharombake am-pità’o.

8 Nitsenèm-pità’o raho,

nifonire’o ho raike;

aa vaho ho rotsahe’o?

9 Tiahio te lietse ty nitsenea’o ahy;

hampoli’o ho deboke hao?

10 Tsy nadoa’o hoe ronono hao raho

vaho nampamoae’o hoe habobo?

11 Nanikina’o holitse naho nofotse,

namahera’o an-taolañe

naho talin’ozatse.

12 Tinolo’o havelo an-koko migahiñe,

vaho nampitambeloñe ty troko

ty fiatraha’o.

13 Fe naeta’o añ’arofo’o ao o raha zao;

apotako t’ie ama’o:

14 Ie mandilatse raho, tendre’o,

vaho tsy apo’o i hakeokoy.

15 Ie manao hakeo: hankàñe amako!

Ie mahity, tsy vaniko ty miandra,

amy te lifo-kasalarañe,

tsapako o hasotriakoo.

16 Aa naho niandrandra:

Le hoe liona ty hangoroña’o ahy;

vaho havale’o ahy an-kalatsàñe.

17 Vaoe’o amako o mpanisý ahikoo,

vaho indrae’o amako ty haviñera’o;

hasosorañe mitovon-kaemberañe

ty amako.

18 Ino ty nañakara’o ahy an-koviñe ao?

Nainako te ho nisimba

tsy ho niisam-pihaino,

19 Hàmake t’ie hoe tsy nitoly,

fa boak’an-koviñe mb’an-kibory

20 Tsy ho napo’e hao o androko

tsy ampeampeo?

Misitaha hey rehe,

hahatreavako fañanintsin-kedeke,

21 aolo’ te hiampaneñako;

mb’amy tsy hahafibaliham-beoy,

mb’an-tane mimoromoroñe,

mb’an-talinjon-kavilasy ao;

22 Tane migobogoboñ’ ieñe,

toe fimoromoroñañe,

an-tane an-kalon-kavilasy,

tsy mipendreñe,

miloeloe hoe ieñe.