1 Aa le hoe t’Iehovà amy Mosè, Mahaoniña henaneo ty hanoako amy Parò. Eka, fitàñe maozatse ty hampienga’e iareo, sirañe ­fatratse ty handroaha’e an-tane’e.

2 Mbe nitsara amy Mosè t’i Andria­nañahare nanao ty hoe: Zaho Iehovà, 3 ty niboak’ amy Avrahame naho am’ Ietsàke naho amy Iakòbe ami’ty hoe El-Sadai* Andriampañotroñe, kila lefe’e, fe tsy nitoñom-batañe am’iareo ami’ty hoe: Iehovà’† Heb: i, he, o ndra v, he: Iehovà. 4 Toe norizako am’ iereo ty fañinako, hano­lorako ty tane Kanàne, i tane fañaveloa’ iareo toe nañialoa’ iareo. 5 Fe tsinanoko ty fiñeoñeo’ o ana’ Israeleo ty amy fañondevoza’ o nte-Mitsraimeoy vaho nitiahiko i fañinakoy. 6 Anò ty hoe arè amo ana’ Israeleo: Zaho Iehovà, le havotsoko boak’ ambane’ ty fampijinia’ o nte-Mitsraimeo naho habalako o fandrohizañeo vaho ho jebañeko an-tsira natora-kitsy, an-jaka ra’elahy. 7 Ho rambeseko h’ondatiko vaho ho Andrianañahare’ areo raho. Ho fohi’ areo te zaho Iehovà Andrianañahare’ areo, ty mampienga anahareo ami’ty fampijinia’ o nte Mitsraimeo. 8 Le hendeseko mb’ an-tane nañonjonako sirañe hanolorako aze amy Avrahame naho am’ Ietsàke vaho am’ Iakòbe añe; le hatoloko anahareo ho fanañañe, Zaho Iehovà. 9 Le nisaontsy amo ana’ Israeleo t’i Mosè, fa tsy nihaoñe’ iareo t’i Mosè, ty amy fikoretan’ arofo naho i fampisoañam-pañondevozañey.

10 Aa hoe t’Iehovà amy Mosè, 11 Akia, saontsio t’i Parò, mpanjaka’ i Mitsraime hampiavota’e an-tane’e o ana’ Israeleo. 12 Aa hoe ty asa’ i Mosè am’ Iehovà, Kanao tsy nañaoñe ahiko o ana’ Israeleo, akore ty hijanjiña’ i Parò, zaho aman-tsoñy tsy nisavareñe? 13 Aa le nitsara amy Mosè naho i Aharone t’Iehovà, nanolotse lily ho amo Ana’ Israeleo naho ho amy Parò mpanjaka’ i Mitsraime, hampiavotañe an-tane Mitsraime ao o ana’ Israeleo.

14 Inao o talèn’ anjomban-droaeo: o ana’ i Reòbene, tañoloñoloña’ Isra­eleo: i Kanòke naho i Palò naho i Ketsròne vaho i Karemý; irezay ro fifokoa’ i Reòbene. 15 O ana’ i Simoneo: Iemoèle naho Iamìne naho i Ohade naho Iakìne naho i Tsòkare vaho i Saòle ana’ ty rakemba nte-Kanàne; ie ro fifokoa’ i Simone. 16 Irezao ka o tahinan’ ana’ i Levio ty amo fifokoa’eo: i Geresòne‡ Ndra: Gersome : ambahiny atoy naho i Kehàte vaho i Merarý; le ni-zato tsy telopolo fito amby taoñe ty halava havelo’ i Levy. 17 O ana’ i Geresoneo: i Libný naho i Semý, amo fifokoa’eo. 18 O ana’ i Kehàteo: i Amràme naho Iitshàre naho i Kebrone vaho i Ozièle le ni-zato-tsi-telopolo-telo amby ty taon-kavelo’ i Kehàte. 19 O ana’ i Merarìo: i Maklý naho i Mosý, ie ro fifokoa’ i Merarý hasavereña’ i Levý. 20 Nañenga’ Iokèbede rahavaven-drae’e t’i Amrame vaho nahatoly i Aharone naho i Mosè, le niveloñe zato-tsi-telopolo taoñe fito amby t’i Amrame. 21 O ana’ Iitshàreo: i Koràke, i Nèfege vaho i Zikrý. 22 O ana’ i Ozièleo, i Misaèle naho i Elitsafàne vaho i Sitrý. 23 Nañenga i Elisèbae ana’ i Aminadabe, rahavave’ i Naksòne t’i Aharone le nisamaha’e i Na­dabe naho i Abihò, i Elazare vaho Itamare. 24 O ana’ i Korakeo: i Asire naho i Elkanà vaho i Abiasàfe; ie ro hasavereña’ o nte-Koràkeo. 25 Nañenga amo ana’ i Potièleo t’i Elazare ana’ i Aharone, le nisamaha’e t’i Pinekase§ Pinekase: amam-binta mirearea. Ie ro anjomban-droae’ o nte-Levio amo fifokoa’eo.

26 Ie i Aharone naho i Mosè nitsa­rà’ Iehovà ty hoe, Ampiengao an-tane Mitsraime ampoko-ampoko o ana’ Israeleo. 27 Ie ro nisaontsy amy Parò mpanjaka’ i Mitsraime hampiavotse o ana’ Israeleo an-tane Mitsraime, toe i Mosè naho i Aharone zay.

28 Ie amy andro nitsarà’ Iehovà amy Mosè an-tane Mitsraimey, 29 le nanao ty hoe amy Mosè t’Iehovà: Zaho Iehovà, hene saontsio amy Parò mpanjaka’ i Mitsraime ze taroñeko ama’o. 30 Aa hoe t’i Mosè añatrefa’ Iehovà, Ino ty hijanjiña’ i Parò ahiko, zaho aman-tsoñy tsy afa-boiñeo?