1 Se solat seini lekat kanak si Pablo. Lekat te ibeg te Timanem, siak se sebad sogounun i Jesu Cristo.

Seini se solat ko diyà te kedita niyo sinakop te Timanem aw gayed egsalig diyà ki Jesu Cristo.

2 Ibeg ko, begayan kaw te tabang aw kelinaw te pedowan lekat te Timanem Amay tadon, aw lekat te Pengolo tadon si Jesu Cristo.

3 Iduyun se Timanem, Amay te Pengolo tadon si Jesu Cristo. Mèpiya se tabang te Timanem kenitadon pineokit te ininang i Cristo, so binegayan kidon din te kedita te kèpiyaan lekat te langit. 4 Gebii te wedà pa inangi te Timanem se keneyonan, tapay kidon din pinemallì amon inangen kidon sakop din pineokit ki Cristo, aw amon meg-aneng-aneng se Timanem te metòlid kidon, aw wedad silahen din diyà kenitadon. So dakel se pedowan te Timanem kenitadon, 5 mig-aneng-aneng sikandin te inangen kidon din menge batà din pineokit ki Cristo, so yan se ibeg din aw tod din. 6 Iduyun tadon se Timanem so ontò mèpiya se keido din, so ontò kidon din tinebangan pineokit te Batà din egkedekelan din te pedowan.

7 Pineokit te pegkematay i Cristo doton te kros, impelowà kidon te Timanem lekat te salà. Pigwedad din se kedita te salà tadon. Ontò dakel se tabang din kenitadon, 8-9 so ontò sikandin bowasag te pegtabang din kenitadon. Lekat te kebiyasa te Timanem, wedà din petega-tegahi diyà te otaw gebii se impetaga-taga din den kenitadon te doen pa inangen din pineokit ki Cristo. 10 Aw domateng se aldaw, tomanen te Timanem se tod din. Pegsebaden din se kedita te ininang din, pengkey doton diatas te langit aw dini lanto te tanà, aw ipelowan din si Cristo diyà te kedita niyan.

11 Lekat te ibeg te Timanem se kedita te eg-inangen din. Yan pinemallì kidon din gebii te wedà din pa inangi se keneyonan amon meinang kidon menge sakop din pineokit ki Cristo. 12 Sikami menge Judiyo se monà simalig diyà ki Cristo, aw yan se doun te iduyun day sikandin.

13 Sikiyo heman menge otaw kenà Judiyo, pegdineg niyo te benal kagi te Timanem, sìyan Mèpiya Indan te doen kelowaan lekat te salà, simalig kaw heman diyà ki Jesu Cristo. Mig-iling kaw den kenami menge Judiyo, so binegayan kaw heman te Timanem te Espiritu Santo tapay din impakang, so yan se pengilala te sakop kaw din. 14 So impeogpà din se Espiritu Santo diyà kenitadon, netegahan tadon te kominawà kidon te kedita te kèpiyaan impakang din kenitadon, aw ontò kidon din heman ipelowà. Yan se doun te iduyun tadon sikandin.

15 Na, dinineg ko te gayed kaw egsalig diyà te Pengolo tadon si Jesus. Dakel ekon heman se pedowan niyo te kedita te sakop te Timanem. 16 Lekat te pegdineg ko kenyan, gayed a egtawal-tawal aw egpesiontong diyà te Timanem tepad kenyo. 17 Egtawal-tawal a diyà te Timanem simogò te Pengolo tadon si Jesu Cristo, aw sikandin se Timanem Amay ipegduyun tadon. Egpemoyò a diyà kandin te tebangan kaw din pineokit te Espiritu Santo, amon megkebiyasa kaw, aw amon metaga-taga kaw heman te Timanem. 18 Ibeg ko ontò kaw din toledaan amon ketegahan niyo aw eden se pelimanan niyo tandà te pegtawal din kenyo. Ibeg ko heman ipetaga-taga kaw din te ontò dakel se ontong ibegay din diyà te kedita te otaw sinakop te Timanem. 19 Ibeg ko heman ketegahan niyo te gayed meketabang se Timanem te kedita tadon egpemenal, so ontò sikandin metolos. Impekità din te metolos sikandin 20 pineokit te ininang din diyà ki Cristo, so inantay din sikandin lekat te nematay, aw impenenoo din sikandin kidoen te tangkil din doton te langit amon lomowan heman doma din. 21 Yan eglowan si Cristo diyà te kedita te melangkaw aw metolos doton te langit, so labi pa melangkaw se gulal din diyà te kedita te doma gulal, pengkey songkani aw modi aldaw. 22 Impelowan te Timanem si Cristo diyà te kedita, aw ininang din si Cristo Pengolo te kedita aw olo te kedita tadon egpemenal, 23 so iling kidon te lawa i Cristo. Tandà te pegpesakop tadon diyà kandin, wedad kolang diyà kandin, aw wedad heman kolang doton te langit aw dini heman te lanto te tanà tandà te peglowan din diyà te kedita niyan.