1 Per lüj Tito, balüü ree bejn gra ziꞌc tal na̱j xtiidxzaꞌc Dios. 2 Balüü ree bengol din guiban reeman zagdxe, gustëdguien reeman din gap bejn laa reeman respejt, guidib luxdoo reeman chililadx reeman, guiën reeman bejn ree, taan tëë reeman xhietëëz ni sac reeman. 3 Ziangajc ree béngunaa bengol rayal guiban reeman ziꞌc rayal guiban ree xbejn Cristo. Ad rayalt gü reeman xtiidx bejn, ad gac reeman benguꞌ. Rayal gulüü reeman bejn ree xhienaag na̱j ni zagdxe, 4 rayal gulüü reeman béngunaa guiag ree din guiën lacheel reeman con xiꞌn reeman, 5 din guiban tëë reeman naya delant loj Dios, nadëdguien, guinia lidx reeman, gac reeman benzaꞌc guzoob tëë reeman xtiidx lacheel reeman chitëë chu guinieeguijdx xtiidx Dios.

6 Ziangajc lüj Tito, badëë consejw loj ree xinguiaaw guiag din guiban reex nadëdguien. 7 Been naguiejn din güünl gra xnejz din guguiaa reex xhienaag güün reex ni na̱j zagdxe. Chi rulüül laa reex, balüü reex zagdxe ziꞌc rayal, 8 con ganax ree diidx zagdxe chitëë xhie gudxiib ree bejn guijquil, din yayaꞌnxtu ree bén ni rdxeꞌch dunuj ree guial achet yadxejl gudxiib reeman duguijc ree.

9 Badëë tëë consejw loj ree bén na̱j ree mojs din guzoob gra xtiidx xpatron reeman, gac reeman benzaꞌc ad yadxiꞌroꞌ reeman. 10 Ad cwan reeman xhie xieen xpatron reeman, gac reeman bén confians din guguiaa gra ree bejn xhienaag naban reeman guial nizaꞌcdxoon na̱j xtiidx dux Dad ree Dios bén rüjn dux tol ree perdon.

11 Abiꞌ Dios ma balüüman plact rënman dunuj ree, abiꞌ guial rënman dunuj ree zileꞌ gac gra ree bejn perdon. 12 Guial rënman dunuj ree rayagbee ree guial rayal yasaꞌn ree ni mal con ree ni ad rünjt sirv ni rayën ree yaguieen ree loj guidxliuj guie, din yabajn ree nadëdguien, ziꞌc rayal, ziꞌc rën Dios yabajn ree loj guidxliuj guie 13 laꞌtgaj caylëjz ree dxej zaꞌcdxoon ni gac cumplid xtiidxzaꞌcaman ziꞌc ma naman duloj ree guial guiꞌt dux Dios ree Dad Jesucrist con xguialrniabeeman, bén been perdon dux tol ree. 14 Laaman güt por dunuj ree din yabëëman dunuj ree loj gra dol abiꞌ basiaman dunuj ree din yayajc ree xbejnzaman abiꞌ yaguieen ree naguiejn yaguieen ree ganax ni zagdxe.

15 Gra ni ma rnin lojl balüün laa reeman sin guialrdxeb badëëd reeman consejw, bazuxnejz reeman con guialrniabee ni caꞌl. Ad tiëbil gusagloj reeman lüj.