3
Sa Kinebokebo te Zobi La koe Tamasa
1 Beto si zama vura se Zobi meke leve nia sa sa rane sapu podo si asa.* Zer 20:14-18 2 Zama se Zobi,
3 “Kei Tamasa, Mu leve nia sa boṉi sapu tava gavoro si arau;
Mamu leve nia sa rane sapu podo si rau.
4 Sa rane asa si Mamu va huporo ia, Tamasa;
Mamu lopu balabala pule hokara ia sa rane asa,
mani loke kalalasa kamo la ia.
5 Mani vagia na huporo dudukurumu sa rane asa,
meke va moata nia hinuporo;
va opoadumu nia lei,
pude va muho tamunia sa rimata.
6 Va rizu ia sa boṉi asa koasa vuaheni,
meke lopu va somana ia koari na sidara.
7 Va tige ia sa boṉi asa,
mani loke vevehe qinetuqetu si ta avoso koasa.
8 Madi leve nia ri na matemateana sa rane asa,
arini pu boka va tekulu pule mae ia sa kurukuru Leviatani.* Lopu ta gilana sa kurukuru hie pa rane ṉinoroi. Gina zama nia Zobi keke vivinei malivi tadi na tie pukerane.
9 Mani lopu kalalasa mae sa pinopino habia;
mani aqa nia sa rane,
ba lopu va kamo nia vaqavaqasa.
10 Leve nia sa boṉi asa sapu va malumu au pude ta podo,
sapu va dogoro nau sari tinasuna na tinalotaṉa.
11 Leana si be mate qua mo pa tiana sa tinaqu,
babe podo mate qua mo.
12 Vea ke kuka au tu sa tinaqu pa tuṉutuṉuna,
meke va susu au tu sa?
13 Be mate si rau, si kote ele eko vata bulebulei qua,
be ele puta meke magogoso qua tu.
14 Puta gua ari na baṉara na ṉati hiniva,
arini pu kuridi sari na vetu baṉara koadi pukerane.
15 Be ele mate qua, be kamahire puta gua rina koburu tavia si rau,
arini pu va siṉi ni qolo na siliva sari na dia vetu,
16 babe gua rina koburu pu mate mae pa tia meke podo,
meke lopu dogoria sa kalalasa.
17 Pa lovu si noso sari na tie kaleadi,
meke magogoso koari na dia tinalotaṉa.
18 Sari na tie ta pusidi ba qetu nia sa binule,
ta rupaha koari na hidaka na ginegese.
19 Hiteke na lavata si koa vasina,
tie arilaedi na tie loke guguadi,
meke ari na pinausu si ta rupaha vasina.
20 Na vea ke va kuliusu ekoi mo sari na tie?
Na vea ke poni kalalasa saripu koa talotaṉa?
21 Aqa nia rini sa minate, ba lopu kamo mae;
na lovu si okoro nia rini, hola nia sa tinagotago.* Rev 9:6
22 Lopu qetu si arini osolae mate meke ta pomunae.
23 Na vea ke ta poni pa tie sa tinoa,
beto si tomea tu Tamasa koasa sa siraṉa vugo repere,
meke ta kopu totoko pule tu koe Tamasa?
24 Na kinabo mo si guana hena ia rau,
meke lopu boka beto hilala si rau.
25 Sapu matagutu nia rau si raza mo koa rau,
sapu mala nia rau si ta evaṉa nana mo koa rau.
26 Loke qua binule, loke minagogoso,
meke sari qua tinasuna si loke vina betodi.”
*3:8 Lopu ta gilana sa kurukuru hie pa rane ṉinoroi. Gina zama nia Zobi keke vivinei malivi tadi na tie pukerane.