1 Koasa vuaheni kekenu sapu koa baṉara se Belosaza pa Babiloni, si kamo si keke pinutagita koe Daniela, meke dogoria sa si keke dinogodogorae sipu korapa eko puta si asa pa nana teqe. Sa vivinei koasa nana pinutagita si kubere gore nia sa. 2 Zama se Daniela: “Koasa qua pinutagita pa boṉi asa si doṉo la si arau, meke isara pa kenuqu rau sari ka made givusu pa maṉauru korapa hiru ia rini sa kolo lamana. 3 Meke vura mae koasa kolo lamana si ka made kurukuru lavata, hopeke votivotikaedi.* Rev 13:1, 17:8 4 Sapu kekenu si doṉo guana laione meke sari tatapuruna si gua tadi na atata. Kopu doṉo la si arau osolae ta daku palae sari tatapuruna meke ta ovulu sage si asa koasa pepeso pude turu koari karua nenena guana tie, meke na bulo tie si ta poni nia sa.

5 Meke isana pa kenuqu sa kurukuru vina rua, sapu doṉo guana bea. Turu ni sa sari nenena pa keke kali tinina si asa meke ka ṉeta susuri raqaraqa si koa dia pa ṉuzuna, pa vari korapadi ri livona. Ta tozi si asa pude, ‘Gasa turu mamu hena va soku masa gua sapu hiva nia goi!’ gua.

6 Mudina asa, si doṉo la si arau, meke isana pa kenuqu si keke kurukuru pule sapu doṉo guana leopadi. Meke koa dia pa mudina sa si ka made tatapuru gugua tadi na kurukuru tapuru. Sa kurukuru hie si ka made batuna, meke ta poni nia sa sa ṉiniraṉira pude koa baṉara.

7 Beto asa, koasa qua dinogodogorae pa boṉi asa si doṉo la si arau, meke isana pa kenuqu, si sa kurukuru vina made sapu doṉo hikare meke variva matagutuna meke ṉiṉirana hola. Na livo aeana nomadi si tanisa sapu huarani sa meke henani sa sarini pu va matei sa meke neti sa pa kauru nenena sarini pu koa hola. Na votikaena hola koari na kurukuru pu ele vura, meke koa dia koasa si ka manege puta kikiho. 8 Sipu korapa balabala i arau sari na kikiho hire, si vura nana pa kenuqu koasa kurukuru, si keke kikiho pule, na kikiho hitekena, sapu vura mae pa vari korapadi; meke ka ṉeta ari na kikiho si ta rabutu vura pa kenuna sa. Sa kikiho hie si tago mata gugua tadi na tie meke na ṉuzu sapu vahesi pule.

9 Sipu korapa doṉo la si rau,

11 Na zama va titie lamo sa kikiho hitekena. Doṉo toto la mo si arau osolae tava mate sa kurukuru meke sa tinina si ta gona nuquru la pa korapa nika halalana. 12 Sari ka ṉeta kurukuru pule si tava malumu pude toa ba pa keke kukuru totoso mo, ba sari dia ṉiniraṉira si ta vagi palae.

13 Pa korapana sa qua dinogodogorae pana boṉi si doṉo la si arau, meke turu nana pa kenuqu si keke sapu doṉo guana keke tuna na tie, pu luli mae koari na lei pa Maṉauru. Ene la si Asa koa Sa pu koa pukerane meke ninae rane meke ta turaṉa la si Asa pa kenuna Sa. 14 Na ta poni nia Sa, sa tinolava, meke ṉiniraṉira tanisa binaṉara meke vahesia ri doduru tie na butubutu na tiedi ri doduru vinekala si Asa. Sa Nana binaṉara si koa hola ninae rane meke loke kokoina. Sa butubutu baṉara Tanisa si lopu kaqu ta huara.”

15 “Arau, Daniela si tasuna pa maqomaqoqu, na matagutu nia rau sa pinutagita sapu dogoria rau. 16 La si arau koasa keke ri pu turudi vasina meke nanasa nia sa ginuadi ri doduru hire.

Ke tozi nau sa meke rupaha mae nia sa: 17 zama si asa, ‘Sari ka made kurukuru lavata hire si ka made butubutu baṉara sapu kote turu vura pa popoa pepeso. 18 Ba sari pu tava madidi koa Sa pu Ululuna Hola si kote ta poni nia sa butubutu baṉara meke kote tagoa rini ninae rane ka rane.’

19 Meke hiva tumae nia rau sa ginuana hinokara sa vina made kurukuru lavata, sapu votikaena hola koari doduru meke variva matagutuna hola koari nana livo aeana meke kakarutu boronizi. Sa kurukuru lavata asa si huari meke gani sari tie, meke neti naperi sari pu koa hola. 20 Meke hiva tumae nia tugo rau sa guguadi ri ka manege puta kikiho pa batuna, meke sa keke kikiho sapu vura sage mumudi, sapu va hoqa pani sari ka ṉeta kikiho, sa kikiho sapu turu vura koari kasa meke tago mata meke ṉuzu sapu vahesi pulenia. 21 Sipu korapa doṉo toto la arau, si varipera la koari na tie madidi te Tamasa sa kikiho asa meke va kilasi sa, 22 osolae kamo mae si Asa pu Koa Pukerane meke Ninae Rane meke vari pitui ni meke toka ni Sa sari tie madidi Tanisa sapu Ululuna Hola, meke tagoa ri tie madidi Tanisa sa butubutu baṉara.

23 Va mae ia sa koa rau sa vina bakala hie: ‘Sa kurukuru vina made si na vina made butubutu baṉara sapu kote turu vura pa popoa pepeso. Kote votikaena si asa koari doduru butubutu baṉara meke kote va kilasia sa sa doduruna sa popoa pepeso; kote neti gore va kaleana ia sa. 24 Sari ka manege puta kikiho si ka manege puta baṉara sapu kote vura mae koasa butubutu baṉara hie. Mudi dia rini si kote keke baṉara pule si kote vura mae, kote votikaena si asa koa rini pu mae kekenu; kote va gore pani sa si ka ṉeta baṉara. 25 Kote va karikari la ia sa sa Tamasa Ululuna Hola meke ṉoṉovali sari tie madidi Tanisa meke podekia sa pude hobei sari na totoso na tinarae sapu ele tava turudi. Sari na tie madidi si kote tava ade la koa sa, koari ka ṉeta vuaheni kukuruna.

26 Ba sa vinari pitui si kote ta evaṉa meke sa nana ṉiniraṉira si kote ta vagi palae meke ta huara palae. 27 Meke sa binaṉara, ṉiniraṉira, meke linavata koari na butubutu baṉara pa kauruna sa doduruna sa maṉauru si kote ta ade karovo la koa ri na tie ta madidi, sari tie Tanisa sapu Ululuna Hola. Sa Nana butubutu baṉara si kote na butubutu baṉara sapu kote koa hola ninae rane, meke doduru baṉara si kote vahesia meke va tabe ia.’

28 Tani beto sa vivinei. Arau, Daniela si tasuna sisigiti koari qua binalabala, meke hobe va kaleana sa isumataqu na matagutu va hola, ba kopuni mo arau si hire meke lopu tozi rau lamae.”