1 Ka zuapa ṉavulu puta sari tuna koreo e Ehabi sa baṉara saripu koa koasa vasileana lavata pa Sameria. Kuberi Zehu sari leta la koari doduru koimata koasa vasileana lavata, koa rina tie koadi, meke koa rini pu kopu ni sari na tuna e Ehabi. Gua hie sa kinubekubere: 2 “Pana vagia gamu sa leta hie, gamu pu lalae ni sari na tuna sa baṉara, meke koa pa mia ṉiniraṉira sari na totopili varipera, sari na hose, tiṉitoṉa varipera, meke sari na vasileana lavata pu ta baradi, 3 si mamu vizatia sa tie pu garona koa rina tuna sa baṉara, mamu va baṉaria, mamu varipera pude lavelave nia.”

4 Tarazuzu sari na koimata pa Sameria, “Ari baṉara Zoramu meke baṉara Ahazaea ba lopu boka ia se Zehu, si vea meke kote boka tu si gita?” gua si arini. 5 Ke sari na palabatu nomadi koasa vetu baṉara meke sari na koimata koasa vasileana lavata, turaṉae sari na tie koadi meke sari na tie pu kopu ni sari na tuna Zoramu, si garunu la nia koe Zehu sa inavoso hie, “Na mua nabulu si gami meke namanama si gami pude tavetia gua sapu zama nia goi, ba lopu kaqu va baṉaria gami si keke tie. Mu tavetia goi gua sapu leana pa mua binalabala.”

6 Kuberia Zehu sa leta vina rua la koa rini, “Be pa kalina taqarau si gamu, meke kote luli gamu sari qua hiniva, si mi paleke mae ni koa rau pa Zezireli sari batudi rina tuna e Ehabi pa totoso gua tugo hie pa rane vugo.” Koa pa kinopu tadi na tie koadi pa Sameria, si ka zuapa ṉavulu puta tuna e Ehabi, pu va nomai rini. 7 Sipu vagia rini sa leta te Zehu, si va matei rina koimata sari ka zuapa ṉavulu puta tuna e Ehabi. Voi i rini sari batudi koari na huneke meke garunu lani koe Zehu pa Zezireli.

8 Sipu tozi nia rini se Zehu sapu ele ta paleke mae sari na batudi ri na tuna e Ehabi, si tozi ni sa pude veko paqaha ni pa karua kobi pa sasadana sa vasileana lavata meke pude ta veko vasina osolae kamoa munumunu koivugona. 9 Pana munumunu si vura la pa sasada si asa meke zama koa rina tie pu koadi vasina, “Arau sa tie pu kuhana nia meke va matea se Zoramu sa baṉara. Lopu kaqu ta zutu nia gamu sapu asa. Ba esei va matei sari doduru hire? 10 Mi gilania sapu sari doduru zinama te Zihova, koari guguadi rina tuna e Ehabi si kote gorevura. Ele evaṉia e Zihova gua sapu va tatara nia sa koe Ilaiza sa Nana poropita.” 11 Meke va mate i tugo e Zehu sari doduru turaṉana e Ehabi saripu koadi pa Zezireli, meke sari doduru nana palabatu, baere soti, meke sari na hiama; lopu keke si tava toa.* Hoz 1:4

12 Taluarae pa Zezireli se Zehu pude la pa Sameria. Koasa inene la koasa vasina sapu ta pozae “Putaputana Tadi na Sepati,” 13 si tutuvi sa si kaiqa turaṉana Ahazaea sa baṉara pa Ziuda meke nanasi sa, “Ari sei si gamu?”

Meke olaṉa si arini, “Turaṉana e Ahazaea. Korapa la gua pa Zezireli si gami pude vata dogoro nia sa mami pinamaṉa koa ri na koburu te Zezibelo sa Kalaho meke koari doduru tatamana baṉara.” 14 Tozi ni Zehu sari nana tie, “Tuqe vagi!” Harupu vagi rini, meke va mate i rini tata koasa pou vasina. Ari ka made ṉavulu rua tie vinarigaraedi meke lopu keke si toa.

15 Topue pule se Zehu, meke pa nana inene la si tutuvu ia sa se Zonadabi sa tuna koreo e Rekabi. Hapahapa nia e Zehu si asa meke zama si asa, “Gita kara si keke nada binalabala, ba vegua kote zuka au goi?” gunia sa.

Olaṉa se Zonadabi, “Kote zuka igo rau,”

“Mae nia limamu pude gua,” olaṉa la gua se Zehu. Vari tuqei lima sari karua meke ovulu va suraṉia e Zehu si asa koasa nana totopili varipera, 16 meke zama, “Mae luli au, mamu dogoria telemu gua sapu pamaṉa guni nia rau se Zihova.” Meke koi varigara la sari karua pa Sameria. 17 Sipu kamo ri kara vasina si va matei e Zehu sari doduru turaṉana e Ehabi, lopu keke si tava toa. Hiera gua sapu ele zama nia e Zihova koe Ilaiza sapu kote ta evaṉa.

18 Tioko varigara ni e Zehu sari na tinoni pa Sameria meke zama, “Sa baṉara Ehabi si vasina hite mo sa nana ninabulu la koasa tamasa Beolo, ba arau si kote hola la tu. 19 Tioko varigara ni sari doduru poropita te Beolo, sari doduru pu arona meke sari doduru nana hiama. Loke tie si kaqu koa hola; kaqu tavetia arau si keke vinukivukihi nomana la koe Beolo, meke asa pu lopu somana si kaqu tava mate.” Ba hie sina sinekesekei te Zehu pa siraṉa gua pude va matei sari doduru tie pu arona se Beolo. 20 Meke zamai e Zehu, “Vizatia si keke rane tana vahesina e Beolo!” Meke ta tozi vura si hie, 21 meke va ene zinama se Zehu koari doduru popoa pa Izireli. Mae beto sari doduru pu vahesia se Beolo; lopu keke arini si va sasanae pude mae. Nuquru beto si arini koasa zelepade te Beolo, podalae pa keke hukihukirina duta la pa keke kalina. 22 Meke tozi ni e Zehu sari na hiama pu kopudi rina poko hopedi pude paleke vura ni meke valani koa ri na tie vahesi. 23 Beto asa, si nuquru la telena pa zelepade se Zehu turaṉia sa se Zonadabi, tuna koreo e Rekabi, meke zama koa ri na tie vasina, “Kopu nia pude sari na tie arona mo e Beolo si koa tani meke loke tie pu vahesina se Zihova si somana.” 24 Meke nuquru la si ari karua Zonadabi pude la veko vina vukivukihi va uququ la koe Beolo. Ka vesu ṉavulu puta sari na tie kopu pu va turui sa pa sadana sa zelepade, meke ele zamai sa, “Kaqu va matei gamu sari doduru tie hire; be keke koa gamu si va taloa ia si keke si kote nana tinoa lipu nia sa!”

25 Beto tugo va hokotia e Zehu sa nana vina vukivukihi, si zama la koa ri na tie kopu meke na palabatu si asa, “Nuquru la mamu va mate betoi; lopu va govete hokaria si keke!” Tuqei ri dia magu varipera meke nuquru la meke va mate betoi rini, meke ririhi vura ni rini pa sada sari na tinidia. Meke tiqe nuquru hola la tu pa korapana hokara sa lose hopena tanisa zelepade, 26 meke paleke vura nia sa vina tigono hope sapu koa vasina, meke sulua. 27 Ke huaria rini sa vina tigono hope meke sa zelepade, meke ilirae nia na vetu eneneana rini sa zelepade kamo pa rane ṉinoroi.

28 Ke va mate pania e Zehu sa vinahesina e Beolo pa Izireli. 29 Ba sapu asa telena si keha lulia sa sa sinea te Zeroboami sa baṉara, sapu turaṉa nuquru nia pa sinea sa popoa Izireli pa vinahesina sa bulumakao qolo tunana sapu va turua sa pa Betolo meke pa Dani.* 1 Baṉ 12:28-30 30 Zama se Zihova koe Zehu, “Ele tavete lani goi koari tuna e Ehabi sari doduru gua pu hiva nigo Rau pude taveti. Ke zama atu si Rau sapu sari na tutimu, kamo pa vina made sinage, si kote baṉara pa Izireli.” 31 Ba lopu va tabei e Zehu pa doduru bulona sari na tinarae te Zihova, sa Tamasa pa Izireli; ba lulia tu sa sa kineha te Zeroboami, sapu turaṉa lani sari na tie pa popoa Izireli pa sinea.

32 Koasa totoso asa si podalae va hiteke gorea e Zihova sa volosona sa popoa Izireli. E Hazaelo sa baṉara pa Siria si raza vagi sari doduru voloso popoa te Izireli, 33 pa kali gasa rimatana sa Zodani, kamo la gua tu pa kali la gua koasa vasileana nomana pa Aroere pa Ovuku Anoni. Somana voi sari na popoa pa Qileadi meke Basani, vasina koa sari na butubutu te Qadi, Rubeni, meke Manase pa kali gasa rimata Zodani.

34 Doduru pule gua pu taveti e Zehu, turaṉae la sari nana tinavete mataqaradi, si ta kubere pa Buka Tinozi tadi na Baṉara pa Izireli. 35 Mate meke ta pomunae pa Sameria si asa, meke se Zehoehazi baṉara hobea si asa. 36 Koa baṉara pa Sameria se Zehu pa popoa Izireli ka hiokona puta vuaheni.