40
Melkahkahn Kaping r TITLE NI MAHSEN EN IPRU: En Depit melkahka.
1 I awiawih sawasepei sang rehn KAUN-O;
e ahpw kapaikodohng ie karonge oh karongehda ei likwer.
2 E ahpw ketin waikiehda sang nan pwoahr keper ehu,
nan pwelmatak loal.
E ahpw ketikiniehdi pohn paipalap ehu
oh ketin koasoanehdi pwe I en soanamwahula.
3 E ahpw ketin padahkihong ie melkahka kapw pwoat,
melkahkahn kapinga atail Koht.
Me tohto me pahn kilang met, re pahn masakada
oh re pahn likihala KAUN-O.
4 Meid pai aramas me kin likih KAUN-O,
oh sohte kin sohpeiong dikedik en eni kan,
de iang irail kan me kin pwongih koht likamw akan.
5 Maing KAUN, at Koht, ia uwen tohtohn soahng kapwuriamwei kan me komw ketin wiahiong kiht;
sohte emen mie me duwehte komwi!
Ia uwen tohtohn koasoandi kan me komw ketin wiahiong kiht!
Ma I pahn song en kasalehda koaros—
re uhdahn pahn tohtohsang me I kak kasalehda!
6 Komw sohte ketin kupwurki meirong oh kisakis kan;
komw sohte kin kupwurohki mahn akan me pwonte isihsla pohn pei sarawi kan
de meirong kan mehn kihsang dihp akan.
Ahpw komw ketikihong ie salengei kat pwe I en patohwan rong komwi, Ipru 10.5-7.
7 eri, I ahpw sapeng komwi, patohwan, “Iet ngehi, maing;
sapwellimomwi kaweid kan ong ie mihmi nan pwuken Kosonnedo.
8 Maing ei Koht, ia uwen ei kin ngoangki kapwaiada kupwuromwien!
I kin kolokol sapwellimomwi padahk kan nan mohngiongiet.”
9 Maing KAUN, nan pokon en sapwellimomwi aramas akan,
I lohkidahr rongamwahu en omwi komourkitalahr.
Komw mwahngih duwen ei sohte mwahn pahn tokedihsang lohlohkiseli.
10 I sohte nekidohng pein ngehi rongamwahu en komouro;
pwe ahnsou koaros I kin lohkiseli sapwellimomwi loalopwoat oh sawas.
I sohte kin nennenla nan pokon en sapwellimomwi aramas akan,
ahpw I kin patohwanda duwen sapwellimomwi limpoak poatopoat oh loalopwoat.
11 Maing KAUN, I patohwan ese duwen omwi sohte pahn ketin katokehdi sapwellimomwi kalahngan ong ie.
Sapwellimomwi limpoak oh loalopwoat pahn sinsile iehte ahnsou koaros.
Kapakap en Peki Sawas
(Melkahka 70)
12 Suwed ngeder kapiliepenehr—
me nohn ngeder oh soh kak wadawad!
Dipei kan salihiepenehr,
oh I solahr kak kilang wasa;
re tohtohsang pitenmoangei kat,
oh loalei tikitikla.
13 Maing KAUN, komw ketin sewese ie ahnsou wet oh doareiehla.
14 Irail kan me kin songosong en kemeiehla
re en lohdi oh pingida.
Irail kan me kin perenki ei apwal akan
re en pwurala oh namenekla.
15 Irail kan me kin kouruhrkin ie,
re en sarohkihdi ar lohdi.
16 Irail koaros me kin patohdo rehmwi
re en nsenamwahu oh pereperen.
Irail koaros me kin kasapahlkalahngankihong komwi sapwellimomwi komour
re en kin patopatohwan ahnsou koaros, “KAUN-O meid lapalap!”
17 Maing ei Kaun, ngehi me luwet oh semwehmwe,
ahpw komwi sohte ketin melieiehla.
Komwi me ei sounkomour oh ei Koht—
komw ketin mwadangodo oh sewesei!