Pwuhken
SOHP
Oaralap en Pwuhk wet
Pwuhken Sohp, iei koasoiepen ohl lelepek men me lokolok laudki eh paisuwedla mwuledek—nah seri kan koaros mehsang, oh eh dipwisou koaros pil salongasang, paliwere unsek pil kenskipeseng soumwahu laud kasaut ehu. Dahme ntingdi nan pwuhk wet kasalehda nan irepen koasokoasoi siluh duwen en Sohp oh kompoakepah kan ar lamalam oh pepehm ong ni paisuwedla wet. Eri, pali laud en audepen koasokoasoipene pwukat iei kupwur en Koht ong aramas akan; oh ni imwilah, Koht pein ketin pwarohng Sohp.
Kompoakepahn Sohp kan eri kawehwehda eh lokolok kan nin duwen soangen lamalam me mehn Suhs kin ahneki sang mahs. Re kin lemeleme me Koht kin ketin katingih wiewia mwahu ahnsou koaros, oh kin ketin kaloke me suwed ahnsou koaros; ih met me kadehdehiong irail me Sohp uhdahn aramas dipan emen. Ahpw Sohp sohte kamehlele met; e kin lemeleme me e sohte konehng en ale soangen lokolok laud wet, pwehki eh pehm me ih aramas mwahu oh pwung men. E sohte kak wehwehki dahme Koht ketin mweidohng soangen paisuwed laudo en lelohng soangen aramas me duwehte ih. Ihme e eimahda oh sohpeiong Koht. Sohp sohte kesehla eh pwoson, ahpw ihte me e ngoangkien, en pwungla mwohn silangin Koht, oh pwurehng waunla nin duwen ohl lelepek men.
Koht sohte ketin sapeng en Sohp eh peidek kan, pwe e ketin kupwukupwurehte eh pwoson, ahpw e ketin kasalehiong Sohp sansal lingan ehu duwen sapwellime manaman oh erpit. Sohp eri nan kapehd karakarahkala oh pohnesehla sapwellimen Koht erpit oh manaman; e ahpw koluhkihla lokaia sapwung oh laud kan me e patohwandahr.
Kaimwiseklahn ire ko koasoia duwen Sohp eh pwurehng paiamwahula, oh pil paiamwahulahsang mahs. Koht eri ketin angiangihada kompoakepahn Sohp pwehki ar sohte wehwehki kahrepen Sohp eh lokolok. Sohp kelehpw me pehmada me Koht lapalapasang dahme aramas kin koasokoasoia duwen ih.
Audepe ni Oaralap
Oaralap 1.1—2.13
Sohp oh kompoakepah kan 3.1—31.40
a. En Sohp eh kaulim 3.1-26
b. Keieun koasokoasoipene 4.1—14.22
c. Keriaun koasokoasoipene 15.1—21.34
d. Kesiluhn koasokoasoipene 22.1—27.23
e. Kapingpen erpit 28.1-28
f. Kaimwiseklahn en Sohp koasoi 29.1—31.40
En Elihu eh kapahrek 32.1—37.24
Imwilahn pwuhk wet 42.7-17
1
Sehdan Song Sohp
1 Mie ohl emen me adaneki Sohp, me kin koukousoan nan sapwen Us.a US: Wasa kiset sohte nohn dehde wasa e mie. E kin pwongih Koht oh kin poadidiong mehlel. Pil ih aramas mwahu men, oh e kin sohpeisang me suwed ahnsou koaros.
2 Nah pwutak isimen oh serepein silimen. 3 E naineki sihpw 7,000, kamel 3,000, kou 1,000, oh ahs 500. E pil naineki lidu tohto, oh e kepwehpwehsang aramas koaros ni palimese.
4 Nah pwutak ko kin epwehnki wiahda kamadipw, emenemen kin ahneki ehu ahnsou, ahpw kin luke meteiko koaros en kin iang towehda; oh re kin lukehiong riarail serepein ko ahnsou koaros. 5 Mwurin ehuehu kamadipw pwukat, Sohp kin pwourda nimensehngie oh kin wia en ememen nah seri ko ar meirong pwehn kamwakeleirailda. E kin wia met ahnsou koaros pwehki eh kin lemeleme ma emen nah ko seu wiahda dihp ni ar lahlahwe Koht ni ar sohte nsenki.
6 Ni rahno eh leledo pwe tohnleng kan en pwarodo mwohn silangin KAUN-O. Sehdan ahpw pil iang uh nanpwungarail. Sen. 6.2. 7 KAUN-O ahpw ketin keinemwe reh, mahsanih, “Dahme ke wiewiaseli?”
Sehdan ahpw sapeng, patohwan, “I kakahnseli wasa kan, pidipidahkih sampah.”
8 KAUN-O eri mahsanih, “Ia duwe, ke kilangehr Sohp, ei laduwo? Pwe sohte aramas nin sampah me loalopwoat oh mwahu duwehte ih. E kin kaudokiong ie oh kin kanahieng pwe en dehr wiahda me suwed ahnsou koaros.”
9 Sehdan ahpw sapeng, patohwan, “Ia duwe, Sohp pahn kak pwongih komwi, ma komw sohte ketin kapaiahda? Kaud. 12.10. 10 Komw ketin silehdier ih oh eh peneinei oh pil mehkoaros me e ahneki. Komw pil kin ketin kupwuramwahwih mehkoaros me e kin wia, oh sapweo direkilahr kou me komw ketikihong. 11 Ahpw ma komw pahn ketikihsang mehkoaros me e ahneki—e pahn lahlahwei komwi mwohn silangmwi.”
12 KAUN-O eri mahsanihong Sehdan, “Eri, me mwahu! Mehkoaros me Sohp ahneki mihlahr pahn omw manaman, ahpw paliwerehte me ke dehr sair.” Sehdan eri patopatohla sang mwohn silangin KAUN-O.
Nein Sohp Seri kan oh eh Kepwe kan Ohla
13 Eri, rahn ehu, nindokon nein Sohp seri ko wie kamakamadipw ni imwen me keieu laud rehrailo, 14 a iet sounkair men ahpw tangatang kodohng Sohp oh ndaiong, “Se wie doadoahngki kou kan pwe en dedehk pwelen sapwomwi, oh ahs akan mwengemwengeseli limwaht. 15 Eri, ni ahnsowohte, mehn Sapeab SAPEA: Keinek ehu sang palieir, me kin kohdo pirapahsang aramas akan. kan pwarodo oh wahsang mahn ako. Re ahpw pil kemehla sapwellimomwi lidu koaros. Ngehite me pitla pwe I en kodohn kairehkin komwi.”
16 Nindokon sounkairo eh lokolokaia, emen ladu ahpw pil leledo oh nda, “Lioal kohdiher oh kemehla sihpw koaros oh pil sileparail koaros. Ngehite me pitla pwe en kodohn kairehkin komwi.”
17 Ahpw nindokon eh koasokoasoi, emen ladu apw pil leledo oh nda, “Pwihnen mehn Kaldeac KALDEA: Keinek ehu sang paliepeng, me kin kohdo pirapahsang aramas akan. siluh peiongkitadahr. Re kulihasang kamel koaros oh kemehla sapwellimomwi ladu kan koaros. Ngehite me pitla pwe I en kohdon kairehkin komwi.”
18 Mwohn eh kaimwisekala eh koasoio, emen ladu ahpw leledo oh nda, “Sapwellimomwi pwutak oh serepein koaros wie kamakamadipw ni imwen pwutak me keieu laudo, 19 a melimel ehu pa ipido sang nan sapwtehn. E ipidohte kauwehla ihmwo. Eri, sapwellimomwi seri ko koaros mehla. Ngehite me pitla pwe I en kohdohn kairehkin komwi.”
20 Sohp eri kesihnendahte tehrpeseng eh likou uwen eh nsensuwed. E ahpw sehkasang pitenmonge ko oh wendiong nanpwel. 21 E ahpw ketihtihki, “Sohte mehkot I ahneki ni ei ipwidi, oh sohte mehkot I pahn ahneki ni ei pahn mehla. KAUN-O me ketikihong ie mehkoaros, oh met ih me ketikihsang ie. Kapinga mware!” Sir. 40.1; 11.14.
22 Ni mehkoaros me wiawiher, Sohp sohte dipikihda eh lahlahwehki Koht.