1 “Se ese sang nan poadopoad akan me ntingdier me soukohp Seremaia kaweidki aramas ako me kalipilipalahng Papilon re en ekihla ekei kisiniei sang pohn pei sarawio, nin duwen me se ahpwtehn koasoia duwe. 2 Se pil ese duwen eh padahkihong irail Kosonned en Koht oh duwen eh kaparkin irail kaleke re lohdiong pahn songosong ni ar pahn kilangada dikedik en eni kohl oh silper kan nan wehi me re pahn sellahng ie. 3 Oh e pil koangngoangehkin irail kaleke re kesehla Kosonnedo.

4 “Poadopoad pwukat pil kasalehiong kitail duwen Seremaia, sang ni kaudiahl ehu sang rehn Koht, e koasoanehdi me Impwal me Kaun-o kin Ketiket Loale oh Kohpwahn Inowo en iangada ih kolahng ni nahna me Moses doudahla ie oh iroirdidohng pohn sahpw me Koht ketin inoukihong sapwellime aramas ako. 5 Ni Seremaia eh lel pohn nahnao, e diarada pwoaren paip ehu, wasa e ekihla ie Impwal me Kaun-o kin Ketiket Loale, Kohpwahn Inowo, oh pei sarawien warpwohmwahwo. Ih eri katengehdi ewen pwoahro.

6 “Ekei kompoakepahn Seremaia ko song re en idawehnla oh kilelehdi elen kolahng wasao, ahpw re sohte kak diar pwoaren paipo. 7 Ni Seremaia eh esehda dahme re wia, e ahpw lipoare irail, nda, ‘Sohte emen pahn ese wasao lao lel ahnsou me Koht pahn pwurehng ketikipene sapwellime aramas akan oh kasalehiong irail sapwellime kupwurkalahngan. 8 Ni ahnsowo Koht ahpw pahn ketin kasalehda wasa me mepwukat wie ekiek ie oh sapwellime lingan ahpw pahn sansalda nan depwek, duwehte ni mwehin Moses oh ni ahnsou me Solomon kapakap pwe Tehnpas Sarawio en kasarawihong Kaun-o.’ Eks. 16.10; 24.16; 1 Nan. 8.10-11.

9 “E pil ntingdier duwen Solomon, nanmwarki kupwurokong, eh ketin wiahda meirong ehu ni kasarawihpen Tehnpas Sarawio, 10 oh ni eh loulou kisiniei ahpw mweredi sang nanleng oh kasohrehla meirong ko, duwehte me wiawiher ni mwehin Moses ni ahnsou me e kapakapo. 11 Moses kawehwehda me meirong en tomwpen dihp kasohrkihla kisiniei pwehki eh sohte kin wiahla mehn mwenge. 12 Solomon wiewiahki kasarawihpen Tehnpas Sarawio erein rahn waluh.

13 “Pil wiewia pwukat dierekdahr nan pwuken nanmwarki kan oh nan nein Nehmaia pwuken kataman kan, me e kihpene wasa kis, iangahki pwuhk kan me Depit wiahda, nein nanmwarki kan kisinlikou kan me pid duwen meirong kan, oh pwuken poadopoad kan en nanmwarki kan oh soukohp kan. 14 Sudas pil rikpene pwuhk kan me pwumpeseng pwehki mahweno, oh se kolokolete pwuhk ko lel ahnsou wet. 15 Ma kumwail anahne soangen pwuhk pwukat, a kumwail pakairkidohng kiht, se ahpw pahn kadarowohng kumwail.

16 “Pwehki at kereniongehr wia Kasarawi Sapahl en Tehnpas Sarawio, se ntingkiwohng kumwail en iang wia kataman wet. 1 Mak. 4.59. 17 Koht ketin komouralahr sapwellime aramas akan koaros oh ketin kapwuredohngehr kitail koaros nan sapwatail sahpw sarawio, atail nanmwarki kan, samworo kan, oh tiahk en kaudok nan Tehnpas Sarawio, 18 duwen me e ketin inoukidahr nan Kosonnedo. E ketin kapitkitailla sang me suwed kowahlap kan oh kamwakeledahr Tehnpas Sarawio, oh se koapworopworki me sang nan eh kupwurkalahngan e pahn mwadang kapwureikitailpene sang wasa koaros nin sampah ong nan sapwellime Tehnpas Sarawio.”

19 Sason mehn Sairini ntingihdier nan pwuhk limau koasoiepen Sudas Makapius oh rie ko, kamwakelpen Tehnpas Sarawi lapalapo, oh kasarawihpen pei sarawien Tehnpas Sarawio. 20 E ntingihedi duwen mahwen kan ong Antaiokus Epipanihs oh ong nah pwutak Eupater, 21 oh soangen wiewia kapwuriamwei kan en nanleng me wiawihong aramas dengngan kan oh kommwad en mahwenki wehin Sudia. Atail tungoal karis kan me malaulau, ahpw re doarehla wehio pwon oh pwakihiei sang loale sounpei en me rotorot akan. 22 Re pwurehng alehdi Tehnpas Sarawio me ndandpe lelpeseng wasa koaros nin sampah, re kasaledekihala kahnimw Serusalem oh onehda sapahl kosonned kan me milahr nan keper en kasohrala. Irail wiadahr mepwukat koaros pwehki Kaun-o eh kupwurehkin irail sapwellime sawas.

23 Eri, met I pahn song oaralapihada nan pwuhkteieu soahng koaros me Sason oaritikihada nan pwuhk limau me e ntingihada. 24 Uwen oaritik oh toutou en pwuhk pwukat kak apwal ong mehmen me men wadek koasoiepen mwekid pwukat. 25 Ahpw I song kamangaila mehkoaros ong soangen aramas koaros me pahn men wadek pwuhk pwukat; ong irail kan me kin perenki wadek pwuhk en kak perenki oh en dehr apwal ong irail me men wadlikih. 26 Ntingihada soangen oaralap wet sohte mengei, me doadoahk laud oh toutou. 27 E rasehng kaukaunop kamadipw ehu ong soangesoangen aramas kei pwe re en kak perenki. Ahpw I perenki wia doadoahk apwal wet pwe I en kaparanda irail kan me pahn wadek pwuhk wet. 28 Oaritik en wiewia kan pahn mihmihte rehn aramas me tepin ntingihada pwuhk ko, a ngehi I pahn songete oaralapihada wiewia kan. 29 Kaidehn ngehi sounkauwada ihmw kapw me uhdahn kin tehk duwen oaritik en mwomwen kokoudahn ihmwo, ahpw ngehi sounlitoapw me ngoangkihte ihmwo en lingan. 30 Ih pwukoahn sounpoadopoad, rapahki keneinei soahng kan me pid poadopoado, tehk mwahu oaritik kan koaros, e ahpw pahn kawehwehda ni keneinei. 31 Ahpw me kin oaralapihada mehkot, pahn kin doadoahngki mahsen mwotomwot pwe en dehr reirei ni eh pahn koasoiahda. 32 Eri, I pahn tapihadahr ei koasoi, pwe e sohte konehng ntingihada kawehwepen pwuhk ehu ni nting reirei ahpw pahn kamwotehla poadopoado.