69
Kapakap en Peki Sawas x TITLE NI MAHSEN EN IPRU: En Depit.
1 Maing ei Koht, komw ketin doareiehla!
Pihl kodahr oh lelehr ni tepinwereiet;
2 I kihrlahr nan pwelmatak loal,
oh sohte wasa I en sok ie;
I lelehr wasa loal,
oh iloak kan nektehn kamwopwiehla.
3 I mwoatohtkilahr ei likilikwer en pek sawas,
oh nan kepinwereiet medengkilahr.
Pwoaren mesei kat mahlkidahr
ei kilikilengwohng sapwellimomwi sawas.
4 Irail kan me kin kailongkin ie ni sohte kahrepe
re tohtohsang pitenmoangei kat.
Ei imwintihti kan kin peliankin ie lokaia likamw;
re inenen kehlail oh men kemeiehla.
Re kin idingohng ie I en kapwurehwei mehkot me I sohte pirapahda. Mel. 35.19; Sohn 15.25.
5 Maing Koht, dipei kan sohte kin rirsang komwi;
komwi me ketin mwahngih ia uwen ei pweipwei.
6 Maing KAUN, Wasa Lapalahpie,
komw dehr ketin mweidohng ie I en kanamenekihala irail kan me kin likih komwi!
Maing Koht en Israel,
komw dehr ketin mweidohng ie I en kasarowehdi irail kan me kin pwongih komwi!
7 Pwehki mwaromwi me I alehkiher kepweikeng sang rehn aramas akan
oh direkilahr namenek mwuledek.
8 I rasehngalahr mehn liki men rehn riei kan,
oh mehn liki men nan ei peneinei.
9 Ei ngoangki lingan en Tehnpasomwi kin ngkengken loalei rasehng kisiniei;
kepweikeng kan me kin wiawihong komwi, pil lelohng ie. Sohn 2.17; b Rom 15.3.
10 I kin mpahikihla ei kaisihsol,
a aramas akan kin kapweikengih ie;
11 I kin likawihada likoun nsensuwed,
a re kin kouruhrkin ie.
12 Re kin lipahnede ie nanial akan,
oh me sakaulahr akan kin kokoul kepikepitkin ie.
13 Ahpw Maing KAUN, I pahn patohwan kapakap ong komwi;
Maing Koht, komw ketin sapeng ie ni ahnsou me komwi kupwurki,
Komwi ketin sapeng ie pwehki sapwellimomwi limpoak lapalap,
pwehki omwi ketin dadaurete sapwellimomwi inou en komouriehla.
14 Komw ketin doareiehla pwe I kikihrla nan pwelmatak;
komw ketin sinsile ie sang ie imwintihti kan,
oh sang nan kepinpil loal wet.
15 Komw dehr ketin mweidohng ahden pihl en koaduhpwalihiehdi;
komw dehr ketin mweidohng I en duhla nan lapake wet,
de kihrla nan sousou.
16 Maing KAUN, komw ketin karonge ie sang ni kalahngan en sapwellimomwi limpoak poatopoat;
komw ketin sohpeidohng ie sang ni sapwellimomwi kalahngan lapalap!
17 Komw dehr ketin karirasang silangmwi sapwellimomwi ladu menet;
I patopatohier nan apwal laud—komw ketin sapeng ie ahnsou wet!
18 Komw ketido rehi oh ketin doareiehla;
komw ketin kapitiesang ei imwintihti kan.
19 Komw ketin mwahngih duwen koasoi kepweikeng kan me I kin ale,
duwen ei paisuwedlahr oh solahr wahupei;
komw ketin mahsanih ei imwintihti kan koaros.
20 Lokaia kepweikeng kan kauwelahr mohngiongi,
oh sohte mehkot kak sewese ie.
I men emen en sewese ei nsensuwed, I ahpw sohte diar;
I rapahki emen me pahn kansenamwahwihiehla, I ahpw sohte diar.
21 Ni ei duhpeklahr, re kihong ie pwoisin;
ni ei men nimpildahr, re kihong ie pinike. Mad. 27.48; Mark 15.36; Luk 23.26; Sohn 19.28-29.
22 Arail kamadipw kan en wiahla kauparail;
arail kamadipw kan en kahrehiong irail arail paisuwedla. Rom 11.9-10.
23 Komw ketin karotongehla masarail kan!
Komw ketikihsang kehlail en tihnsewarail pwe re en kin luwet ahnsou koaros!
24 Komw ketin angiangihirailda;
komw ketin mweidohng pwe angin omwi engieng en koanoairaildi.
25 Arail wasahn kousoan kan en tehnla;
oh imwarail impwal kan en sohla towe me mour. Wie. 1.20.
26 Re kaloke irail kan me komw ketin kalokeier;
oh koasoia duwen lokolok en irail ko me komw ketin kalokeier.
27 Komw ketin kolokolete kadehdepen diparail kan koaros;
dehr ketin mweidohng re en iang paieki sapwellimomwi komour.
28 Adarail kan en irihrsang nan pwuken me momour kan;
re en dehr iang wadawadohng sapwellimomwi aramas akan. Eks. 32.32; Kaud. 3.5; 13.8; 17.8.
29 Ahpw iet pwe I patopatohier nan pwunod oh medek;
Maing Koht, komw ketin pwekiehda oh doareiehla.
30 I pahn kapingahki Koht apwoat koulen;
I pahn lohkiseli sapwellime roson lapalap ni ei pahn kapikapinga.
31 Met pahn kaparanda kupwur en KAUN-O laudsang meirongkihong emen kouen,
laudsang meirong en emen lapalahn kouwolen.
32 Me toutoulahr akan ni ar pahn kilang irair wet, re pahn nsenamwahula;
irail me kin pwongih Koht, re pahn nan kapehd kehlailkihda.
33 KAUN-O kin ketin karonge irail kan me kin mihmi nan anahn laud
oh sohte kin ketin likidmeliehla sapwellime kan me kin sensel nan imweteng.
34 Kumwail kapinga Koht, kumwail nanleng oh sampah,
madau kan oh audeparail kan koaros.
35 E pahn ketin doarehla Serusalem
oh ketin onehda sapahl kahnimw kan en Suda.
Sapwellime aramas akan pahn kousoanla wasao oh sapwenikihla sahpwo;
36 kadaudok en sapwellime ladu kan ahpw pahn sohsohkihla sahpwo,
oh irail kan me kin poakohng Koht, re pahn kousoanla wasao.
x^ TITLE NI MAHSEN EN IPRU: En Depit.
69:21: Mad. 27.48; Mark 15.36; Luk 23.26; Sohn 19.28-29.
69:28: Eks. 32.32; Kaud. 3.5; 13.8; 17.8.