1 Sounpar siluh mwuri, Sudas oh ienge ko rongada me Demihtrius, nein Seluhkus, peidier ni wasahn peidi en sohp en Tripolis iangahki lapalahn karis ehu oh polohn sohp ehu. 2 Rohng ehu mie me dene e kemelahr Nanmwarki Antaiokus oh Lisias, sounepwelpeo, oh e kaundahr wehio.

3 Mie ohl emen ede Alsimus, me mahs wia Samworo Lapalap men, ahpw perenkihda iang alasang tiahk en mehn Krihs kan ni ahnsou me re moromoradao. Ni eh pehmadahr me e solahr kak wia Samworo Lapalap oh perkidahr dahme mehn Suhs kan pahn wiahiong, 4 e ahpw patohla rehn Nanmwarki Demihtrius nan pahr 151,l PAHR 151: Sounpar wet pahrekiong pahr 161 mwohn Krais. oh patohwanohng elin kapwat kohl ehu oh tehnpaini ehu, iangahki rahntuhke olip kei me re kin walahng nan Tehnpas Sarawio nin duwen tiahk ehu, ahpw e sohte mweseiseikihong nanmwarkio dahme e koasoakoasoane.

5 Ahpw mwuri, e diarada ahnsou mwahu en kasalehda eh koasoandi suwedo, iei ahnsou me Demihtrius lukedohng ni wiekupwur ehu en sapwellime sounkaweid kan, irail eri idek reh dahme mehn Suhs kan kin koasoakoasoane re en wia.

Alsimus eri sapengkin irail, 6 “Iengen Sudas Makapius kan kin wiahki pein irail aramas poadidi kei oh ngoangki kamwahupen wehi; re kin perenki mahwen oh kapikaping aramas akan pwe re en wie moromor oh sohte kak mweidohng wehio en meleileidi. 7 Irail me kahredahr ei solahr wia Samworo Lapalap, me I ahneki sang ni pwungen sohso. Iei me I patohkihdo wasaht, 8 keieu pwehki ei ngoangki ni mehlel mehkan me kesempwal pahn nanmwarki, keriau pwehki ei kesempwalki kamwahupen tohn ei wehi, pwe tiahk suwed kan me Sudas oh ienge kan wiewia kahredahr tohn at wehio pwon at lokolok laudki. 9 Ni Wasa Lapalap eh pahn ketin tehk ni keneinei oaritik kan en ire pwukat, komw ketin kupwur sapan ong kamwahupen at tungoal wehi oh paisuwedlahn aramas akan nin duwen omwi kupwurmwahu. 10 Erein Sudas eh pahn patohwan momour, at wehi sohte pahn kak meleileidi.”

11 Mwurin Alsimus eh wia sakarada wet, sounkaweid teiko ahpw mwadangete ale ahnsou mwahu wet oh pain engieng en Demihtrius ong Sudas, pwehki ar pil kailongki Sudas. 12 Nanmwarki Demihtrius eri mwadangete pilada Nikanor, me kaunda sounpei kan me kin dake elepant, pwe en wiahla kepinahn Sudia, e ahpw kadarala Nikanor 13 oh koasoandiong en kemehla Sudas, pwakihpeseng ienge ko, oh kasapwilada Alsimus en wiahla Samworo Lapalap en Tehnpas Sarawi me keieu lapalap nan sampah pwon. 14 Mehn liki koaros me koukousoan Sudia, me sopohkipeseng en Sudas mwekid kan, ahpw mwadangete iangala Nikanor, pwehki ar medemedewe me lohdi de kahpwal me pahn lelohng mehn Suhs kan pahn wia kamwahu ehu ong irail.

15 Mehn Suhs ko rongada me Nikanor pahn mahweniong irail oh dene mehn liki kan me koukousoan rehn mehn Suhs kan iang utung. Irail eri kidahng pehs pohn moangarail kan oh kapakapohng Koht, me ketin pilada ar wehi pwe en wiahla sapwellime kohkohlahte oh sohte kin ketin likidmelieirailla ni ahnsou apwal. 1 Mak. 7.29-30. 16 Eri Sudas, ar kaun, ahpw ruwese irail en mwekidla pwe re en mahweniong ar imwintihti ko limwahn kisin kahnimw en Adasa. 17 Saimon, rien Sudas, wie mahmahweniong Nikanor ahpw sohte kak pweida pwehki eh sohte kasik soangen mwekid me imwintihti ko wiewia. 18 Ahpw, ni Nikanor eh rongada duwen kommwad oh nan kapehd kehlail en Sudas oh ienge ko ni ar mahmahwenki ar wehi, e medewehda me e sohte pahn kameleileikihdi wasa mahwen. 19 E ahpw kadarala Posidonius, Deodotus, oh Madadaias pwe re en wiahda ehu inou en minimin ong mehn Suhs kan.

20 Mwurin ar oaritikihadahr audepen inowo, Nikanor eri kairehki nah sounpei ko, irail koaros ahpw pwungki. 21 Re ahpw kilelehdi rahn ehu me kaun akan pahn tuhpene wiekupwur kelehpw. Sehr kan ahpw wisikpene sang nan ehuehu kahnimpwal ko oh koasoansoandi wasahn wiekupwuro. 22 Sudas eri kihdi nah sounpei kei wasa mwahu kei pwe imwintihti ko de peien wia mwekid suwed ehu. Ahpw wiekupwuro pweida oh sohte mwekid suwed ehu pwarada. 23 Nikanor eri mihmihki Serusalem ahnsou kis mwurin mwo, oh e sohte wia mehkot suwed ong mehn Suhs ko. E pil kapwurepeseng aramas ako me kodohng iangala eh pali. 24 Ohl riemeno eri ehupene, Nikanor inenen werekiong mehlel Sudas ahnsou koaros. 25 Nikanor koangngoangehki Sudas en pwopwoudida oh tapihada peneinei ehu. Sudas eri pwopwoudida oh soandihla ni meleilei oh popohl.

26 Ni Alsimus eh tehkadahr duwen Nikanor oh Sudas ara nanpwungmwahupene, e ahpw ale pelien kisinlikou en inowo oh patohla rehn Nanmwarki Demihtrius. E kairehki nanmwarkio me Nikanor soaloalopwoatohng wehi, pwehki eh pilada sounpangala wehi, Sudas, en wiahla weliepe. 27 Lokaia likamw pwukat ahpw kahngiangihada nanmwarkio, oh nan eh engieng e ahpw ntingihada kisinlikou kis ong Nikanor; e mahsanihong duwen eh sohte kupwurperenki inowo me e wiahiong Sudas, oh en mwadangete salihedi Sudas oh kadaralahng Andiok.

28 Ni rohng wet eh lelohng Nikanor, e inenen nsensuwedla oh sohla ese dahme e pahn wia, pwehki eh sohte men kauwehla inou ehu me e wiahiong ohl emen me dadaurete audepen ara inowo. 29 Ahpw e sohte kak kauwehla sapwellimen nanmwarkio mahsen, ih eri tapihada rapahki ahl en kalowehdi Sudas. 30 Sudas tehkada duwen Nikanor eh solahr men ehuong oh kin pohnsehse ni ara kin tuhpene; eri, e ese me met pahn wia mwekid suwed ehu. Ih eri ale kiden ohl sang rehn ienge ko oh kohla rukula.

31 Ni Nikanor eh tehkada me Sudas loalokong sang ih, e ahpw kohla ni Tehnpas Sarawi lapalapo ni ahnsou me samworo ko wiewia meirong oh ruwese re en pangodohng reh Sudas. 32 Ahpw samworo ko kahukihla me re sohte ese wasa me Sudas mihmi ie. 33 Nikanor eri kauwalahng peh palimaun ni Tehnpas Sarawio oh kahukihla: “Ma kumwail sohte pahn salihedi Sudas oh pangodohng ie, I pahn karangkehdi sapwellimen Koht Tehnpas Sarawi wet nanpwel, kauwehla pei sarawi wet, oh kauwada wasaht ehu tehnpas lingan ong koht Dionisius.” 34 Ih eri kohkohla, oh samworo ko ahpw mwadangete kapahdahla pehrail kan nanleng oh wia kapakap wet ong Koht, Sounpoadoarepen at wehi loalopwoat: 35 “Maing at Kaun, sohte mehkot me komwi kin ketin anahne, ahpw komwi kupwurperenki kauwada sapwellimomwi Tehnpas Sarawi wasaht oh ketiket reht. 36 Komwihte me sarawi, oh sapwellimomwi Tehnpas Sarawi wet ahpwtehn kamwakelda, eri, komwi ketin sinsile eh sarawi kohkohlahte.”

37 Kadip ahpw wiawihong Nikanor me dene emen kaun ako nan Serusalem ede Rasis kin sewese nah aramas akan ni soahng tohto oh aramas akan kin wauneki mehlel oh kin ekerki “Semen mehn Suhs kan.” 38 Tepin moromor eh wiawihda nan Serusalem, Rasis diarki lokolok laud eh kapwaiada tiahk en mehn Suhs kan, e ahpw lelohng kopwung pwehki eh loalopwoat. 39 Pwehki Nikanor eh men kasalehiong mehn Suhs duwen eh kailongkin irail, e ahpw kadarala sounpei 500 pwe re en poarokedi Rasis, 40 pwehki eh lemeleme me en Rasis eh pahn selidi pahn kahrehiong mehn Suhs nan apwal laud. 41 Sounpei ko kereniong kalowehdi wasahn iroir me Rasis mihmi loale. Re nannantihong re en ritingada ewen kehl en pedolong wasao, oh ruwes ahpw wiawihong irail re en isikada wenihmwo. Rasis ese me sohte wasahn eh pitla, ih eri song en kemehkihla nah kedlahso pein ih, 42 pwe e men mehla ni wahu sang ale lokolok kanamenek rehn ohl suwed menet.

43 Ni eh pwurupwurur nan eh mwekido, e ahpw sapwungala oh kedlahso sohte kemehla. Ni ahnsowo sounpei ko pedolongehr nan ihmwo, ih eri tangalahte lusdilahng nan pokono pah duwen aramas kommwad men. 44 Pokono eri mwadangete pweieksang wasa me e pwupwudieo. 45 E sohte mehla, oh nan kapehde wie okohngki eh kommwad, nta kusukussang nan eh ohla kan, e ahpw pwourda oh tangala nanpwungen pokono oh doudahng pohn paip ehu. 46 Solahr ntah, e ahpw pwadikeisang mwasahle ko oh katehki aramas ako, nindokon eh wiewia met, e ahpw wie kapakapohng Koht pekipeki en kasapahldohng eh mour oh esingek. Met iei duwen Rasis eh mehla.