Da 103. Psalm.
Di Bamhatzichkeit Funn Gott
Fumm Dawfit.
1 Lohb da Hah, oh mei sayl,
un alles es in miah is;
lohb sei heilichah nohma.
2 Lohb da Hah, oh mei sayl,
un fagess nett vass goodes es eah diah gedu hott.
3 Eah fagebt diah awl dei sinda,
un hayld awl dei grankeda.
4 Eah shteld dei layva frei fumm grawb,
un krohnd dich mitt gnawt un bamhatzichkeit.
5 Eah fild dei layva mitt goodi sacha,
un du vatsht viddah yung vi en awdlah.
6 Da Hah shaft gerechtichkeit,
un macht alles recht fa selli es nunnah gedredda sinn.
7 Eah hott sei vayya vissa glost zumm Mosi
un sei kshefta zu di Kinnah-Israel.
8 Da Hah is bamhatzich un gnaydich;
eah vatt nett kshvind bays, un hott grohsi leevi.
9 Eah hald nett oh pshuldicha,
un sei zann bleibt nett fa'immah.
10 Eah shtrohft uns nett noch di shuld funn unsah sinda,
un betzawld uns nett zrikk in di gleichnis es miah letz doon.
11 Fa so hohch es da himmel is ovvich di eaht,
so grohs is sei leevi fa selli es een firchta.
12 So veit es di east is funn di west,
so veit dutt eah unsah sinda vekk funn uns.
13 Vi en faddah bamhatzich is zu sei kinnah,
so is da Hah bamhatzich zu selli es een firchta.
14 Fa eah vayst vi miah gmacht sinn,
un denkt droh es miah yusht shtawb sinn.
15 Un veyyich em mensh, sei layva is vi graws,
eah bleet vi en blumm im feld,
16 no blohst da vind ivvah di blumm, un see is nimmi,
un da blatz fagest alles veyyich iahra.
17 Avvah funn ayvichkeit zu ayvichkeit,
is em Hah sei shtandhaftichi-leevi uf selli es een firchta,
un sei gerechtichkeit mitt iahra kinds-kinnah—
18 mitt selli es sei bund halda,
un meinda fa sei gebodda du.
19 Da Hah hott sei kaynich-shtool ufketzt im himmel,
un sei Kaynich-Reich roold ivvah alles.
20 Lohvet da Hah, diah sei engel,
diah mechtichi es sei gebodda ausrichtet,
un doond vass sei vatt sawkt.
21 Lohvet da Hah, awl diah sei himlish folk,
diah, sei deenah es sei villa doon.
22 Lohvet da Hah, alles es eah gmacht hott
ivvahrawlich in sei Kaynich-Reich.
Lohb da Hah, oh mei sayl.