Da 75. Psalm.
Gott Da Richtah
Zumm foah-singah. Fa ksunga sei zu di veis, “Du Nett Fadauva.” En Psalm fumm Asaph.
1 Miah gevva dank zu diah, oh Gott;
miah gevva dank un sawwa leit veyyich dei vundahboahri verka,
veil dei Nohma nayksht is.
2 Gott sawkt, “Vann di zeit es ich ksetzt habb moll kumd,
dann richt ich recht.
3 Vann di eaht un awl iahra leit ziddahra,
dann hayb ich iahra poshta grawt uf.
(Sela)
4 Ich sawk zu di shtolsa, ‘Doond nimmi braekka,’
un zu di gottlohsa, ‘Hayvet eiyah hann nett uf.
5 Hayvet eiyah hann nett uf geyyich da himmel,
shvetzet nett grohs-feelich mitt em hals naus kshtrekt.’ ”
6 Nimmand funn di east adda di west,
adda funn di vildahnis kann en mann hohch eahra.
7 Avvah's is Gott es richta dutt:
Eah bringd aynah nunnah un haybt da annah uf.
8 Da Hah haybt en kobli in sei hand,
kfild mitt shaumichah vei es goot gmixt is.
Eah leaht's aus un awl di ungettlicha uf di eaht
missa's drinka nunnah biss an da satz.
9 Avvah ich shvetz veyyich demm fa'immah.
Ich zayl lohb singa zumm Gott fumm Jakob.
10 Eah zayld di hanna funn di gottlohsa abshneida,
avvah di hanna funn di gerechta zayla uf kohva sei.