1 Evus, tai en angelo keil koa avi oulu (7) koa akur pesin keil, kei mai venau ka vit, “Amai, ka nitie minuk hemukave Ahi helei rahit usite onen hoeaso koa meatin vasi keil akilea eni. Kei vi mari taon enek koa amuti vesesal en oaisal keil. ✡ Ser 51:13; Rev 17:15 2 Asuv houlu keil ten out netan amumon sakien tatisa ral mini, ka meatin keil ten out netan emun amun uaen onen ten sakkalkalien, umai avi vau eni, ka amumon sakien ten hoeasoen ral mini.” ✡ Aes 23:17; Ser 51:7; Rev 14:8; 18:3

3 Navong selus minau evus, Ninin Votut sienau, ka angelo koanik kur inau melva en out volvol. Ekonek, nales ahin tai rondan en tirendan tisa koa mulamu koa aven vilhili. Vatin oulu (7) ka hon keil onen halualim (10). Ka ka vasin aven, amutis eis keil ten hetetamenien mul ien koa venani ran Ahi vahi onen. ✡ Rev 13:1; 17:7-12 4 Ahin enek musin en eisin ten hetetamenien koa vi pepol ka vilhili. Kei mosan eni en gol, mormore ahat ka veimesau keil tetahos. En hen, mul vuli kat kap tai koa vi gol koa vilelau en tounah keil koa avi amus ka atisaso, keil avi heite ten sakien tatisa keil onen. ✡ Esek 28:13; Rev 18:16; Ser 51:7 5 En veinan amutis eis suai tai koa aneite ten mukok: “Mari Babilon, latin hoeaso vasi keil ka vatte ten sakien tisa keil vasi en out netan.” 6 Ahin enek mul sakin meatin sav keil amu vinvini meatin keil onen Ahi ka koakeil avitehiten anatinien usil Iesu. Nalesi keke ahin enek vi vau en rae suval ahin koa munmun va vio … vi vau en uaen. Ka navong nalesi, namutimanin varei. ✡ Rev 18:24; 19:2

7 Ka angelo vis nau vit, “?Komutimanin vensa? Inau nihit lein aneite ten rendemien suai usil tirendan ekek koa vatin oulu (7) ka hon halualim (10) ka en ahin koa rondan eni. 8 Tirendan koa kolesi, kei mul mulamu, romultei mun kosa, ka hervitei tuetin, hel hemea ran Vulvul koa keite teni tovuol. Hevus, ilamuni iha ka u vini. Meatin keil ten out netan koa ise armutis kattei en Tus ten Moulien mulamu en avong amumon out netan, keil itimanin en tirendan enek. Anatin, keil itimanin navong ilesi keke tirendan enek mul mulamu, romultei mun kosa, ka hel hekistal eris en avong hemai veah. ✡ Dan 7:3; Rev 11:7; 13:1; Eks 32:32,33; Sam 69:28; Dan 12:1; Plp 4:3; Rev 3:5; 13:8; 20:12,15; 21:27

9 “Aneite ten leisanien enek hemai hehothot en koakeil rendemien ten metaluv mul en keil. Avat oulu (7) onen tirendan enek vi hou oulu koa ahin enek mul rondan ien. † Taon ten out Rom mul en hou oulu (7). Avat oulu enek, aneite tamun teni vi asuv houlu oulu. 10 Elim (5) en asuv houlu keil enek uvus tuai, tai mul losil kat out kosa, ka koa ekor en keil, kei romaitei veah. Navong hemai, Ahi hemaeni helosil kat out ten avong havivis. 11 Ka tirendan tisa koa moul mulamu ka romoultei mun kosa, kei mun vi asuv houlu tai koa vi outel (8) en keil. Kei hesuval asuv houlu oulu (7) ka Ahi helamuni heha ka hou vini.

12 “Hon halualim (10) koa kolesi, keil avi asuv houlu keil koa arlosil kattei veah etai out. Keil ikur hiasuvien one ten avong havivis keke avalosil kat out keil en out netan vatal min tirendan tisa. ✡ Dan 7:24 13 Koakeil halualim ekek, rendemien one vatte hetas keke imaen keihoen ka losilkatien one min tirendan tisa enek. 14 Keil ivae kat kei koa suval sipsip ka onen keil koa kei vise keil ka rie lat keil avousil kati lises. Ka kei helin tirendan ka onen keil veni kei vi Asuv Houlu onen asuv houlu savsav keil, ka vi Avat onen avat savsav keil.” ✡ Dut 10:17; Dan 2:47; 1Tim 6:15; Rev 19:16

15 Angelo viteni mun minau vit, “Oaisal keil kolesi koa hoeaso mul rondan ien, keil avi tatavolien usil meatin keil koa aka en vangi meatin keil, kantri keil, vati meatin tateisav keil, ka selusien keil ten out netan. 16 Hon keil halualim (10) ka tirendan koa kolesi, keil imai itisa kat hoeaso enek. Keil imai ilah lat vasin tounah keil onen ka ilokoveini hekaka hon. Keil ian teiai onen ka iling ahang hean lini. ✡ Lev 21:9; Rev 18:8 17 Asuv houlu halualim enek, Ahi ling rendemien onen mul en keil keke avoumoni vamukonek ka avamaen keihoen ka losilkatien one min tirendan tisa enek hetokol avong selusien onen hemai hekistal hehi anatin.

18 “Ahin koa kolesi vi mari taon koa mul losil kat asuv houlu savsav keil ten out netan.”