Ebbaluŋa eyi Pawulo gaŋandiihira
Tito
Enyanjula
Ebbaluŋa ya Tito ndala hu bbaluŋa ene eji Pawulo gaŋandiihira abaatu ohutusaho ebibbubbu byʼabafugiirira Kurisito. Hamunga Pawulo gaŋandiiha ebbaluŋa yino ŋagati wʼomwaha ogwʼenkaaga nʼedatu ko nʼenkaaga nʼetaanu, oluvanyuma lwʼohusaaliwa hwa Kurisito.
Pawulo gaali aŋambisye Tito omulimo ogwʼohutangirira ebibbubbu byʼabafugiirira Kurisito hu hizinga Kureete. Era Pawulo gaŋandiiha ebbaluŋa yino nʼalaabbira Tito hu ngeri endaŋi eyʼohwangala ko nʼohutendeha abatangirisi babafugiirira Kurisito. Ebbaluŋa yino yinyonyola engeri eyi abafugiirira Kurisito baali nʼohuŋambamo abatangirisi baawe. Abafugiirira Kurisito nʼabatangirisi baawe bali nʼohutegeera ebisanyizo ebi batangirisi bali nʼohuba ni nabyo.
Ebiri mu bbaluŋa yino mu buupi
1. Pawulo alabbira Tito engeri eyʼohwangalamo abatangirisi babafugiirira Kurisito (1:1-16)
2. Pawulo alabbira Tito ohusomesa abaatu ohuba nʼobulamu obugwalaafu (2:1–3:11)
3. Pawulo aheneresa nʼaloma hu tegeha eyi gaali ninayo era ngʼagohoba nʼobuheese (3:12-15)
1
Pawulo geyanjula era aheesa Tito
1 Ndiise Pawulo omuŋeeresa* 1:1 Oba omwidu. wa Hatonda era omuhwenda wa Yesu Kurisito oyu Hatonda gangala gaatuma ohunywania mu baatu babe abatobole ohufugiirira hwawe mu Yesu Kurisito, nʼohutegeera esomesa etuufu eyiŋamba hu Kurisito, ebiyeeda omuutu ko gagendera mu bulamu obusangaasa Hatonda. 2 Ohufugiirira ohwo nʼohutegeera esomesa etuufu kohu esuubi lyʼefe eryohusuna obulamu obutaŋwaŋo, obu Hatonda atadulinga gatusuubisa ohuŋwa ahale nahale, lyediiye. 3 Ehiseera hihye ehiragaane ni hyola, gaata aŋalafu ehibono hihye ehyo mu buhwenda obu gapambya, ndomere abaatu. Keesi tyo po kola ngʼolu Hatonda Omunoŋosi weefe gandagira.
4 Kuŋandiihira ewe Tito oyu pira ngʼomwana wange omwene nʼomwene, mu hufugiirira hwefe mu Kurisito atuŋimba, ese ni neewe. Hatonda Seefe ni Yesu Kurisito Omunoŋosi weefe bahuŋambire ehisasabirisi era bahuŋe nʼemiyaaya.* 1:4: 2 Kor 8:23; Bag 2:3; 2 Tem 4:10
Omulimo gwa Tito mu Kureete
5 Nahuleha hu hizinga hyʼe Kureete oheneerese ogwʼohutereesa ebyali ni bihiŋumiraho, nʼohutaŋo abatangirisi bʼabafugiirira Kurisito mu hiisi hibuga, ngʼolu nahuloma.
6 Omuutu oyu otaŋo ohuba omutangirisi wʼabafugiirira Kurisito, ateehwa ohuba nʼaŋumaho ehi bamweŋambya, nʼali musinde owʼomuhasi mulala era nʼateebira piki nʼabahasi abandi. Abaana babe batehwa ohuba abafugiirira Kurisito, era ni batali aba abaatu babala ohuba abʼehifaabi oba abajeemu. 7 Olwohuba omutangirisi† 1:7 Ebyaŋandihiwa ebindi bitambisa omulabirizi. oyo muŋeeresa wa Hatonda, era ateehwa ohuba nʼaŋumaho ehi baatu bamweŋambya. Ali nʼohuba omuutu aŋeeha amagesi, afuga omutwe, atali mumeesi, atali wʼehifaabi, era atahabira ebi atatuyaaniriiye. 8 Aye ateehwa ohuba omuutu asangaalira ohuhyasa abageni, era nʼanyumirwa ohuholera abaatu ebiraŋi, omwegenderesa, atehubbira, agendera mu bulamu obugwalaafu, era owʼesambo endaŋi. 9 Ateehwa ohuba omuutu atacuuhacuuha aye owemeereeye nʼamagulu gombi mu hibono ehituufu ehiŋamba hu Yesu Kurisito, ngʼolu bahimusomesiise. Hino hiija humuleetera ohusobola ohuyeeda abaatu abandi ohuŋamba esomesa eŋamba hu Kurisito etuufu, nʼohubalaga obugodami bwʼabo abayiŋahania.* 1:9: 1 Tem 3:2-7
10 Hiri hiityo olwohuba ŋaliŋo eyo abaatu bangi abajeemera abatangirisi, ko weyite abʼehibbubbu hyʼabaloma baati abaatu bosibosi bateehwa ohuŋamba egambi lyʼAbayudaaya eryohuhomola. Abaatu abo beerombola ebinambulamo ni benda badulinge abahyawe. 11 Olwʼehyo simya esomesa yaawe olwohuba bali hutiina ni babbaamya abaatu, hidaala hu hidaala ni basomesa ebibono ebi batasaaniiye husomesa ni hireetera abaatu ohuŋwa hu hufugiirira Kurisito ni bafugiirira ebi basomesa, ngʼehibaliho hyʼohubasuniramo. 12 Ebindoma bino, ni mulala hu baatu baawe omwene, oyu abeene baloma mbo gaali naabbi galoma ati:
“Abaatu bʼe Kureete
baberereeye badulingi;
bali hyʼebinyaŋa,
banyumirwa hufenja aye sibenda hutamba!”
13 Ebi gabalomaho ebyo bituufu byene. Olwʼehyo, hayulanga abafugiirira Kurisito bataŋamba sambo eyo embi, ko babe nʼohufugiirira ohutuufu. 14 Batatanga mwoyo hu ngano jʼEhiyudaaya, oba hubi baatu abagaana ohufugiirira esomesa etuufu eyiŋamba hu Kurisito babalagira ohuhola.
15 Eyiri abaatu abagwalaafu mu moni ja Hatonda, ŋabula hisira. Aye eyiri ababbeeme era abatafugiirira Kurisito, siŋabaŋo higwalaafu, olwohuba ebiŋeego byawe byahena ohubbaama sibahisobola hwawula hiraŋi nʼehibi. 16 Abaatu abo baloma mbo bamanyire Hatonda, cooka ebi bahola biraga humutala. Baŋwamo hale, sibahigondera Hatonda era ŋabula nʼehiraŋi ehi baŋanga ohuhola.