Ebbaluŋa eyi Pawulo gaŋandiihira
Abagalatiya
Enyanjula
Pawulo omuhwenda wa Yesu njʼowaŋandiihira Abagalatiya ebbaluŋa yino (1:1). Ebbaluŋa yino Pawulo gayiŋandiihira ehibbubbu hyʼabafugiirira Kurisito abomu twale lyʼe Galatiya ŋagati wʼomwaha ogwʼane namunaana nʼogwataanu namusanvu oluvanyuma lwʼohusaaliwa hwa Kurisito. Abahugu mu byʼEbbayibbuli bateberesa baati Pawulo gaŋandiiha ebbaluŋa yino nʼali mu Efeeso oba e Koriiso.
Pawulo gaŋandiihira ebibbubbu byʼabafugiirira Kurisito mu Galatiya, omwali Abayudaaya nʼAbatali Bayudaaya. Gaŋandiiha nʼaŋahania esomesa eyʼobudulingi mbo abafugiirira Kurisito baali nʼohuhuuma amagambi gʼEhiyudaaya ohuŋwa mu Ndagaano Ekayire, ohuhirira erala ohuhomola. Ehindi, baali baleetera abafugiirira Kurisito ohuba nʼohubuusabuusa mu Pawulo ohuba omuhwenda owa Yesu. Hino hyagira Pawulo gesolaho ohulaga ati muhwenda (1:11–2:14). Gaŋandiiha nʼanyonyola ati omuutu ali nʼohufugiirira Kurisito ko ganoŋoha (2:16). Era abaatu banoŋoha olwʼehisasabirisi hya Hatonda, sosi olwʼebiraŋi ebi bahola.
Ebiri mu bbaluŋa yino mu buupi
1. Pawulo atandiha nʼohuheesa (1:1-5)
2. Pawulo aloma hu biŋamba hu magambi (1:6–2:21)
3. Pawulo anyonyola hu biŋamba hu magambi nʼehisasabirisi hya Hatonda (3–4)
4. Pawulo alabbira abafugiirira Kurisito hu ngeri eyi bali nʼohumenyamo (5:1–6:10)
5. Hyamugaso omuutu ohucuusiwa mu bulamu wuwe ohuhira ohuhomola (6:11-18)
1
Ohweyanjula ko nʼobuheese
1 Ndiise Pawulo omuhwenda wa Kurisito abaŋandiihira enywe abafugiirira Kurisito abali mu twale lyʼe Galatiya. Ese Pawulo sindi muhwenda olwohuba ti abaatu batobola oba omuutu obuutu ohuutuma. Aye ndi muhwenda olwohuba Yesu Kurisito ni Hatonda Seefe owamulamusa, njʼabanyangala era baatuma. 2 Ese ko nʼabalebe bosibosi mu Kurisito abali ŋano hubahehiiseho enywe ebibbubbu byʼabafugiirira Kurisito mu Galatiya, 3 Hatonda Seefe ni Musengwa Yesu Kurisito babaŋambire ehisasabirisi era babaŋe emiyaaya. 4 Yesu Kurisito oyo olwʼohugera hwa Hatonda era Seefe, geŋaayo bamwita hu lwʼebibi byefe atunoŋole mu mulembe guno omubi. 5 Ale abaatu baŋenga Hatonda oyo eŋono emirembe nʼemirembe, Amiina.
Amaŋuliro Amalaŋi amatuufu
6 Bahyange, hikenire efiiri hu mutwe ohuba ti musenguhire ohuŋwa hu Hatonda owabalanga mufuuhe baana babe olwʼehisasabirisi hya Kurisito oyu mwahafugiiriranga, mangumangu mwabbaamira hu somesa eyindi eyi babadulinga baati mbo yoosi maŋuliro malaŋi, 7 ate nga ko panaŋo. Ehihulu hiri hiiti ŋaliŋo abaatu abali hubaŋwitania olwʼohwenda ohuhoohera ebyawe mu Maŋuliro Amalaŋi agaŋamba hu Yesu Kurisito. 8 Aye ŋanabaŋo omuutu agesyaho ohubabuulira obuhwenda obundi obutali obwo obu hwabaleetera oludaayi, omuutu oyo nʼolwaba mulala hu fe abahwenda oba malayika ohuŋwa mwigulu, Hatonda amusyenanga! 9 Ngʼolu hwahena ohubalomera, nindi kigobolamo ti, hanye ŋaliŋo omuutu ali hugesyaho ohubabuulira obuhwenda obundi owenjabulo hu bula obu mwafugiirira, Hatonda amusyenanga! 10 Bino simbiroma olwʼohwenda ohweŋomya eyiri abaatu wabula olwʼohwenda Hatonda asiime ebi kola. Olwohuba singa kola ogwʼohweŋomya eyiri abaatu, aŋo mba sipanga huba muŋeeresa wa Kurisito owolereeye.
Engeri eyi Pawulo gafuuhamo Omuhwenda wa Yesu
11 Aboluganda, nenda mumanye hino ti Amaŋuliro Amalaŋi aga ndomera abaatu sigahuseega buseege. 12 Sinagasuna huŋwa hu muutu yesiyesi oba ti omuutu njʼowasomesa, ohutusaho Yesu Kurisito omwene njʼowagambwihulira.
13 Manyire ti mwaŋulira ebiŋamba hu bulamu wange ni naali ni kiiri mu diini lyʼEhiyudaaya, era ngʼolu nahiyaanianga ehibbubbu hyʼabafugiirira Kurisito aba Hatonda gaali nʼahenire ohutongosa, era ngʼolu nagesyaho ohubisihiirisa. 14 Ebiŋamba hu bumanyi owʼediini lyʼEhiyudaaya naali netemaho mutwe era ni ŋaŋuma wa muwoolo gwange owaali ni gapunyamo era ni nenda abaatu bosibosi baŋambe obulombolombo wʼabasehulu beefe. 15 Cooka Hatonda mu hisasabirisi hihye owanjabula ni kiiri nomu hida hya maama, olwʼohusiima huhwe gananga tambe omulimo gugwe, 16 era gaamanyisa ebiŋamba hu Yesu Omwana wuwe olwʼohwenda mbiromere Abatali Bayudaaya. Hino natandiha ohuhihola aŋabula hwendula bumanyi eyiri omuutu yesiyesi. 17 Sinatiina wayire nomu hibuga Yerusaalemu eyiri abaneherera ohuba abahwenda mbebuuseho aye nenyoheramo natiina mu twale lyʼe Buŋarabbu eyi naŋwa oluvanyuma nga tiina mu hibuga Damasiko.
18 Ni ŋabitaŋo emyaha edatu, nga ko tiina e Yerusaalemu ohumanyana ni Peetero aye yeesi nahena ni naye endaalo ehumi nʼetaanu jooŋene. 19 Ni naali eyo ŋabula muhwenda owundi oyu nabonanaho ni naye ohutusaho Yakobbo mulebe ya Yesu Musengwa. 20 Mu mazima ameene aga Hatonda ebindoma bino sibyabudulingi. 21 Ni naŋwa e Yerusaalemu natiina mu matwale gʼe Siriya nʼe Kilikiya. 22 Mu hiseera ehyo abaatu abahira obungi mu bibbubbu byʼabafugiirira Kurisito abomu twale lya Buyudaaya baali bahiiri huumanya. 23 Baali baŋulira huŋulira efuma yʼebipambaho ebi baatu babalomeranga baati, “Omusinde ola owatuhiyaanianga leero yeesi abuulira abaatu bafugiirire ebyo ebi gaŋahanianga nʼatenda abaatu babifugiirire.” 24 Era nga bajumirya Hatonda olwʼebyali ni binjolireho.