20
Jises asehek sahou sokek ta oro lau abo gok ta bolo bilin waen
1 Jises asehek sahou ja anya, “Jo asehek dah tiri lau ale anya ka-en bwena, tasah tondrok ta Kindrei i buku le ndramak ari tan munyak solo-an. Na mandraben handru iy iu ili takaleh iri lau ta ame abo gok ta bolo bilin waen tan. 2 Oro lau ta gok nane ndraso-ok ta akohok luk ronoh (K1) ta len ari, eme ndramak nane suni oro ala abo gok bolo bilin waen tan.
3 “Mada an eme ndro ari ndramak nane ili ma iy atou oro lau ra-on areu laleyah areu mada ba-en. 4 Eme iy tiye toro i buku doh, ‘Ado ale kala kabo gok bolo bilin waen. Ya jo kameh isih ado winiya le gok ado bwidiy.’ 5 Eme oro ala.
“Ya, na mada an udu alih ma mada an taloh beyeh, ndramak nane ili amekes buku aliy ale. 6 Eme na mada an limeh na beyeh, iy ili ja iy atou oro lau ra-on ales laleyah, eme iy ndremenyani oro, ‘Buku sah handru ya len ari ma buruwen dah ado ales laleyah ya ado bamekes ari gok bwe?’
7 “Oro asumon bohon buku doh, ‘Ari ndramak badeu gok bame taso bo-oh.’
“Ndramak nane anya, ‘Mwasin, ado ale kala kabo gok bolo bilin waen tek.’
8 “Kon abeyeh handru tama bilin waen nane tiye ta ndramak ta in bwena ta gok tan buku doh, ‘Ou luhi oro lau ta gok kame ya ou adeu sihine oro. Ou adeu sihine oro lau ame hamon ta gok bwena, kano ou adeu sowa oro lau mari kili kisos are lau eme bwena handru ta gok.’
9 “Eme oro lau nane abo gok na mada an limeh ame akohok sihine oro; oro ari, ari akohok luk ronoh (K1). 10 Eme oro lau nane oro abo gok ma bwena handru oro ame, oro abudon buku oro kameh akohok luk solo-an ja. Arile bwe. Oro akohok luk ronoh (K1), ndramak ari, ari. 11 Oro atou luk oro akohok ma oro abolosen i ta tama bilin waen nane buku doh, 12 ‘Oro lau ame hamon oro babo gok luwen bwe, arile ou adeu sihine oro i buku le aso akohok. Arile aso abo gok boto-on handru na mandraben eme isos dah, ya an sulumwi aso andra-i labai.’
13 “Tama bilin nane anuhun sahou doh ya iy tiye ta ndramak ari toro lau ta gok nane anya, ‘Kawas tek, jo bamekes ari ndra-in bawek tam bwe, sebwe na mandraben handru, talu asehek ta ou kameh akohok luk ronoh (K1), neh? 14 Ou akohok sihinem ma ou a-au ai. Na so-ok tek amwenen ya jo edeu sihine i ndramak nane in hamon eme i buku le ado nane ame bwena. 15 Idoh lakou tek amwenen. Sebwe jo winiyan ba-en hamon ta budon tek amwenen ta ondrek luk tek bwe nadeh, neh? Buku none jo anya kamekes kandriyen mwasin ki toro lau doh, buku sah handru ya ou abudon andra-i.’ ”
16 Eme Jises anya, “Idoh i buku le iri lau ale an hamon handru, oro kameh ame bwena. Ya oro lau ale an bwena, oro kameh ame hamon ja.”
Jises asehek san tulusin ai, ta nyala imek ma amak tan
(Mak 10:32-34; Luk 18:31-33)
17 Jises edek iu ili Jerusalem. Iy kuhi oro lau tan ma ronoh la-uh ala a ka-un, ya oro adek kahis le, Jises tiye toro i buku doh, 18 “Ado kanuhun, na dah to ala loke ala Jerusalem, ma iri kameh atehei Nadu Ndramak Awas ili mine iri tinan tiri pris ma hawe iri lau ta leheya kandriyen tiri Juwis. Ya iri kameh atehei iy ili ta mada sahou, ma iri kameh atilik sahou i se ta kadai iy kimek. 19 Ya oro kameh atehei iy ili mine iri lau ra-on badu leheleh, ta oro lau doh kabobose iy, ma ka-um iy na malou sakabuk i bek, ma katehei iy ki bada kei tondreh. Ya hamon ta len taloh iy kameh amak ja.”
Jemis uru Jon anya kasahan ndramak tinan
(Mak 10:35-45)
20 Hamon ta aliy tine uru nah ma la-uh nadu Sebedi hawe nadun uru ame atou Jises. Eme iy atehei bwili ndru-un i andri ma iy anya kandremenya Jises ta lakou ari.
21 Eme Jises ndremenyani iy anya, “Ou aso-ok saba lakou?”
Iy badih nane asehek ta Jises i buku doh, “Jo aso-ok ou asehek anya naduk uru ma la-uh dah kameh manyah areu mirihik hawem areu kon tam ta atondrok, ari ereu minem salin, ari ereu minem kamweu.”
22 Jises anuhun sahou doh ma iy asumon i buku doh, “Ado tana ado saba lakou ado ndremenya kede-eh bo-oh! Sebwe ah winiyan a-un na bwiniu jo kameh a-un na aliy dah nadeh?”
Uru asumon, “Aru winiyan.”
23 Jises tiye turu buku doh, “Handru, bwiniu kameh jo a-un na aliy, ah kameh a-un na aliy ale. Arile, are kameh manyah ereu minek salin ma are kameh manyah ereu minek kamweu, idoh jo winiyan batiye bwai. Tasah, kon doh tiri lau ale tama Kindrei ndralowosani iri kabwe.”
24 Ya eme oro lau tan ma ronoh
anuhun sahou turu, oro abolosen labai ili turu. 25 Arile Jises luhi oro mari ame hawen, ma iy asehek i toro i buku doh, “Ado tana ado, iri kabin tiri lau badu leheleh badeh, iri boto-on labai ta atondrok iri lau tiri, ma iri batanau boto-on labai ta iri lau tiri kanuhun sahou tiri handru. 26 Arile kandriyen doh sa-en ndrokowa ado, ndri-iy. Ndramak anya ki tinan kereu ndrokowa ado, iy kasahan lau ta gok kereu ndrokowa ado. 27 Ya are lau anya kereu bwena tado, iy kasahan ndramak ta gok laleyah kereu ndrokowa ado. 28 Idoh le Nadu Ndramak Awas eme ta iri lau kabo gok i tan bwe. Iy eme ta aseben iri, ma ta edeu kohan ta akunoh lau mari.”
Jises mesekei uru lau la-uh mada uru bwe amwenen
(Mak 10:46-52; Luk 18:35-43)
29 Jises hawe oro lau tan
ruwani kon tinan Jeriko, ma oro au. Iri lau solo-an labai an hamon toro. 30 Uru lau la-uh manyah areu kabede san. Uru mada uru bwe, uru anuhun le buku Jises edek eme. Eme ma, uru arah boto-on buku doh, “Laban, ou nadu tubu kabin Debit, ou tikisi aru!”
31 Iri lau solo-an abolosen i turu ma iri tiye turu ta uru kandru-uk. Arile, bwai, uru aloh ma arah boto-on le gwek anya, “Laban, ou nadu tubu kabin Debit, ou tikisi aru!”
32 Eme Jises udu rasi ma aloh i turu, “Ah aso-ok jo kamekes sasah kewek ta ah?”
33 Uru asumon sahou tan i hamon i buku doh, “Laban, aru aso-ok ou sihi mada aru kasak.”
34 Eme Jises tikisi uru, ma iy atehei minen i mada uru, ma nawin bwe mada uru amwenen, ma uru anyolom kon ja. Ma uru an hamon ta Jises.
Jises ili asahan Jerusalem, ma iy leheya iri mwan ma badih
(Kalan 21–25)